(កណ្ដាល)៖ នៅព្រឹកថ្ងៃទី២៤ ខែមេសា ឆ្នាំ២០២២នេះ លោកបណ្ឌិត ដួង ហេង ទីប្រឹក្សាផ្ទាល់សម្តេចតេជោនាយករដ្ឋមន្រ្តី អនុប្រធានក្រុមការងារ ចុះមូលដ្ឋានស្រុកកណ្តាលស្ទឹង ខេត្តកណ្តាល និងជាប្រធានក្រុមការងារ ចុះមូលដ្ឋានឃុំដើមឫស បានអញ្ជើញចូលរួមបញ្ចុះបឋមសីលាសាងសង់ សាលារៀនមួយខ្នង មាន៥បន្ទប់ ដែលជាអំណោយរបស់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា និងសម្តេចកិត្តិព្រឹទ្ធបណ្ឌិត ជូនប្រជាពលរដ្ឋ និងអាជ្ញាធរឃុំដើមឫស។
នៅក្នុងកម្មវិធីនេះ ក៏មានការអញ្ជើញចូលរួមពី លោក នួន នរិន្ទ អនុប្រធានទី១ ចុះមូលដ្ឋានឃុំដើមឫស លោក យុង សំអុល អនុប្រធានក្រុមការងារចុះជួយមូលដ្ឋាន អភិបាលស្រុកកណ្តាលស្ទឹង ប្រធានភូមិ មេឃុំ និងមន្រ្តីអាជ្ញាធរជាច្រើននាក់ផ្សេងទៀត។
លោកបណ្ឌិត ដួង ហេង ក៏បានផ្ដាំផ្ញើការសួរសុខទុក្ខពីសម្ដេចតេជោនាយករដ្ឋមន្ដ្រី និងសម្តេចកិត្តិព្រឹទ្ធបណ្ឌិត និងផ្ដាំផ្ញើការសួរសុខទុក្ខ ពីកិត្ដិបណ្ឌិត ហ៊ីង ប៊ុនហៀង ប្រធានក្រុមការងារចុះមូលដ្ឋានស្រុកកណ្ដាលស្ទឹង ជូនដល់អាជ្ញាធរ ក៏ដូចជាមន្ដ្រីមូលដ្ឋាន ព្រមទាំងអ្នកគ្រូ-លោកគ្រូ ដែលបានចូលរួមក្នុងកម្មវិធីនេះ។
ក្នុងឱកាសនោះ លោកបណ្ឌិត ដួង ហេង បានលើកឡើងពីនយោបាយឈ្នះឈ្នះរបស់សម្ដេចតេជោ ហ៊ុន សែន ដែលធ្វើឲ្យប្រទេសជាតិ មានសុខសន្ដិភាពរហូតដល់នាពេលបច្ចុប្បន្ននេះ ដោយប្រជាពលរដ្ឋមានសិទ្ធដើរហើរ ដោយសេរីពេញទូទាំងផ្ទៃប្រទេស និងអាចប្រកបមុខរបរធ្វើឲ្យសេដ្ឋកិច្ចជីវភាពរបស់ប្រជាពលរដ្ឋ មានការកើនឡើង កាន់តែធូរធាពីមួយឆ្នាំទៅមួយឆ្នាំ។
លោកបណ្ឌិតបានលើកឡើងថា នៅក្នុងស្ថានភាពជំងឺកូវីដ ដែលប្រទេសកម្ពុជា ក៏ដូចជាពិភពលោកទទួលរងនូវជំងឺនេះ អស់រយៈពេលជាង២ឆ្នាំកន្លងមកនេះ គឺប្រទេសកម្ពុជា ក្រោមការដឹកនាំរបស់សម្ដេចតេជោ ហ៊ុន សែន បានខិតខំស្វែងរក និងបញ្ជាទិញវ៉ាក់សាំងមកចាក់ជូនប្រជាពលរដ្ឋ បានទូទាំងប្រទេស តាំងពីក្មេងអាយុ៣ឆ្នាំ រហូតដល់មនុស្សពេញវ័យ និងមនុស្សចាស់។
លោកបណ្ឌិតបន្ដថា ដោយសារតែមានវ៉ាក់សាំងនេះហើយ ដែលធ្វើឲ្យប្រជាពលរដ្ឋបានដើរហើរ ជាពិសេសនៅក្នុងពិធីបុណ្យចូលឆ្នាំកន្លងទៅ គឺចំនួនប្រទេសនៅក្នុងស្រុក និងបានដើរលេងនៅតាមរម្មណីយដ្ឋានជាច្រើនកុះករ សបញ្ជាក់ឲ្យឃើញថា ជាការដឹកនាំត្រឹមត្រូវ លើគោលនយោបាយវ៉ាក់សាំងរបស់សម្ដេចតេជោ ហ៊ុន សែន។
ជាមួយគ្នានេះ លោកបណ្ឌិត ដួង ហេង បានលើកឡើង និងប្រកាសអំពីការគាំទ្របេក្ខភាពសម្ដេចតេជោ ហ៊ុន សែន ជាបេក្ខភាពនាយករដ្ឋមន្ដ្រីគ្រប់អាណត្ដិ និងគាំទ្រលោកបណ្ឌិត ហ៊ុន ម៉ាណែត ជាបេក្ខជននាយករដ្ឋមន្ដ្រី នាពេលអនាគត។
លោកបណ្ឌិត ដួង ហេង និងអាជ្ញាធរមូលដ្ឋាន ក៏បានថ្លែង និងអគុណដល់សន្ដិភាព ព្រោះថា សន្ដិភាពនេះហើយ ដែលធ្វើឲ្យប្រជាពលរដ្ឋនៅក្នុងប្រទេសកម្ពុជា រស់នៅដោយសុខសាន្ដ សន្ដិភាពនេះ កើតចេញពីគោលនយោបាយឈ្នះឈ្នះ របស់សម្ដេចតេជោ ហ៊ុន សែន។
ក្រោយពីបញ្ចប់ពិធីបញ្ចុះបឋមសីលាសាងសង់សាលារៀនមួយខ្នង មាន៥បន្ទប់ ដែលជាអំណោយរបស់សម្ដេចតេជោ និងសម្តេចកិត្តិព្រឹទ្ធបណ្ឌិតនេះ លោកបណ្ឌិត ដួង ហេង ក៏បានប្រជុំជាមួយអនុប្រធានក្រុមការងារ មេឃុំ ក្រុមប្រឹក្សាឃុំ ប្រធានភូមិ អនុភូមិ និងអាជ្ញាធរមូលដ្ឋាន ផ្សព្វផ្សាយពីផែនការ ក៏ដូចជាគោលនយោបាយនៃការបោះឆ្នោតក្រុមប្រឹក្សាឃុំ-សង្កាត់ ដែលប្រព្រឹត្ដធ្វើឡើង នៅថ្ងៃទី៥ ខែមិថុនា ឆ្នាំ២០២២ ខាងមុខនេះ និងបានណែនាំឲ្យអាជ្ញាធរមូលដ្ឋាន រៀបចំការងារនេះឲ្យបានល្អ ដើម្បីទទួលបានជោគជ័យនៃការបោះឆ្នោត សម្រាប់ពេលខាងមុខនេះ៕
