(ភ្នំពេញ)៖ យ៉ាងហោចណាស់ មានយានយន្តសរុបចំនួន ៧៥០គ្រឿងទៀត ត្រូវបាននគរបាលទូទាំងប្រទេសត្រួតពិនិត្យ និងផាកពិន័យ នៅថ្ងៃទី២០ ខែមេសា ឆ្នាំ២០២២នេះ ក្នុងនោះមានម៉ូតូ ៥៩៣គ្រឿង និងរថយន្ត ១៥៧គ្រឿង។ នេះបើតាមឧត្តមសេនីយ៍ឯក ឆាយ គឹមខឿន អគ្គស្នងការរង និងជាអ្នកនាំពាក្យអគ្គស្នងការដ្ឋាននគរបាលជាតិ បញ្ជាក់ប្រាប់បណ្តាញព័ត៌មាន Fresh News។

បើតាមអ្នកនាំពាក្យ, គិតថ្ងៃទី២០ ខែមេសា ក្នុងឆ្នាំ២០២២នេះ នគរបាលចរាចរណ៍ទូទាំងប្រទេសបានត្រួតពិនិត្យ និ៦ផាកពិន័យយានយន្តសរុបចំនួន ៦៥,៩៥២គ្រឿង ក្នុងនោះមានម៉ូតូ ៥០,៦២៦គ្រឿង និងរថយន្តគ្រប់ប្រភេទ ១៥,៣២៦គ្រឿង។

បទល្មើសដែលត្រូវបានកត់សម្គាល់សម្រាប់ម៉ូតូ សញ្ញាគឺភាគច្រើនអត់មួក បត់ជែង ល្មើសសញ្ញា អត់ស្លាកលេខ និងទូរស័ព្ទជាដើម។ ដោយឡែករថយន្តល្បឿន ខ្សែក្រវ៉ាត់ អត់ប័ណ្ណបើកបរ លើសចំណុះ អត់ស្លាកលេខ ទូរស័ព្ទ ឆៀក ស្រវឹង អត់ស្លាកលេខ បត់ជែង និងជីវកម្មដើម។

ឧត្តមសេនីយ៍ឯក ឆាយ គឹមខឿន បានបន្តថា ការអនុវត្តតាមអនុក្រឹត្យលេខ៣៩ ក្នុងការផាកពិន័យយានយន្តល្មើសបានដំណើរការទៅយ៉ាងល្អប្រសើរ។ លោកបានថ្លែងអំណរគុណ និងកោតសរសើរដល់ជនរួមជាតិជាអ្នកប្រើប្រាស់ផ្លូវទាំងអស់ ដែលបានចូលរួមគោរពច្បាប់ចរាចរណ៍យ៉ាងល្អប្រសើររយៈពេលកន្លងមកនេះ ជាពិសេសកោតសរសើរ និងអរគុណដល់នគរបាលចរាចរណ៍ដែលបានលះបង់ និងខិតខំប្រឹងប្រែងជំរុញការរឹតបន្តឹងចរាចរណ៍ប្រកបដោយស្មារតី ទទួលខុសត្រូវខ្ពស់បំផុត។

សូមបញ្ជាក់ថា សម្រាប់ថ្ងៃទី២០ ខែមេសា ឆ្នាំ២០២២នេះ គ្រោះថ្នាក់ចរាចរណ៍នៅទូទាំងប្រទេសកម្ពុជាក៏បានកើតឡើងចំនួន ០៥លើក ក្នុងនោះស្លាប់ចំនួន ០៣នាក់ របួស ០៧នាក់ (របួសធ្ងន់ ០២នាក់)។ រយៈពេល១១០ថ្ងៃនេះ មានករណីគ្រោះថ្នាក់ចរាចរណ៍ចំនួន ១,០៨១លើក បណ្ដាលឱ្យមនុស្សស្លាប់ ៦៣៤នាក់ របួស ១,៥៦៥នាក់ (របួសធ្ងន់ ៩៨៦នាក់)៕