(បាភ្នំ-ព្រៃវែង)៖ លោក ព្រុំ សុខា រដ្ឋមន្រ្តីក្រសួងមុខងារសាធារណៈ និងជាប្រធានក្រុមការងារស្រុក បាភ្នំរួមជាមួយសហការី បានជួបសំណេះសំណាលជាមួយបងប្អូនកម្មករ ពលករចំណាកស្រុក របស់ ឃុំទាំង៩នៃស្រុកបាភ្នំ ក្នុងឱកាសពិធីបុណ្យចូលឆ្នាំថ្មីប្រពៃណីជាតិ ឆ្នាំខាល ចត្វាស័ក ពុទ្ធសករាជ ២៥៦៦។
ជំនួបសំណេះសំណាលសាកសួរសុខទុក្ខនេះ បានប្រព្រឹត្តទៅកាលពីព្រឹកថ្ងៃទី១៦ ខែមេសា ឆ្នាំ ២០២២ នៅទីលានបាលទាត់ស្រុកបាភ្នំ ដោយមានការចូលរួមពីសំណាក់លោក លោកស្រី អនុប្រធាន និងសមាជិក ក្រុមការងារស្រុក ប្រធានក្រុមការងារ ឃុំ មេឃុំ មេភូមិ និងមន្រ្តី មូលដ្ឋានជាច្រើនរូបទៀត សរុបអ្នកចូលរួមមានចំនួនប្រមាណ ១៧០០នាក់។
ជាដំបូងលោក ឡាយ សំអឿន អភិបាលស្រុកបាភ្នំ បានធ្វើសេចក្តីរាយការណ៍ពីស្ថានភាពរួមនៃ ការងារ និងមុខរបររបស់បងប្អូនកម្មករ ពលករ ចំណាកស្រុកបាភ្នំ ដែលបច្ចុប្បន្នកំពុងធ្វើការនៅតាមរោងចក្រ សហគ្រាស និង កន្លែងអាជីវកម្មនានានៅក្នុងទីក្រុងភ្នំពេញ និងទីកន្លែងដទៃទៀត មានចំនួនសរុបប្រមាណ២២០០០នាក់។
បន្ទាប់មក លោករដ្ឋមន្រ្តី ព្រុំ សុខា ប្រធានក្រុម ការងារស្រុកបាភ្នំ បានថ្លែងអំណរគុណ កោត សរសើរ ប្រសិទ្ធិពរជ័យឆ្នាំថ្មីជូនបងប្អូនកម្មករ ពលករ ចំណាកស្រុកទាំងអស់ចំពោះការខិតខំពុះពារអត់ធ្មត់រយៈពេលជាង២ឆ្នាំកន្លងទៅ ដើម្បី បំពេញការងារតាមកំលាំងសមាអាជីវោរបស់ខ្លួន និង បានចូលរួមយ៉ាងសកម្មក្នុងចលនាជាតិបង្ការ ទប់ស្កាត់ និងដោះស្រាយបញ្ហាប្រឈមបង្កដោយ កូវីដ-១៩ ស្ថិតក្រោមការដឹកនាំដ៏ឈ្លាសវៃរបស់ សម្តេចតេជោ ហ៊ុន សែន នាយករដ្ឋមន្រ្តីនៃរាជ រដ្ឋាភិបាលកម្ពុជា ដែលបានប្រយុទ្ធឈ្នះកូវីដ -១៩ នាំសង្គមជាតិមកកាន់ប្រក្រតីភាពជាធម្មតាឡើង វិញដូចសព្វថ្ងៃ។
ឆ្លៀតក្នុងឱកាសនោះដែរ លោក ព្រុំ សុខា រដ្ឋមន្រ្តីក្រសួងមុខងារសាធារណៈ និងជាប្រធាន ក្រុមការងារស្រុកបាភ្នំ ក៏បានផ្តាំផ្ញើរដល់បងប្អូន កម្មករ ពលករ ចំណាកស្រុកទាំងអស់ឱ្យ ប្រឹងប្រែងរក្សាប្រក្រតីភាពការងារ និងមុខរបរ របស់ខ្លួនដោយចិរភាពជាបន្តទៅទៀត ដើម្បីរួមចំណែកយ៉ាងក្លៀវក្លាដល់ការស្ថារសេដ្ឋកិច្ចសង្គមជាតិឱ្យបានងើបឡើងវិញរឹងមាំឆាប់រហ័ស ក្រោយវិបត្តិកូវីដ-១៩។
ឆ្លងតាមនោះ ត្រូវពង្រឹងស្មារតី និង ជំនឿជឿជាក់ ឥតងាករេរបស់យើងទាំងអស់គ្នាមកលើរាជរដ្ឋាភិបាលនៃគណបក្សប្រជាជនកម្ពុជា សំរាប់ ដណ្តើមជ័យជំនះក្នុងការបោះឆ្នោតនាពេលខាងមុខ ដើម្បីបន្តដឹកនាំប្រទេសជាតិយើងក្នុងសុខសន្តិភាព ប្រកបដោយសុខុមាលភាព វិបុលភាព និង វឌ្ឍនភាពរុងរឿងជានិរន្តន៍តរៀងទៅ៕
