(ក្រចេះ)៖ កម្លាំងនគរបាលស្រុកស្នួល សហការជាមួយប៉ុស្ដិ៍ឃុំឃ្សឹម ឃាត់ខ្លួនបុរសម្នាក់ ជាប់ពាក់ព័ន្ធអំពើឃាតកម្មវាយសម្លាប់ប្រពន្ធ របស់ខ្លួន នៅថ្ងៃទី៨ ខែឧសភា ឆ្នាំ២០១៦ ស្ថិត ចំណុចភូមិស្នួល ឃុំស្នួល ស្រុកស្នួល ខេត្តក្រចេះ។
មន្ត្រីនគរបាលមូលដ្ឋានបានឱ្យដឹងថា បុរសជនសង្ស័យឈ្មោះ ហ៊ឹន ណាន អាយុ៤១ឆ្នាំ ស្នាក់នៅភូមិស្នួលកើត ឃុំស្នួល ស្រុកស្នួល ខេត្តក្រចេះ បានប្រើអំពើហិង្សាទៅលើប្រពន្ធរបស់ខ្លូនឈ្មោះ អ៊ីន ស៊ូជន រហូតដល់ស្លាប់ក្រោយកើតហេតុបាន៣ថ្ងៃ។
នគរបាលបានបន្ដថា មុខពេលកើតហេតុថ្ងៃទី៦ ខែឧសភា ឆ្នាំ២០១៦ ជនសង្ស័យរួមទាំងមិត្តភ័ក្របានផឹកស៊ីនៅក្នុងផ្ទះរបស់ខ្លួន ពេលនោះប្រពន្ធរបស់ជនសង្ស័យក៏នៅក្នុងកម្មវិធីនេះផងដែរ លុះពេលផឹកស្រាអស់១លីត្រកន្លះ មិត្តភ័ក្ររបស់ជនសង្ស័យបានត្រឡប់ទៅផ្ទះវិញ ស្រាប់តែពេលនោះប្រពន្ធរបស់ខ្លួនបានដេញខ្លួនឱ្យចេញពីផ្ទះ ពេលនោះខ្លួនខឹងនឹងប្រពន្ធយ៉ាងខ្លាំង ក៏បានទាញស៊ុមរូបថតវាយទៅលើប្រពន្ធរបស់ខ្លួនជាច្រើនបណ្ដាលឱ្យបែកកញ្ចប់ស៊ុមរូបថតនោះ ក្រោយមកខ្លួនបានយកស៊ុមនោះទៅទុកក្រោមផ្ទះ។
លុះព្រឹកថ្ងៃទី៧ ខែឧសភា ឆ្នាំ២០១៦ ប្រពន្ធរបស់ខ្លួនបានជេរ និងបោះបង្វិចខោអាវឱ្យខ្លួនចេញពីផ្ទះ ខណៈពេលនោះខ្លួនបានកាន់តែខឹងប្រពន្ធ ក៏បានស្ទុះទៅយកស៊ុមរូបថតដ៏ដែរវាយទៅលើប្រពន្ធរបស់ខ្លួនម្ដងទៀត បណ្ដាលឱ្យប្រពន្ធមានរបួសជាច្រើននៅលើដងខ្លួន ពេលនោះកូនរបស់ខ្លួនឈ្មោះ ណាន ណាក់ បានមកចាប់បំបែកចេញ។
ក្រោយមកខ្លួនបានរត់គេចទៅផ្ទះប្អូនរបស់ខ្លូន នៅភូមិស្នួលកើត បានរយៈពេល២ថ្ងៃ ប្អូនប្រុសរបស់ខ្លូនបានមកប្រាប់ថាប្រពន្ធខ្លួនបានស្លាប់ទៅហើយ ពេលនោះខ្លួនបានទៅមើលសពប្រពន្ធ ពេលទៅដល់ក៏ត្រូវបានសមត្ថកិច្ចធ្វើការឃាត់ខ្លូនតែម្ដង។
បច្ចប្បន្នជនសង្ស័យត្រូវបានឃុំខ្លួនបណ្ណោះអាសន្ន នៅការិយាល័យព្រហ្មទណ្ឌកំរិតធ្ងន់ នៃស្នងការដ្ឋាននគរបាលខេត្តក្រចេះ ដើម្បីក៏សាងសំណុំរឿងបញ្ជូនទៅតុលាការចាត់ការតាមនីតិវិធី៕
