(ភ្នំពេញ)៖ តាមអនុសាសន៍ណែនាំរបស់លោក ថោង ខុន ប្រធានក្រុមការងារថ្នាក់ជាតិចុះមូលដ្ឋានខេត្តកំពង់ធំ និងជាប្រធានក្រុមការងារគណបក្សប្រជាជនកម្ពុជាចុះជួយស្រុកបារាយណ៍ និងស្រុកតាំងគោក, លោក នី ផល្លី ប្រធានក្រុមការងារបក្សប្រជាជនចុះជួយឃុំត្នោតជុំ និងលោកស្រី ហេង ពិសី ព្រមទាំងក្រុមគ្រួសារ និងសហការី បាននាំយកទេយ្យទានប្រគេនដល់ព្រះសង្ឃ និងបច្ច័យសម្រាប់កសាងវត្តចំនួន៦វត្ត អមដោយពិធីសំណេះសំណាលជាមួយលោកគ្រូអ្នកគ្រូ សិស្សជាប់បាក់ឌុបក្នុងឃុំត្នោតជុំ ស្រុកបារាយណ៍ ខេត្តកំពង់ធំ។

សកម្មភាពទ្រទ្រង់ពុទ្ធចក្រ និងអាណាចក្រនេះធ្វើឡើងនាព្រឹកថ្ងៃទី១០ ខែមេសា ឆ្នាំ២០២២ នៅវត្តត្នោតជុំ ឃុំត្នោតជុំ ស្រុកបារាយណ៍។

នារសៀលថ្ងៃដដែលនោះ លោក នី ផល្លី និងលោកស្រី ហេង ពិសី បានអញ្ជើញជាអធិបតីក្នុងពិធីសំណេះសំណាលជាមួយសាខាបក្ស និងប្រធានក្រុមបក្សប្រជាជនកម្ពុជាមកពីភូមិទាំង៩នៃឃុំត្នោតជុំ នៅទីស្នាក់ការគណបក្សប្រជាជនកម្ពុជាឃុំត្នោតជុំ។

លោកបានគូសបញ្ចាក់ប្រាប់ថា ប្រទេសកម្ពុជាក្រោមការដឹកនាំប្រកបដោយកត្តិបណ្ឌិតរបស់សម្តេច ហ៊ុន សែន ជានាយករដ្ឋមន្រ្តី ទទួលបាននូវសុខសន្តិភាព ការរីកចម្រើននៃសេដ្ឋកិច្ច និងជីវភាពរបស់ប្រជាពលរដ្ឋរីកចម្រើនគ្រប់ទិសទី។ បន្ថែមពីនោះ លោកបានផ្សព្វផ្សាយអំពីគោលនយោបាយរបស់គណបក្សប្រជាជនកម្ពុជា ពង្រឹងស្មារតីឆ្ពោះការទទួលបានជ័យជម្នះក្នុងការបោះឆ្នោតខាងមុខ និងបានផ្តាំផ្ញើដល់ប្រធានក្រុមបក្សទាំងអស់ត្រូវរួមគ្នា និងផ្សព្វផ្សាយបន្តដល់សមាជិកក្រុមក្នុងការចូលរួមបម្រើ ថែរក្សា និងការពារសន្តិភាព ដើម្បីធានាដល់និរន្តរភាពនិងវិបុលភាពនៃការអភិវឌ្ឍសេដ្ឋកិច្ច និងសង្គម។

សារនយោបាយខាងលើដែលថ្លែងដោយ លោកប្រធានក្រុមការងារបក្សប្រជាជនចុះជួយឃុំត្នោតជុំទទួលបានការសារទរ និងគាំទ្រយ៉ាងក្លៀវក្លាពីអង្គពិធី ស្របពេលជាមួយគ្នានោះ ប្រធានក្រុមបក្សប្រជាជនកម្ពុជាមកពីភូមិទាំង៩នៃឃុំត្នោតជុំ បានប្តេជ្ញាបន្តពង្រឹងស្មារតីសមាជិកក្នុងក្រុមបក្សរបស់ខ្លួនដើម្បីបោះឆ្នោតជូនគណបក្សប្រជាជនកម្ពុជាគ្រប់ៗអាណត្តិ។

សូមបញ្ជាក់ថា ទេយ្យទានសម្រាប់ប្រគេនដល់ព្រះសង្ឃ និងសម្ភារៈបរិក្ខារនានាជូនដល់លោកគ្រូអ្នកគ្រូ សិស្សជាប់បាក់ឌុបក្នុងឃុំត្នោតជុំ និងប្រធានក្រុមបក្សប្រជាជនកម្ពុជា មកពីភូមិទាំង៩នៃឃុំត្នោតជុំ ដែលជាអំណោយរបស់លោក នី ផល្លី ប្រធានក្រុមការងារបក្សប្រជាជនចុះជួយឃុំត្នោតជុំ និងលោកស្រី ហេង ពិសី ព្រមទាំងក្រុមគ្រួរសារ រួមមាន៖ អង្ករចំនួន១.២តោន, មី១២កេស, ទឹកសុទ្ធ២៤កេស, ទឹកត្រី៦យួរ, ទឹកស៊ីអ៉ីវ៦យួរ, ត្រីខកំប៉ុង១២យួរ, សៀវភៅ៥០៦ ក្បាល, ប៊ិច៨៧០ដើម, ម៉ាស២០០ប្រអប់, កៅអីសិក្សា៤០កៅអី, ទឹកសម្លាប់មេរោគ eBiodis ចំណុះ៣០លីត្រចំនួន២១កាន, ចំណុះ៥០០ម.លចំនួន៤៧កេស, ចំណុះ១០០ម.លចំនួន២៤កេស, ម៉ាស៉ីនវាស់កម្ដៅលាងដៃ៦គ្រឿង និងឧបករណ៍បូមទឹក៧ខ្សែ ព្រមទាំងបច្ច័យកសាងវត្តចំនួន៦វត្តសរុប៧,២០០,០០០រៀល ថវិកាជូនលោកគ្រូអ្នកគ្រូក្នុងឃុំត្នោតជុំ៥៣នាក់ សរុប២,១២០,០០០រៀល សិស្សជាប់បាក់ឌុប៦០នាក់ សរុប២,៤០០,០០០រៀល តាជីយាយជី១១០នាក់សរុប១១លានរៀល ប្រធានក្រុមបក្ស២៨៣នាក់ សរុប៧,១៧៥,០០០រៀល សាខាបក្ស៩នាក់ សរុប៧២០,០០០រៀល និងឧបត្ថម្ភស្នាក់ការបក្សឃុំត្នោតជុំ ១,០០០,០០០រៀល៕