(ភ្នំពេញ)៖ ក្រុមយុវជន និងនិស្សិត ដែលដឹកនាំដោយ លោក ស្រី ចំរើន ដើម្បីទាមទារឱ្យលោក កឹម សុខា ប្រធានស្តីទីគណបក្សសង្រ្គោះជាតិ បកស្រាយទៅនឹងការចោទប្រកាន់របស់កញ្ញា ខុម ចាន់តារ៉ាទី ហៅស្រីមុំ បានប្រកាសរំសាយហើយ នៅម៉ោងជាង១០៖០០ព្រឹកថ្ងៃទី០៧ ខែឧសភា ឆ្នាំ២០១៦នេះ។ ការតវ៉ានេះមិនមានការប៉ះទង្គិចគ្នារវាងក្រុមអ្នកទាមទារ និងសកម្មជន CNRP នៅខេត្តកំពង់ធំ ម្សិលមិញនោះទេ។
លោក ស្រី ចំរើន តំណាងក្រុមអ្នកតវ៉ាទាំងនោះ បានប្រាប់ Fresh News ឱ្យដឹងថា «ការតស៊ូមតិទាមទារ លោក កឹម សុខា ត្រូវបានបញ្ចប់ ដោយគ្មានអំពើហឹង្សាអ្វីឡើយ ដោយសារមានសមត្ថកិច្ចជួយសម្រួលសណ្តាប់ធ្នាប់ (កងកម្លាំងប្រឆាំងបាតុកម្ម) ហើយខ្ញុំផ្ទាល់ក៏សូមថ្លៃអំណអរគុណ ដល់អាជ្ញាធរមានសមត្ថកិច្ច ខេត្តសៀមរាប ដែលជួយមស្រួលមិនឱ្យសកម្មជន និងអង្គរក្ស លោក កឹម សុខា ប្រើអំពើហឹង្សាមកលើក្រុមយុវជនយើងខ្ញុំ ព្រោះទង្វើនៃសកម្មភាព របស់ជនសកម្មជន និងអង្គរក្សរបស់លោក កឹម សុខា មានចេតនា ចង់ក្រុមនិស្សិតមានរបួសស្នាម»។
សូមជំរាបថា នៅព្រឹកថ្ងៃទី០៧ ខែឧសភា ឆ្នាំ២០១៦នេះ លោក កឹម សុខា ប្រធានស្តីទីគណបក្ស សង្រ្គោះជាតិ បានអញ្ជើញ ជាអធិបតីក្នុងពិធី ប្រកាស សុពលភាព ថ្នាក់ដឹកនាំ គណបក្សប្រចាំខេត្តសៀមរាប ខណៈក្រុមតំណាងយុវជន និស្សិតរបស់ លោក ស្រី ចំរើន ក៏បានបង្ហាញវត្តមានផងដែរ នៅកន្លែងវេទិកា ដើម្បីតាមសួរនាំ និងទាមទារឲ្យលោក កឹម សុខា បកស្រាយជុំវិញរឿងអាស្រូវផ្លូវភេទជាមួយកញ្ញា ខុម ចាន់តារ៉ាទី ហៅស្រីមុំ។
នាថ្មីៗនេះ លោក កឹម សុខា ក៏បានរងនូវបណ្តឹង២ទៀតផងដែរ ពាក់ព័ន្ធនឹងរឿងរ៉ាវ ជាមួយកញ្ញា ខុម ចាន់តារ៉ាទី ហៅស្រីមុំ ក្នុងនោះមានបណ្តឹងពីកញ្ញា ធី សុវណ្ណថា អតីតសកម្មជនគណបក្សសង្រ្គោះជាតិ ដែលប្តឹងពីបទបរិហារកេរ្តិ៍ និង បណ្តឹងពីកញ្ញា ខុម ចាន់តារ៉ាទី ហៅស្រីមុំ ដែលចោទអនុប្រធានគណបក្សសង្រ្គោះជាតិ រូបនេះថា ធ្វើឱ្យបាត់បង់កិត្តិយសរបស់នាង និងមិនគោរពតាមសន្យា៕
