(ឧត្តរមានជ័យ)៖ យ៉ាងហោចណាស់ប្រជាពលរដ្ឋប្រុស ស្រី ចំនួន៣នាក់ បានរងរបួសធ្ងន់ និងស្រាល ត្រូវបានក្រុមគ្រួសារនាំយកទៅព្យាបាលនៅឯមន្ទីរពេទ្យខេត្ត បន្ទាប់ពីត្រូវសត្វខ្ទីងព្រៃ១ក្បាលដេញវ័ធ នាថ្ងៃទី៣០ ខែមិនា ឆ្នាំ២០២២ ស្ថិតនៅភូមិសិទ្ធសេរីចាស់ ឃុំគោកមន ស្រុកបន្ទាយអំពិល ខេត្តឧត្តរមានជ័យ។
បើតាមសំដីប្រជាពលរដ្ឋបានឱ្យដឹងថា មុនពេលហេតុការណ៍នេះកើតឡើង គឺប្រជាពលរដ្ឋរងគ្រោះទាំង ៣នាក់ មុខរបរជាកសិករបាននាំគ្នាទៅចំការដំឡូងរបស់គាត់ ហើយគាប់ជួនពេលនោះពួកគាត់បានឃើញសត្វ១ក្បាលស្មានថាជាសត្វក្របី ដឹងអីជាសត្វខ្ទីងសោះ ក៏នាំគ្នាទៅដេញចេញពីចំការ ស្របពេលកំពុងដេញ សត្វនោះវាក៏រត់មកសំដៅពួកគាត់វិញ ដេញវាត់បណ្តាលឱ្យពួកគាត់រងរបួសធ្ងន់ ស្រាល ត្រូវបានក្រុមគ្រួសារ នាំមកសម្រាកព្យាបាលនៅមន្ទីរពេទ្យបង្អែកខេត្តឧត្តរមានជ័យ។
ចំណែកសត្វខ្ទីងនោះ លោក ប៉ែន កុសល្យ អភិបាលខេត្តឧត្តរមានជ័យ បានណែនាំឱ្យអជ្ញាធរស្រុកបន្ទាយអំពិល រួមនឹងកម្លាំងអភិរក្សមន្ទីរបរិស្ថានខេត្ត កម្លាំងផ្នែកសឹករងបន្ទាយអំពិល និងកម្លាំងអធិការដ្ឋាននគរបាលស្រុក ឃ្លាំចាំមើលដើម្បីរង់ចាំកម្លាំងជំនាញអភិរក្សសួនសត្វ មកចាប់ដោយផ្ទាល់៕
