(ភ្នំពេញ)៖ «វិស័យដីធ្លីកម្ពុជា ពីឥឡូវដល់១០ឆ្នាំទៅមុខទៀត គឺមិនថយចុះនោះទេ» នេះបើយោងតាមសំដីរបស់លោក គីម ហ៊ាង ប្រធានសហគម វាយតំម្លៃអចលនវត្ថុកម្ពុជា ថ្លែងប្រាប់អ្នកសារព័ត៌មាន នៅព្រឹកថ្ងៃទី៥ ខែឧសភា ឆ្នាំ២០១៦ ក្នុងកិច្ចប្រជុំ សមាគមអ្នកវាយតម្លៃអាស៊ាន នាសណ្ឋាគារសូហ្វីតែល ភូគីត្រាភ្នំពេញ។

ប្រធានក្រុមហ៊ុនខ្មែរ រៀលអ៉ីស្តេតរូបនេះ បានថ្លែងថា «វិស័យដីធ្លីកម្ពុជាពីឥឡូវដល់១០ឆ្នាំ ទៅមុខទៀតគឺមិនថយចុះនោះទេ។  ជាការពិតតំលៃដីធ្លីអាចមិនស្ថិតស្ថេរ នៅក្នុងកំឡុង​ពេល១០ឆ្នាំ អាចនឹងមាន២ឆ្នាំជួបនឹងបញ្ហា តែមិនមានន័យថា ជាប់គាំងនោះទេ»។

លោកបានបន្ដថា មានចម្ងល់ និងការព្រួយបារម្ភជាច្រើនចោទសួរថា ក្នុងឆ្នាំ២០១៦ ដីធ្លីអាចជាប់គាំងលក់មិនបាន ឬក៏យ៉ាងណា? ពាក់ព័ន្ធបញ្ហានេះលោកបានឆ្លើយតប និងការព្រួយបារម្ភនេះថា ជាការពិតវាអាចពិបាកក្នុងការលក់ចេញ ប៉ុន្ដែវាមិនមានន័យថា ជាប់គាំងលក់មិនចេញរហូតនោះទេ។ លោកបានលើក ឧទាហរណ៍ថា ប្រសិនបើប្រជាពលរដ្ឋមានដីមួយកន្លែង គាត់ចង់លក់តែ​ក្នុងឆ្នាំ២០១៦ លក់មិនចេញ នេះវាមិនមែនជាបញ្ហាចោទនោះទេ ព្រោះឆ្នាំនេះលក់មិនចេញ អាចបន្ដលក់នៅឆ្នាំ២០១៨ ឬ២០១៩ទៀតបាន ចណែកឯតម្លៃវិញអាចនឹងថ្លៃលើសដើមក៏ថាបាន។

លោក គឹម ហ៊ាង បញ្ជាក់ទៀតថា ជារៀងរាល់ឆ្នាំកំណើនប្រជាជន នៅតែងកើតមាតម្រូវការនៃជម្រក ក៏ត្រូវតែកើនឡើងដូចគ្នា មិនមានប្រជាជនណា ដែលមិនត្រូវការជម្រកនោះទេ ដូចច្នេះដីធ្លីនៅតែ​មានសន្ទុះ។ ជាមួយគ្នានេះ ប្រទេសកម្ពុជា ជាប្រទេសកំពុងអភិវឌ្ឍន៍ ដូច្នេះមានបរទេសជាច្រើន បានមករកស៊ី និងធ្វើជំនួញនៅកម្ពុជា ពួកគេត្រូវការជម្រក ត្រូវការដីសម្រាប់រស់នៅ សម្រាប់សាងសង ដើម្បីវិនិយោគលើផ្នែកអ្វីមួយ ដូច្នេះដីធ្លីនៅតែដើតួននាទីយ៉ាសំខាន់។

ជាមួយគ្នានេះដែរ លោក ខេង ចេង ប្រធានក្រហ៊ុនអចលនទ្រព្យ CPL បានសម្តែងនូវក្តីសុទិដ្ឋិនយម ចំពោះការរីកចម្រើនលើវិស័យ អចលនទ្រព្យនៅកម្ពុជា។ លោក ខេង ចេង បានលើកឡើងថា នៅរយៈពេលប៉ុន្មានឆ្នាំចុងក្រោយនេះ ស្ថានភាពនៃការសាងសង់របស់កម្ពុជា មានអគារយ៉ាងច្រើនបានរីកដុះដាលយ៉ាងខ្លាំង ។ ការកើនឡើងនៃវិស័យសំណង់នេះ បង្ហាញពីសញ្ញាល្អ ដែលអាចឲ្យ​អតិថិជន មានទំនុកចិត្តតៗគ្នា និងមានការជឿជាក់ថា ប្រទេសកម្ពុជាមានស្ថិរភាព ដែលអាចធ្វើឲ្យអ្នកវិនិយោគមកវិនិយោគបន្ថែមនៅកម្ពុជា៕