(កណ្ដាល)៖ លោក ចៅ តុល អនុប្រធានទី២ អចិន្ត្រៃយ៍ចុះជួយស្រុកកោះធំ បានអំពាវនាវដល់ប្រជាពលរដ្ឋទាំងអស់គ្នា បោះឆ្នោតជូនគណបក្សប្រជាជនកម្ពុជា នាអំឡុងពេលបោះឆ្នោតឃុំ-សង្កាត់នាពេលឆាប់ៗខាងមុខនេះ ដើម្បីនិរន្តរភាព នៃសុខសន្តិភាព និងការរីកចំរើនទៅមុខជាលំដាប់ ក្រោមម្លប់សន្តិភាពដឹកនាំដោយសម្ដេចតេជោ ហ៊ុន សែន ប្រធានគណបក្សប្រជាជន និងជានាយករដ្ឋមន្រ្តីនៃកម្ពុជា។
លោក ចៅ តុល បានថ្លែងយ៉ាងដូច្នេះ នៅក្នុងពិធីបញ្ចូលសមាជិកថ្មីគណបក្សប្រជាជនកម្ពុជាឃុំព្រែកថ្មី ស្រុកកោះធំ ខេត្តកណ្តាលចំនួន៦១៨នាក់ ស្ថិតនៅបរិវេណវិហារឥស្លាមស្រុកកោះធំ នៅថ្ងៃទី២០ ខែមីនា ឆ្នាំ២០២២ ដោយមានពលរដ្ឋចូលរួមអបអរសាទររាប់រយនាក់ផ្សេងទៀតផងដែរ។
លោក ចៅ តុល បានផ្ដាំផ្ញើសមាជិកសមាជិកាថ្មីមកពីគណបក្សផ្សេងទាំង៦១៨នាក់ ត្រូវមានបេះដូងស្មោះត្រង់ចំពោះបក្ស ស្មោះត្រង់ជាតិ ស្មោះត្រង់ប្រជាជន និងធ្វើយ៉ាងណាខិតខំរៀនសូត្រ ជួយសង្គម ធ្វើឲ្យខ្លួនក្លាយជាបញ្ញាជន ជាបញ្ញវន្ត ដើម្បីចូលរួមក្នុងការអភិវឌ្ឍប្រទេសជាតិឲ្យមានការរីកចម្រើនទៅមុខ និងពិសេសផ្សព្វផ្សាយដល់យុវជនយុវតីទាំងអស់ដែលជាមិត្តភក្តិរបស់ខ្លួន និងបងប្អូនសាច់ញាតិឲ្យយល់ពីតម្លៃនៃសុខសន្តិភាព ព្រមទាំងដឹងគុណដល់ សម្ដេចតេជោ ហ៊ុន សែន ដែលជាមគ្គុទ្ទេសក៍ឯកដឹកនាំប្រទេសជាតិឲ្យមានការរីកចម្រើន និងជាអ្នកបង្រួបបង្រួមជាតិពីសង្រ្គាមឲ្យស្គាល់តែសន្តិភាព ស្គាល់តែការរីកចំរើនជាដើម។
ជាមួយគ្នានេះលោក ចៅ តុល ថ្លែងបន្តថា «៥០០ឆ្នាំមកហើយ កម្ពុជាមិនដែលមានសន្តិភាពទេ ប៉ុន្តែមកដល់សម័យតេជោសែន គឺកម្ពុជាមានឯកភាពជាតិតែមួយ ក្រោមដំបូលតែមួយ គឺរកបានដោយសម្ដេចតេជោ ហ៊ុន សែន ដូច្នេះយើងត្រូវទទួលស្គាល់ទាំងអស់គ្នាព្រោះវាជាការពិត»។
លោកបានគូសបញ្ជាក់ថា គោលនយោបាយឈ្នះឈ្នះរបស់សម្ដេចតេជោ ហ៊ុន សែន បានដឹកនាំកម្ពុជាយើងពីបាតដៃទទេរហូតដល់មានការអភិវឌ្ឍន៍ មានសុខសន្តិភាព មានការឯកភាពជាតិ និងបន្តដំណើរឆ្ពោះទៅកាន់ការអភិវឌ្ឍន៍ ការរីកចម្រើន ដូច្នេះមន្ត្រីមូលដ្ឋានទាំងអស់គ្នា ត្រូវតែចូលរួមក្នុងការផ្សព្វផ្សាយពីទង្វើល្អរបស់គណបក្សប្រជាជនកម្ពុជាឲ្យរឹតតែខ្លាំងឡើង ហើយខ្លួនឯងផ្ទាល់ក៏ត្រូវតែធ្វើល្អបម្រើប្រជាពលរដ្ឋឲ្យរឹតតែល្អប្រសើរឡើង ព្រោះការបោះឆ្នោតឃុំសង្កាត់ខិតជិតចូលមកដល់ហើយ។
លោក ចៅ តុល បន្ថែមថា «នៅស្រុកកោះធំយើងនេះ មានមន្ទីរពេទ្យទំនើបមួយ បាននិងកំពុងតែសាងសង់ឡើង គឺមន្ទីរពេទ្យតេជោសែនកោះធំ ដែលជាមន្ទីរពេទ្យត្រូវបានសាងសង់ឡើងក្នុងរង្វង់ទឹកប្រាក់ជាង១១លានដុល្លារ ដែលនេះសបញ្ជាក់ឲ្យឃើញអំពីការរីកចម្រើន និងការយកចិត្តទុកដាក់របស់រាជរដ្ឋាភិបាលកម្ពុជា ចំពោះបងប្អូនប្រជាពលរដ្ឋទូទាំងស្រុកកោះធំ និងស្រុកផ្សេងៗទៀតនៅជុំវិញ ដើម្បីបានជួយដល់សុខភាពរបស់បងប្អូនប្រជាពលរដ្ឋ ដែលមានជំងឺដង្កាត់មករកសេវាព្យាបាលនៅក្នុងមន្ទីរពេទ្យនេះ ខណៈដែលមន្ទីរពេទ្យតេជោនេះ បំពាក់ទៅដោយឧបករណ៍ទំនើបៗមានធនធានមនុស្សមានជំនាញពិតប្រាកដនិងមានស្តង់ដារត្រឹមត្រូវ»។
លោកបានបញ្ជាក់ទៀតថា សមិទ្ធផលល្អមួយទៀតគឺផ្លូវជាតិលេខ២១ ឆ្លងកាត់ស្រុកស្អាង និងស្រុកកោះធំ គឺពីមុនឡើយជាផ្លូវដែលមានការលំបាកលំបិន ហើយស្ពានវិញមានចំនួនយ៉ាងច្រើនយ៉ាងរហូតដល់ទៅជាង៧០ស្ពាន ឯណោះ។ ប៉ុន្តែបច្ចុប្បន្នផ្លូវជាតិលេខ២១ ត្រូវបានស្ថាបនាឡើងយ៉ាងស្រស់ស្អាតរលើបរលោងប្រកបដោយគុណភាពស្របតាមស្តង់ដារ ដែលសមិទ្ធផលល្អមួយនេះទទួលបានការសាទរ ពីសំណាក់បងប្អូនប្រជាពលរដ្ឋ នៅទូទាំងខេត្តកណ្ដាល និងទូទាំងប្រទេស ហើយផ្លូវជាតិលេខ២១នេះ នេះជាសមិទ្ធផលដ៏ល្អឯកសម្រាប់ស្រុកកោះធំយើងដែលគ្រោងនឹងសម្ពោធឆាប់ៗខាងមុខនេះហើយ។
លោក ចៅ តុល ក៏បានសង្កត់ធ្ងន់ផងដែរដោយប្រៀបធៀបរវាងអតីតមេដឹកនាំបក្សប្រឆាំងកម្ពុជា ដែលបាមរលត់ខ្ចាត់ខ្ចាយទៅនឹងមេដឹកនាំអ៊ុយក្រែនដែលមានសភាពខុសគ្នាដាច់ស្រឡះក៏ព្រោះតែអតីតមេដឹកនាំបក្សប្រចាំកម្ពុជា និងបក្ខពួក មិនដែលស្រឡាញ់ជាតិ មិនដែលស្រឡាញ់ប្រជាជននោះទេ គិតតែពីរត់ចោលស្រុកបោះបង់អ្នកគាំទ្រចោល ហើយគិតតែពីបោកលុយតែប៉ុណ្ណោះ គ្មានចេះធ្វើអ្វីនោះទេ ហើយពីមួយថ្ងៃទៅមួយថ្ងៃ ចេះតែរកល្បិចកិចកល ធ្វើយ៉ាងណាលាបពណ៌ បង្កាច់បង្ខូចមកចំពោះគណបក្សប្រជាជនកម្ពុជាទាំងល្ងិតល្ងង់ជាមួយនឹងគំនិតទុច្ចរិត ធ្វើយ៉ាងណាធ្វើឲ្យប្រជាពលរដ្ឋស្អប់គណបក្សប្រជាជនកម្ពុជា ខណៈដែលគណបក្សប្រជាជនកម្ពុជាមានស្នាដៃក្នុងការដឹកនាំ ប្រទេសជាតិឲ្យមានការរីកចម្រើនទៅមុខជាលំដាប់រក្សាបាននូវសុខសន្តិភាពស្ថេរភាពសេដ្ឋកិច្ចមានការលូតលាស់ទៅមុខនឹងបន្តដឹកនាំប្រទេសជាតិឱ្យមានសុខសន្តិភាពអោយមានការអភិវឌ្ឍឱ្យមានការរីកចម្រើនតទៅមុខជាដរាបពិសេសធ្វើឲ្យប្រជាជនមានជីវភាពប៉ុន្តែធូរធារឡើងធូរធារឡើង។
បន្ថែមលើសនេះលោក ចៅ តុល ក៏បានលើកឡើងអំពីការចូលរួមរបស់យុវជនគណបក្សប្រជាជនកម្ពុជា ក្នុងការចុះដៃជួយដល់សង្គមឃើញមានការផុសផុលខ្លាំងណាស់ ដែលនេះសបញ្ជាក់ឲ្យឃើញអំពីការស្រឡាញ់ ពេញចិត្តពីសំណាក់ក្រុមយុវជនទាំងអស់មកចំពោះគណបក្សប្រជាជនកម្ពុជា ដែលជាគណបក្សតែមួយគត់មានសមត្ថភាពក្នុងការដឹកនាំប្រទេសកម្ពុជាឱ្យមានសុខសន្តិភាព មានការរីកចម្រើន និងមានការអភិវឌ្ឍន៍តទៅមុខជាលំដាប់ ហើយក្នុងនោះបេក្ខភាពអនាគតនាយករដ្ឋមន្ត្រីគឺលោក ហ៊ុន ម៉ាណែត ក៏ត្រូវបានក្រុមយុវជនទាំងអស់មានការគាំទ្រភ្លូកទឹកភ្លូកដី ព្រមទាំងពីសំណាក់បងប្អូនប្រជាពលរដ្ឋយ៉ាងច្រើនកុះករផងដែរ៕
