(ភ្នំពេញ)៖ បន្ទាប់ពីលោក កឹម សុខា ប្រធានស្តីទីគណបក្សសង្រ្គោះជាតិ បានប្រកាសចុះធ្វើវេទិកាសាធារណៈនៅខេត្តកំពង់ធំ និងខេត្តសៀមរាប នាថ្ងៃទី០៦ និងទី០៧ ខែឧសភានេះ ដោយឡែកនៅរសៀ់លថ្ងៃនេះលោក ស្រី ចំរើន និងតំណាងយុវជន៣០នាក់ នឹងចុះទៅតាមលោក កឹម សុខា ដើម្បីស្នើសុំជួប សុំការបកស្រាយពាក់ព័ន្ធរឿងប្រព្រឹត្តអំពើអនាចាជាមួយស្រីមុំ។
លោក ស្រី ចំរើន បានថ្លែងឲ្យដឹងយ៉ាងដូច្នេះថា «ខ្ញុំបាទ និងតំណាងយុវជន៣០នាក់ នឹងទៅខេត្តកំពង់ធំថ្ងៃទី៦ និងខេត្តសៀមរាបថ្ងៃទី៧នេះស្នើសុំជួបលោកកឹម សុខា ដើម្បីឲ្យគាត់បកស្រាយរឿងប្រព្រឹត្តអំពើអនាចារជាមួយស្រីមុំ»។
លោក កឹម សុខា បានប្រកាសនៅលើ Facebook របស់លោកនាព្រឹកថ្ងៃទី០៥ ខែឧសភា ឆ្នាំ២០១៦នេះថា នៅថ្ងៃទី០៦-០៧ ខែឧសភា លោកនឹងអញ្ជើញជាអធិបតីប្រកាសសុពលភាពថ្នាក់ដឹកនាំគណបក្សខេត្ត។ លោក កឹម សុខា បានឲ្យដឹងថា ថ្ងៃសុក្រ ទី០៦ ខែឧសភា វេលាម៉ោង៨ព្រឹក លោកនឹងធ្វើពិធីនៅទីស្នាក់ការគណបក្សខេត្តកំពង់ធំ តាមផ្លូវជាតិលេខ៦ ភូមិអាចារ្យលាក់ សង្កាត់អាចារ្យលាក់ ក្រុងស្ទឹងសែន ខេត្តកំពង់ធំ។ ដោយឡែកថ្ងៃសៅរ៍ ទី០៧ ខែឧសភា វេលាម៉ោង៨ព្រឹក ធ្វើនៅទីស្នាក់ការគណបក្សខេត្តសៀមរាប ស្ថិតក្នុងភូមិត្រពាំងសេះ សង្កាត់គោកចក ក្រុងសៀមរាប ខេត្តសៀមរាប។
សូមបញ្ជាក់ថា បច្ចុប្បន្នសំណុំរឿងអាស្រូវស្នេហ៍របស់លោក កឹម សុខា ជាមួយនារីក្រៅផ្ទះ ដែលត្រូវបានទម្លាយតាមទំព័រ Facebook «រឿងពិត CNRP» កំពុងនិងធ្វើឲ្យមានការចាប់អារម្មណ៍ខ្លាំងពីមជ្ឈដ្ឋាននានា។ តែទោះជាយ៉ាងណា លោក កឹម សុខា នៅតែបន្តរក្សាភាពស្ងប់ស្ងាត់ដោយអនុវត្តតាមទ្រឹស្តី «មិនឆ្លើយ មិនឆ្លង មិនឈ្លោះ»។
បើទោះបីជាលោក កឹម សុខា រក្សាជំហរមិនឆ្លើយតបទៅនឹងរឿងអាស្រូវនេះក្តី តែតួអង្គស្រីម្នាក់ ក្នុងចំណោមតួអង្គជាច្រើននាក់ គឺកញ្ញា ខុម ច័ន្ទតារាទី ហៅស្រីមុំ បានចេញសារភាព និងទទួលស្គាល់អាស្រូវស្នេហ៍របស់ខ្លួន ជាមួយលោក កឹម សុខា ព្រមទាំងបានប្តឹង លោក កឹម សុខា ទារសំណងជំងឺចិត្តប្រមាណ ៣០ម៉ឺនដុល្លារផងដែរ។
ក្រៅពីស្រីមុំ ការទម្លាយខ្សែអាត់សំឡេងរបស់ «រឿងពិត CNRP» បានធ្វើឲ្យកញ្ញា ធី សុវណ្ណថា សកម្មជន ដែលធ្លាប់តែគាំទ្រគណបក្សសង្រ្គោះជាតិ បានប្តឹងលោក កឹម សុខា ពីបទបរិហារកេរ្តិ៍ទារសំណងជំងឺចិត្ត ១លានដុល្លារផងដែរ។
តាមរយៈបណ្តឹងបរិហារកេរ្តិ៍របស់កញ្ញា ធី សុវណ្ណថានេះ លោក កឹម សុខា ត្រូវបានព្រះរាជអាជ្ញារងអមសាលាដំបូងរាជធានីភ្នំពេញ កោះហៅឲ្យចូលទៅបំភ្លឺនៅថ្ងៃទី១១ ខែឧសភា ឆ្នាំ២០១៦ខាងមុខ៕
