(ឧត្តរមានជ័យ)៖ បន្ទាប់ពីគ្រោះធម្មជាតិ​ខ្យល់កន្រ្តាក់ ធ្វើឲ្យរលំ និងខូចខាតផ្ទះ​សម្បែងប្រជាពលរដ្ឋ​ជាច្រើនខ្នង​នៅល្ងាចម្សិលមិញនោះ ព្រឹកថ្ងៃទី០៤ ខែឧសភា ឆ្នាំ២០១៦ នេះ លោក ស ថាវី អភិបាលខេត្តឧត្តរមានជ័យ បានដឹកនាំកម្លាំង​ដោយផ្ទាល់ចុះ​ពិនិត្យស្ថានភាព​រងគ្រោះរបស់​ប្រជាពលរដ្ឋ។

លោក ស ថាវី បានសំដែងការសោកស្តាយខ្លាំង​ចំពោះហេតុការណ៍​ខ្យល់កន្ត្រាក់។ ក្នុងនាមជាអជ្ញាធរខេត្ត លោក ស ថាវី បានប្រកាសថា លោកមិនព្រងើយកន្តើយក្នុងការជួយដល់ប្រជាពលរដ្ឋ​នោះ​ឡើយ ដោយលោកនឹងដឹកនាំ​កងកម្លាំង​ដោយផ្ទាល់​ចុះជួយជួស​ជុលផ្ទះ​ជូនប្រជាពលរដ្ឋឡើងវិញ។

ក្រៅពីការពិនិត្យស្ថាន​ភាពរងគ្រោះ និងផលប៉ះពាល់ហើយនោះ លោក ស ថាវី បានផ្តល់ថវិកា ១លាន​៥សែនរៀល ដល់កងរាជអាវុធហត្ថស្រុក​ទិញស័ង្កសី​ប្រក់ដំបូល​ផ្ទះដល់គ្រួសារ​និវត្តជន និង បានផ្តល់ប្រាក់ឧបត្ថម្ភ​ដល់លោកយាយលោកតា​និវត្តជន​៣នាក់​ក្នុងម្នាក់ ២០ដុល្លា។

សូមបញ្ជាក់ថា កាលពីល្ងាចថ្ងៃទី០៣ ខែឧសភា ឆ្នាំ២០១៦ ខ្យល់កន្ត្រាក់លាយឡំនិងភ្លៀង បណ្តាលឲ្យផ្ទះប្រជាពលរដ្ឋ និងសា លារៀនតាមបណ្តាស្រុកមួយចំនួនត្រូវរងការខូចខាត។​ ដោយឡែក​នៅទីប្រជំជន​ស្រុកអន្លង់វែង បានរងការខូចខាតច្រើនជាងគេ។

ផ្ទះដែលរលំ និងប៉ើងដំបូលសរុបមានចំនួន ៩៤ខ្នង និងមានបាក់ដើមឈើ បាក់អង់តែនតេអូរនៅរមណីយដ្ឋានផ្ទះតាម៉ុក ហើយក្មេងប្រុសម្នាក់ត្រូវរន្ទះបាញ់ស្លាប់ផងដែរ៕