(ឧត្តរមានជ័យ)៖ មន្ត្រីឈរជើងនៅច្រកទ្វារអន្តរជាតិជាំ ខេត្តឧត្តរមានជ័យ ជាប់ព្រំដែនប្រទេសថៃ បានរងការរិះគន់ថា ទារប្រាក់ហួសកម្រិតមិនអាចទទួលយកបានឡើយ គ្រាន់តែពួកគាត់ទិញផ្លែឈើ​យកមកលក់ដូរធម្មតា ដឹកតាមរថយន្ត ម៉ូតូបន្តិចបន្តួច ក៏ត្រូវបានមន្ត្រីទាំងនោះទារប្រាក់ដែរ។

បងស្រី សុខ វណ្ឌី បានប្រាប់ភ្នាក់ Fresh News នៅព្រឹកថ្ងៃទី២ ខែឧសភានេះថា រាល់ថ្ងៃនេះពួកគាត់បានដឹងថា ថ្នាក់ដឹកនាំ និងក្រសួងពាក់ព័ន្ធ មិនឲ្យប្រមូលពន្ធចំពោះមុខម្ហូប និងផ្លែឈើ ដែលសំរាប់​ប្រកបមុខរបរកស៊ីប្រចាំ​ថ្ងៃឡើយ តែចំពោះមន្ត្រីឈរសព្វថ្ងៃនេះ បានយកលុយគ្មានអាណិត​អាសូចំពោះពួកគាត់។ ពាក់ព័ន្ធបញ្ហាខាងលើនេះ លោក ហ៊ូ ដារិទ្ធ ប្រធានស្នាក់ការ​ច្រក​ទ្វាអន្តរ​ជាតិជាំ បានប្រាប់ថា បញ្ហាទាំងអស់នេះវាមានខ្លះ តែចំពោះមន្ត្រីឈរជើងនៅទីនោះ លោកតែងតែហៅ និងប្រជុំជាញឹកញ៉ាប់ណាស់ មិនឲ្យមានការប៉ះពាល់ អារម្មណ៍របស់ពលរដ្ឋឡើយ។ លោ​ក​បន្តថា ចំពោះការដឹកយកបន្លែ ផ្លែឈើនោះ គឺគ្មានការបង់លុយនោះទេ គេតម្រូវតែទឹកក្រូច ទឹកសុទ្ធ និងទំនិញផ្សេងៗ ទើបមន្ត្រីឈរជើងឲ្យបង់លុយ ឬបង់ពន្ធ។

ក្រុមអាជីវករ​បានបន្តទៀតថា តែទោះបីជាយ៉ាងណា បញ្ហាទាំងអស់នេះ នៅតែមានដកក្នុងចិត្តរបស់ពួកគេដដែល ហើយសង្ឃឹមថា មន្ត្រីឈរជើងទីនោះមេត្តាគិតគូ និងបញ្ឈប់បញ្ហានេះទៀត មិនដូច្នោះដាច់ពោះអស់ហើយ៕