(បាត់ដំបង)៖ ប្រជាពលរដ្ឋចំនួន៤៧៩គ្រួសារ នៅក្នុងឃុំព្រះផុស ស្រុកគាស់ក្រឡ ខេត្តបាត់ដំបង បានទទួលទឹកប្រើប្រាស់ពីតំណាង របស់ពួកគាត់ ដែលជាតំណាងរាស្រ្តមណ្ឌលខេត្តបាត់ដំបង គឺលោក ឈាង វុន និងលោកស្រី លី គឹមលៀង នៅថ្ងៃទី១ ខែឧសភា ឆ្នាំ២០១៦។
លោក ឈាង វុន អ្នកតំណាងរាស្រ្តមណ្ឌលខេត្តបាត់ដំបង និងជាប្រធានគណៈកម្មការកិច្ចការបរទេស សហប្រតិបត្តិការ អន្តរជាតិ ឃោសនាការ និងព័ត៌មាន នៃរដ្ឋសភា និង លោកស្រី លី គឹមលៀង តំណាងរាស្រ្តមណ្ឌលខេត្តបាត់ដំបង និងជាលេខាធិការគណៈកម្មការ សេដ្ឋកិច្ច ហិរញ្ញវត្ថុធនាគារ និងសវនកម្ម នៃរដ្ឋសភា បានអញ្ជើញចុះចែកទឹកជូនប្រជាពលរដ្ឋ ក្នុងភូមិតានួត ២១០គ្រួសារ ភូមិចេក ចំនួន២០៤គ្រួសារ ភូមិកុយវែងចំនួន៧៤គ្រួសារ សរុបមានចំនួន៤៧៩គ្រួសារ ស្ថិតក្នុងភូមិព្រះផុសស្រុកគាស់ក្រឡ ខេត្តបាត់ដំបង។
ប្រជាពលរដ្ឋមានការសប្បាយរីករាយ នៅពេលឃើញការយកចិត្តទុកដាក់ ពីតំណាងរាស្រ្តរបស់ពួកគាត់បែបនេះ និងបានថ្លែងអំណរគុណ យ៉ាងជ្រាលជ្រៅ ជូនដល់តំណាងរាស្រ្តទំាងពីររូប និងអ្នកចូលរួមទំាងអស់។ នាព្រឹកថ្ងៃដដែលនោះ ក៏មានពិធីដាំដើមឈើដើម្បីចូលរួម ចំណែកការពារបរិស្ថាន និងកាត់បន្ថយកម្តៅផងដែរ។
នៅក្នុងឱកាសនោះ លោក ឈាង វុន បានពាំនាំការផ្តាំផ្ញើសាកសួរសុខទុក្ខ ពីសំណាក់សម្តេចពញាចក្រី ហេង សំរិន ប្រធានរដ្ឋសភា សម្តេចតេជោ ហ៊ុន សែន នាយករដ្ឋមន្រ្តី និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជាជូនប្រជាពលរដ្ឋ ទាំងអស់ ដោយលោកបានលើកឡើងថា សម្តេចទំាងបី មានការព្រួយបារម្ភជាខ្លំាង ពីសុខទុក្ខពលរដ្ឋនាពេលដែលអាកាសធាតុកំពុងឡើង កំដៅនេះ។ ជាមួយគ្នានេះ សម្តេចទំាងបីបាន កំពុងចាត់វិធានការនានា ដើម្បីដោះស្រាយបញ្ហាទឹកជូនពលរដ្ឋដោយមិនបណ្តោយឲ្យពលរដ្ឋ ណាម្នាក់ ខ្វះទឹកប្រើប្រាស់នោះទេ។
លោកតំណាងរាស្រ្ត ឈាង វុន បានផ្តំាផ្ញើដល់ប្រជាពលរដ្ឋឲ្យយកចិត្តទុកដាក់ លើបញ្ហាសុខភាព និងកុំព្រួយបារម្ភពីបញ្ហាកង្វះខាតទឹក ប្រើប្រាស់នេះ ពីព្រោះរាជរដ្ឋាភិបាល ដែលដឹកនាំដោយ សម្តេចតេជោ ហ៊ុន សែន បានដាក់បទបញ្ជាយ៉ាងម៉ឺងម៉ាត់ ឲ្យថ្នាក់ដឹកនាំខេត្ត មន្ទីរស្ថាប័ន អាជ្ញាធរគ្រប់ជាន់ថ្នាក់ ទូទាំង២៥រាជធានី-ខេត្ត ចុះពិនិត្យផ្ទាល់ និងបានដោះស្រាយទឹកជូន ប្រជាពលរដ្ឋឲ្យបាន ទាន់ពេលវេលា។
លោក ឈាង វុន បានលើកឡើងថា រហូតមកដល់នេះ មានខេត្តក្រុងមួយចំនួន បានទទួលទឹកភ្លៀងខ្លះៗហើយ។ ទន្ទឹមនឹងមេឃអាចនឹង ធ្លាក់ភ្លៀងបន្តបន្ទាប់ មកទៀតនោះ លោកក៏បានអំពាវនាវដល់ប្រជាពលរដ្ឋ ស្តារនិងត្រៀមជីកស្រះ ដើម្បីស្តុកទឹកភ្លៀងទុកប្រើប្រាស់ ផងដែរ៕
