(កោះកុង)៖ នៅថ្ងៃទី១០ ខែកុម្ភៈ ឆ្នាំ២០២២នេះ ក្រសួងទេសចរណ៍ បានរៀបចំសិក្ខាសាលាផ្សព្វផ្សាយ «ផែនការយុទ្ធសាស្ត្រលើកកម្ពស់យេនឌ័រក្នុងវិស័យទេសចរណ៍ ដំណាក់កាលទី៤ ឆ្នាំ២០២០-២០២៤»។

សិក្ខាសាលានេះធ្វើឡើងក្រោមអធិបតីភាព លោកស្រី ហ៊ុន ដានី រដ្ឋលេខាធិការ តំណាងលោក ថោង ខុន រដ្ឋមន្ត្រីក្រសួងទេសចរណ៍ និងមានការអញ្ជើញចូលរួមពីលោកស្រី គង់ សូរីតា អនុរដ្ឋលេខាធិការ ក្រសួងកិច្ចការនារី, លោកស្រី មិថុនា ភូថង អភិបាលខេត្តកោះកុង, មន្ទីរអង្គភាពពាក់ព័ន្ធក្នុងខេត្ត លោក លោកស្រី ប្រធានមន្ទីរទេសចរណ៍រាជធានី-ខេត្ត យុវជន ស.ស.យ.ក យុវជនកាកបាទក្រហម និងផ្នែកឯកជនជាច្រើនរូប។

ថ្លែងក្នុងពិធីបើកសិក្ខាសាលា លោកស្រី ហ៊ុន ដានី បានលើកឡើងថា រាជរដ្ឋាភិបាលកម្ពុជាក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បាននិងកំពុងយកចិត្តទុកដាក់យ៉ាងខ្លាំង ក្នុងការជំរុញអភិវឌ្ឍសេដ្ឋកិច្ច-សង្គម តាមរយៈការដាក់ចេញនូវយុទ្ធសាស្ត្រចតុកោណ «ដើម្បីកំណើន ការងារ សមធម៌ និងប្រសិទ្ធភាពនៅកម្ពុជា»។

ជាងនេះទៀត ការលើកកម្ពស់ការចូលរួមរបស់ស្រ្តី ក៏ត្រូវបានឆ្លុះបញ្ចាំងផងដែរ នៅក្នុងគោលនយោបាយសមភាពយេនឌ័រ ដែលមានចែងក្នុងរបៀបវារ: នៃយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាល ដោយបានផ្តល់នូវតម្លៃ និងសារៈសំខាន់ នៃការចូលរួមរបស់ស្រ្តីនៅគ្រប់ដំណើរការ នៃការអភិវឌ្ឍ ព្រមទាំងបានចាត់ទុកថា «ស្ត្រី គឺជាឆ្អឹងខ្នងនៃសេដ្ឋកិច្ច និងសង្គមជាតិ»។ ដោយឡែក ក្រសួងទេសចរណ៍ តែងតែគាំទ្រដល់ការលើកកម្ពស់សមភាពយេនឌ័រនៅគ្រប់ដំណើរការការងាររបស់ខ្លួន ស្របតាមគោលនយោបាយរបស់រាជរដ្ឋាភិបាល ដែលបានដាក់ចេញ។

លោកស្រីរដ្ឋលេខាធិការ ក៏បានគូសបញ្ជាក់ថាជាក់ស្តែង «សៀវភៅផែនការយុទ្ធសាស្ត្រ» ដែលបានប្រកាសផ្សព្វផ្សាយនាពេលនេះ គឺជាសមិទ្ធផលថ្មីមួយទៀត ដែលបានឆ្លុះបញ្ចាំងឲ្យឃើញនូវការបន្ដយកចិត្តទុកដាក់របស់ក្រសួងទេសចរណ៍ ក្នុងដំណើរឆ្ពោះទៅមុខ ជាមួយនឹងវឌ្ឍនភាពដែលមានការគិតគូរ អំពីស្ត្រីតាមរយៈការដាក់ចេញនូវ «ផែនការយុទ្ធសាស្ដ្រ លើកកម្ពស់យេនឌ័រ ក្នុងវិស័យទេសចរណ៍ ដំណាក់កាលទី៤ ឆ្នាំ២០២០-២០២៤» ដែលត្រូវបានរៀបចំឡើងដើម្បី ជាផែនទីតម្រង់ទិសឆ្ពោះទៅគោលដៅ «សមភាពយេនឌ័រ» និងអភិវឌ្ឍធនធានស្ត្រីក្នុងវិស័យទេសចរណ៍ ដោយបានកំណត់ច្បាស់នូវចក្ខុវិស័យ បេសកកម្ម ទិសដៅ និងសកម្មភាពជាយុទ្ធសាស្ត្រ សំដៅពង្រឹងតួនាទី តម្លៃស្ត្រីឲ្យកាន់តែមានប្រសិទ្ធភាពក្នុងភាពជាដៃគូរបស់បុរស ទាំងក្នុងសកម្មភាពសង្គម សេដ្ឋកិច្ច និងការធ្វើសេចក្តីសម្រេចដើម្បីធានាបានសុខដុមនីយកម្ម សេចក្តីថ្លៃថ្នូរ និងការបង្កើនភាពអង់អាចផ្នែកសេដ្ឋកិច្ចតាមរយៈចំណេះជំនាញ និងបទពិសោធន៍ សម្រាប់ការអភិវឌ្ឍវិស័យទេសចរណ៍ប្រកបដោយចីរភាព និងបរិយាបន្ន។

លោកស្រី ហ៊ុន ដានី បានបន្ថែមថា ផែនការយុទ្ធសាស្ត្រនេះ ជាវិធានផងដែរដែលធានាថា គ្រប់អង្គភាពពាក់ព័ន្ធត្រូវលើកផែនការសកម្មភាពរបស់ខ្លួន ឲ្យឆ្លើយតបទៅនឹងយេនឌ័រ។ កត្តាជោគជ័យ នៃការអនុវត្តផែនការយុទ្ធសាស្រ្តនេះ អាស្រ័យទៅលើការប្តេជ្ញាចិត្តរបស់មន្រ្តីគ្រប់លំដាប់ថ្នាក់ ជាពិសេសអ្នកដែលមានសិទ្ធិធ្វើសេចក្តីសម្រេច ដើម្បីឈានទៅរកការកាត់បន្ថយគម្លាតយេនឌ័រ នៅក្នុងវិស័យទេសចរណ៍។

ជាមួយគ្នានេះ លោកស្រី មិថុនា ភូថង អភិបាលខេត្តកោះកុង ក៏បានលើកឡើងផងដែរថា រាជរដ្ឋាភិបាល បាននិងកំពុងយកចិត្តទុកដាក់ជាអតិបរមាទៅលើការលើកកម្ពស់សមភាពយេនឌ័រ និងពង្រឹងភាពអង់អាចដល់ស្ត្រីលើគ្រប់វិស័យ និងគ្រប់កម្រិតទាំងនៅថ្នាក់ជាតិ និងថ្នាក់ក្រោមជាតិ តាមរយ:ការបញ្ជ្រាបយ៉ាងស៊ីជម្រៅទៅក្នុងផែនការយុទ្ធសាស្ត្រអភិវឌ្ឍន៍ជាតិ២០១៩-២០២៣ ដោយបានបញ្ចូលនូវសូចនាករជាក់លាក់សម្រាប់តាមដានការអនុវត្ត។

ក្នុងនាមលោកស្រី ជាថ្នាក់ដឹកនាំនៅថ្នាក់ក្រោមជាតិផង និងជាស្ត្រីមួយរូបផង សូមសម្តែងនូវការគាំទ្រយ៉ាងពេញទំហឹង ចំពោះផែនការយុទ្ធសាស្ត្រនេះ និងរីករាយសហការជានិច្ចជាមួយក្រសួងទេសចរណ៍ ដើម្បីបុព្វហេតុស្ត្រី និងការរីកចម្រើន នៃវិស័យទេសចរណ៍ ដែលមានខេត្តកោះកុង ជាគោលដៅទេសចរណ៍ដ៏មានសក្តានុពលមួយផងដែរនោះ។

ឆ្លៀតក្នុងឱកាសនោះ លោកស្រី គង់ សូរីតា អនុរដ្ឋលេខាធិការក្រសួងកិច្ចការនារី ក្នុងនាមក្រសួងកិច្ចការនារី ក៏បានសម្តែងនូវការគាំទ្រផងដែរ ចំពោះក្រសួងទេសចរណ៍ដែលបានខិតខំប្រឹងប្រែងដាក់ចេញនូវផែនការយុទ្ធសាស្ត្រគាំទ្រដល់គោលនយោបាយលើកកម្ពស់សមភាពយេនឌ័រ និងស្របតាមផែនការយុទ្ធសាស្ត្រនារីរតន: សំដៅអនុវត្តរួមគ្នាជាអន្តរវិស័យ ព្រោះកិច្ចការងាយេនឌ័រ មិនមែនជាកិច្ចការងារដោយឡែករបស់ក្រសួងកិច្ចការនារីតែឯងនោះទេ។

លោកស្រី ក៏បានស្នើឲ្យគ្រប់ក្រសួង-ស្ថាប័ន ដែលមានភារកិច្ចជាអ្នកចូលរួមអនុវត្ត និងសម្របសម្រួល ត្រូវខិតខំប្រឹងប្រែងរួមគ្នាជាមួយនឹងយន្តការតាមដាន ត្រួតពិនិត្យ វាយតម្លៃ សំដៅធ្វើយ៉ាងណាឲ្យស្ថានភាពស្ត្រី នៅក្នុងវិស័យទេសចរណ៍ និងស្ត្រីនៅក្នុងប្រទេសកម្ពុជាយើងកាន់តែល្អប្រសើរឡើង៕