(ភ្នំពេញ)៖ អគ្គលេខាធិការ គណៈកម្មាធិការជាតិអូឡាំពិកកម្ពុជា (NOCC) លោក វ៉ាត់ ចំរើន បានថ្លែងឲ្យដឹង​ថា កីឡាការិនីកម្ពុជា ស៊ន សៀវម៉ី នៅមានចំណុចខ្សោយមួយ ដែលជាឧបសគ្គ​ក្នុងដំណើរ​ឆ្ពោះទៅប្រកួតកីឡាអូឡាំពិក រដូវក្ដៅ នៅទីក្រុង Rio ប្រទេសប្រេស៊ីល នាខែសីហាខាងមុខ គឺគុណភាពខាងកម្លាំងកាយ។

លោក វ៉ាត់ ចំរើន បានបញ្ជាក់ថា គុណភាពកម្លាំងកាយ គឺជាកង្វះខាតសម្រាប់កញ្ញា ស៊ន សៀវម៉ី ដែលត្រូវបំប៉នដោយយកចិត្តទុកដាក់បំផុត មុននឹងចេញទៅប្រកួតអូឡាំពិក។ ពេលនេះ NOCC និងខេមរៈសហព័ន្ធតេក្វាន់ដូ កំពុងស្វែងរកគ្រូជំនាញជនជាតិកូរ៉េខាងត្បូង ២រូប មកបង្ហាញផ្នែកកម្លាំងកាយដល់ ស៊ន សៀវម៉ី ។

អគ្គលេខាធិការ NOCC រូបនេះបានបន្ដថា «ការប្រកួតកីឡាអូឡាំពិក នៅទីក្រុង Rio នឹងមានជើងខ្លាំងជុំវិញពិភពលោក ចូលរួម ដែលមានទាំងសមត្ថភាព បច្ចេកទេស និងកម្ពស់ គឺមិនចាញ់ ស៊ន សៀវម៉ី ឡើយ ។ ប៉ុន្ដែកញ្ញា សៀវម៉ី ក៏មានបច្ចេកទេសប្រកួតល្អដែរ តែអ្វីដែលជាចំណុចខ្សោយ គឺគុណភាពកម្លាំងកាយប៉ុណ្ណោះ» ។

ពេលនេះ NOCC និងលោក ឆយ យ៉ុងសុក កំពុងស្វែងរកអ្នកជំនាញជនជាតិកូរ៉េ មកពង្រឹងសមត្ថភាពកម្លាំងកាយ របស់ ស៊ន សៀវម៉ី ព្រោះរយៈពេល ២ខែមិនយូរនោះទេ ដូច្នេះ ចាំបាច់ត្រូវមានអ្នក​ជំនាញមកបង្ហាត់គេ ទើបគេមានសង្ឃឹមច្រើនក្នុងការប្រកួតកីឡាអូឡាំពិកនេះបាន លោក វ៉ាត់ ចំរើន បញ្ជាក់បន្ថែម ។

គួរបញ្ជាក់ផងដែរថា កីឡាការិនីតេក្វាន់ដូ ស៊ន សៀវម៉ី គឺជាវីរៈកីឡាការិនីឆ្នើមទី១ ដែលដណ្ដើមបានមេដាយមាស និងសិទ្ធិចូលរួមប្រកួត កីឡាអូឡាំពិកជាតិផ្លូវការ ក្នុងប្រវត្តិសាស្ដ្រជាង៦០ឆ្នាំ សម្រាប់វិស័យកីឡាកម្ពុជា កាលពីពេលថ្មីៗកន្លងទៅ។ អាស្រ័យហេតុនេះហើយ ទើបក្រសួងអប់រំ និង NOCC យកចិត្តទុកខ្លាំង ដើម្បីជ្រោមជ្រែងនាង ឆ្ពោះទៅដណ្ដើមមេដាយ កីឡាអូឡាំពិក នៅទីក្រុង Rio ប្រទេសប្រេស៊ីល ដែលគ្រោងនឹងធ្វើការប្រកួតនៅអំឡុង ខែសីហា ឆ្នាំ២០១៦ ខាងមុខនេះ៕