(ភ្នំពេញ)៖ លោក ហុក គឹមចេង ប្រធានមជ្ឈមណ្ឌលជាតិផ្តល់ឈាមនៅថ្ងៃទី២៨ ខែមេសា ឆ្នាំ២០១៦នេះ បានអំពាវនាវប្រាប់ដល់សប្បុរសជន មេត្តាអញ្ជើញមកចូលរួមផ្ដល់ឈាម ដើម្បីជួយសង្គ្រោះជីវិតមនុស្ស ដែលបាត់បង់និងត្រូវការឈាម។ បច្ចុប្បន្នអ្នកជម្ងឺដែលត្រូវការឈាមច្រើនជាងគេនោះ ភាគច្រើនជាអ្នកដែលជួបបញ្ហានានារួមមាន៖ ការវះកាត់ ស្រ្តីឆ្លងទន្លេមិនប្រក្រតី និងគ្រោះថ្នាក់ចរាចរណ៍ជាដើម ដោយសារបច្ចុប្បន្នគ្រោះថ្នាក់ចរាចរណ៍ បានកើតមានឡើងជារៀងរាល់ថ្ងៃ ហើយក៏ត្រូវការឈាមជារៀងរាល់ថ្ងៃផងដែរ ដើម្បីជួយដល់ពួកគាត់។

លោក ហុក គឹមចេង បានជំរុញ និងអំពាវនាវទៅកាន់ប្រជាពលរដ្ឋខ្មែរទូទាំងប្រទេស ជាពិសេសក្រុមយុវជន មេត្ដាចូលរួមបរិច្ចាគឈាមដល់អង្គភាពរបស់លោក ដើម្បីយកទៅជួយជនរងគ្រោះ អ្នកដែលត្រូវការឈាមជាចាំបាច់ ហើយសកម្មភាពទាំងនេះ ពិតជាបានចូលរួមចំណែកយ៉ាងខ្លាំង លើការជួយសង្គ្រោះជីវិតអ្នកដទៃ។

ប្រធានមជ្ឈមណ្ឌលជាតិផ្ដល់ឈាមរូបនេះ បានបន្តថា បើសិនជាគ្មានការចូលរួម ចំណែកពីសប្បុរសជនទាំងឡាយនោះ មជ្ឈមណ្ឌលក៏មិនអាចទ្រទ្រង់ និងផលិតឈាម ដោយខ្លួននោះឡើយ ដូច្នេះការចូលរួមរបស់បងប្អូន ពិតជាមានសារសំខាន់យ៉ាងខ្លាំង ហើយចំពោះការបរិច្ចាគឈាមនេះ មិនមានការប៉ះពាល់សុខភាពនោះឡើយ ដូច្នេះកុំមានការ ព្រួយបារម្ភភ័យខ្លាចក្នុងការបរិច្ចាគឈាម ព្រោះមុននឹងធ្វើការបូមឈាមចេញពីខ្លួនអ្នកបរិច្ចាគ គ្រូពេទ្យធ្វើការពិនិត្យជាមុនរួចរាល់ហើយ ថាតើសប្បុរសជនដែលបរិច្ចាគឈាមនោះ មានសុខភាពល្អ ឬអត់ ទើបអាចបូមឈាមបាន៕