(ភ្នំពេញ)៖ នៅវេលាម៉ោង៣៖៣០នាទី ថ្ងៃទី២៧ ខែមេសា ឆ្នាំ២០១៦ មានករណីគ្រោះថ្នាក់ចរាចរណ៍ បានកើតឡើងត្រង់ចំណុចមុខផ្ទះលេខ១៣ ផ្លូវ៤៧ សង្កាត់ស្រះចក ខណ្ឌដូនពេញ រវាងម៉ូតូស្គុបភីពណ៌ស ពាក់ស្លាកលេខ ភ្នំពេញ 1FH-1593 និងម៉ូតូកង់បី បើកបរបញ្ច្រាស់ទិសគ្នា បណ្ដាលឲ្យអ្នកបើកម៉ូតូស្លាប់ នៅកន្លែងកើតហេតុយ៉ាងអាណោចអាធ័ម ដោយជនរងគ្រោះ បានបែកក្បាលហូរឈាមជោកផ្លូវ ហើយដងខ្លួនដេកនៅលើម៉ូតូ មើលទៅគួរឲ្យអាសូរយ៉ាងខ្លាំង។
សមត្ថកិច្ចមូលដ្ឋានបានឲ្យដឹងថា ក្រោយបង្កគ្រោះថ្នាក់ចរាចរណ៍រួច ខាងអ្នកបើកម៉ូតូកងបីបានបើករត់គេចខ្លួនបាត់ស្រមោលតែម្តង។
បើតាមសមត្ថកិច្ចជនរងគ្រោះឈ្មោះ លី សុខជឿន អាយុ៣៧ឆ្នាំ ផ្ទះលេខ94C ផ្លូវ92 ភូមិត្រពាំងស្វាយ សង្កាត់ភ្នំពេញថ្មី ខណ្ឌសែនសុខ។
សពត្រូវបានក្រុមគ្រួសារ ដឹកយកទៅធ្វើបុណ្យតាមប្រពៃណី ចំណែកម៉ូតូត្រូវបានយកទៅរក្សាទុកនៅចរាចរណ៍ ក្រុងភ្នំពេញរង់ចាំប្រគល់ទៅឲ្យសាច់ញាតិជនរងគ្រោះ៕
