(ប៉ៃលិន)៖ នៅព្រឹកថ្ងៃទី២៦ ខែមេសា ឆ្នាំ២០១៦ លោកស្រី បាន ស្រីមុំ ក្នុងនាមអ្នកតំណាងរាស្រ្ត គណបក្សប្រជាជនកម្ពុជា មណ្ឌលប៉ៃលិន និងក្នុងនាមប្រធានគណៈកម្មាធិការ សាខាកាកបាទក្រហមកម្ពុជាខេត្ត រួមនឹងក្រុមការងារ បានអញ្ជើញជួបសំណេះសំណាល សួរសុខទុក្ខ និងពិនិត្យមើលពីស្ថានភាព ការខួងអណ្តូងស្នប់ ក្នុងភូមិសួស្តី សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ផ្តល់ជូនប្រជាពលរដ្ឋបន្ថែមទៀត ដើម្បីដោះស្រាយបញ្ហាកង្វះខាតទឹកប្រើប្រាស់​ ក្នុងរដូវប្រាំងនេះ។

ក្នុងឱកាសជួបសំណេះសំណាលនេះដែរលោកស្រី បាន ស្រីមុំ បាននាំបណ្តាំផ្ញើសួរសុខទុក្ខពីសំណាក់សម្តេចតេជោ ហ៊ុន សែន នាយករដ្ឋមន្រ្តី និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជូនប្រជាពលរដ្ឋទាំងអស់ ដោយសម្តេចសូមកុំឲ្យបងប្អូន ប្រជាពលរដ្ឋទាំងអស់ មានការព្រួយបារម្មណ៍ពីបញ្ហាកង្វះខាតទឹក ប្រើប្រាស់ក្នុងរដូវប្រាំងនេះ តាមរយៈតំណាងរាស្ត្រ គណបក្សប្រជាជនកម្ពុជា គ្រប់មណ្ឌលទូទាំង២៥រាជធានី-ខេត្ត គឺបានចុះពិនិត្យផ្ទាល់ និងបានដោះស្រាយទឹកជូនប្រជាពលរដ្ឋ គ្រប់ស្ថានភាព គ្រប់ទីកន្លែង ដោយសុខទុក្ខបងប្អូនប្រជាពលរដ្ឋកម្ពុជាទាំងអស់ ក៏ដូចជាសុខទុក្ខរបស់សម្តេច ក្នុងនាមជាប្រធានគណបក្សជាជនកម្ពុជាផងដែរ។

នាពេលនេះក្នុងនាមលោកស្រី ជាតំណាងរាស្រ្ត គណបក្សប្រជាជនកម្ពុជា មណ្ឌលប៉ៃលិន និងក្នុងនាមជាប្រធានសាខាកាកបាទក្រហមកម្ពុជាខេត្ត លោកស្រី បានដោះស្រាយបញ្ហាទឹកជូនប្រជាពលរដ្ឋ ក្នុងខេត្តជាបន្តបន្ទាប់ តាមរយៈការផ្តល់ជូននូវ ជាស្រះទឹក អណ្តូងស្នប់ និងផ្តល់ទឹកស្អាតជូនប្រជាពលរដ្ឋជាបន្តបន្ទាប់ ដោយមកដល់បច្ចុប្បន្ននេះ ស្រះទឹកសរុបចំនួន០៨ស្រះ និងអណ្តូងស្នប់សរុបចំនួន១៩អណ្តូង ដោយបានស្ថាបនាតាំងពីឆ្នាំ២០១៥ ដោយឡែកក្នុងឆ្នាំ២០១៦ អណ្តូងថ្មីបានជីក និងប្រគល់ជូនប្រជាពលរដ្ឋបានប្រើប្រាស់រួចរាល់ចំនួន ០៧អណ្តូងបន្ថែម និងបន្តជីកអណ្តូងជូនប្រជាពលរដ្ឋ ដើម្បីឲ្យមានទឹកស្អាតប្រើប្រាស់គ្រប់កន្លែងដែលខ្វះខាត ដោយមិនបានប្រកាន់ និន្នាការនយោបាយសាសនាឡើយ។

តាមប្រជាពលរដ្ឋរស់នៅខេត្តប៉ៃលិនបានឲ្យដឹងថា លោកស្រី បាន ស្រីមុំ តំណាងរាស្រ្តមួយ ដែលតែងតែគិតពីសុខទុក្ខប្រជាពលរដ្ឋ ដោយកន្លងមក និងរហូតដល់ពេលនេះ លោកស្រីឧស្សាហ៍និងខិតខំប្រឹងប្រែង ចុះជួបសំណេះសំណាលជាមួយបងប្អូនប្រជាពលរដ្ឋ រួមនឹងផ្តល់អំណោយផ្សេងៗ ដើម្បីជីវភាពរស់នៅរបស់បងប្អូន ដែលកាយវិការនេះបានធ្វើឲ្យបងប្អូនប្រជាពលរដ្ឋ ស្រឡាញ់រូបគាត់ ក្នុងនាមជាអ្នកដឹកនាំមួយរូប៕