(ភ្នំពេញ)៖ លោក ហ៊ុន ម៉ាណែត និងក្រុមការងារ បានវិលត្រឡប់មកដល់ប្រទេសកម្ពុជាវិញហើយ នៅម៉ោង១១៖៥៥នាទីព្រឹកថ្ងៃទី២៥ ខែមេសា ឆ្នាំ២០១៦នេះ។ លោក ហ៊ុន ម៉ាណែត និងក្រុមការងារ បានអញ្ជើញមកដល់ក៏មានការរៀបចំសន្និសីទសារព័ត៌មានមួយ នៅព្រលានយន្ដហោះ​អន្ដរជាតិភ្នំពេញផងដែរ ក្នុងគោលបំណងជម្រាប​ជូនអំពីលទ្ធផល ជុំវិញដំណើរទស្សន​កិច្ច​របស់លោក​ទៅកាន់​សហរដ្ឋអាមេរិក និងប្រទេសកាណាដា។ នៅព្រលានយន្តហោះគេសង្កេតឃើញវត្តមានលោកស្រី ហ៊ុន​ ម៉ាណា លោកស្រី ហ៊ុន ម៉ាលីស និងបងប្អូន សាច់ញាតិ ព្រមទាំងក្រុមការងាររបស់លោកមួយចំនួនទៀតផងដែរ ដែលរង់ចាំទទួលស្វាគមន៍របស់លោក ហ៊ុន ម៉ាណែត និងក្រុមការងារ។

សូមជំរាបថា ដំណើរទស្សនកិច្ចរបស់លោក ហ៊ុន ម៉ាណែត បុត្រាច្បងរបស់សម្តេចតេជោ ហ៊ុន សែន ដើម្បីស្វែងរកការបង្រួបបង្រួមរវាង ជាតិសាសន៍ខ្មែរ នៅក្រៅប្រទេស ត្រូវគេឃើញថា បានទទួលការ​គាំទ្រគួរកត់សម្គាល់ ក្នុងគ្រាដែលប្រជាពលរដ្ឋខ្មែរមួយចំនួន​តូចនៅក្រៅប្រទេសនោះ បានធ្វើការប្រឆាំងតវ៉ាក៏ដោយ។ លោក ហ៊ុន ម៉ាណែត បានធ្វើដំណើរឆ្លងកាត់ទ្វីបចំនួន៣ ក្នុងរយៈពេលមិន​ដល់មួយ​ឆ្នាំផងនោះទេ ដើម្បីជួបប្រជាពលរដ្ឋ​ខ្មែរ​ជាច្រើនពាន់នាក់។ ដំណើរស្វែងរកការបង្រួបបង្រួមជាតិដោយ លោក ហ៊ុន ម៉ាណែត ត្រូវគេឃើញថា បានក្លាយជាដំណើរជាប្រវត្តិសាស្ត្រប្រកបដោយជោគជ័យ ដើម្បីកុំឲ្យខ្មែរ ឈ្លោះប្រកែកគ្នា​ និងងាកមករួបរួម​សាមគ្គីភាព​គ្នា នៅក្រៅប្រទេសនោះ៕