(ភ្នំពេញ)៖ ដើម្បីរម្លឹកដល់ទិវាជ័យជម្នះលើរបបប្រល័យពូជសាសន៍ ៧មករា បណ្ណាល័យសម្តេចម៉ែ នៃមជ្ឈមណ្ឌលឯកសារកម្ពុជា បានបញ្ចេញរូបបដិមា «វីរស្ត្រីកម្ពុជា៖ មានក្តីសង្ឃឹម» មួយរូប។ រូបបដិមានេះ គឺជាស្នាដៃរបស់សិល្បករឥណ្ឌូនេស៉ី លោក នីយ៉ូមេន ណូតា ផ្តល់កិត្តិយសដល់ស្ត្រីទាំងអស់ ដែលជាអ្នករស់រានមានជីវិតពីរបបខ្មែរក្រហម អមជាមួយនឹងសាច់រឿង ផ្តល់ដោយលោក ឆាំង យុ នាយកមជ្ឈមណ្ឌលឯកសារកម្ពុជា។
សាច់រឿង ដែលអមរូបបដិមាខាងលើ មានខ្លឹមសារទាំងស្រុងយ៉ាងដូច្នេះថា៖
ក្នុងសម័យកាលដ៏ខ្មៅងងឹត ជីវិតមនុស្សហាក់ដូចជាគ្មានអត្ថន័យ។ ការសម្លាប់រង្គាលបានកើតឡើងដោយគ្មានមូលហេតុអ្វីទាល់តែសោះ។
មានតែអ្នកមានអំណាចប៉ុណ្ណោះ ដែលអាចមើលឃើញអនាគតរបស់ខ្លួន ព្រមទាំងបានប្រាថ្នាលើសពីអ្វីដែលខ្លួនត្រូវការ។ នៅពេលដែលខ្មែរក្រហមឡើងកាន់អំណាច អំពើឃោរឃៅ និងការបង្ហូរឈាមជាតិសាសន៍ខ្លួនបានកើតឡើង។
ខ្មែរក្រហមបានធ្វើឲ្យស្ត្រីជាច្រើនរស់នៅឯកោ ព្រាត់ប្រាសពីគ្រួសាររបស់ខ្លួន។ ពិភពលោកបានដឹងថា មានអំពើប្រល័យពូជសាសន៍នៅកម្ពុជា ប៉ុន្តែមានមនុស្សមួយចំនួនតូចតែប៉ុណ្ណោះ ដែលបានដឹងអំពី ការតស៊ូជំនះរាល់ឧបសគ្គរបស់ស្ត្រីទាំងនេះ ដើម្បីខ្លួនឯងនិងកូនៗរបស់ខ្លួន។
ស្ត្រីទាំងនេះ បានពើបប្រទះទុក្ខលំបាកធ្ងន់ធ្ងរជាច្រើន ប៉ុន្តែស្ត្រីនៅតែមានភាពរឹងមាំមិនងាយទ្រុឌទ្រោមពុះពារហែរឆ្លង។ ដោយប្រើប្រាស់ដៃទាំងគូរបស់ខ្លួន ស្ត្រីទាំងនេះបានកសាងគ្រួសារ និងប្រទេសជាតិរបស់ខ្លួនសាជាថ្មីឡើងវិញ។ រូបបដិមានេះ គឺជាការឧទ្ទិសដល់ស្ត្រីទាំងអស់ដែលរស់រានមានជីវិតពីរបបខ្មែរក្រហម ជាវីរស្ត្រីកម្ពុជា៕
