(ភ្នំពេញ)៖ និស្សិតមកពីសាកលវិទ្យាល័យចំនួន៩ នៅថ្ងៃ២៤ ខែមេសា ឆ្នាំ២០១៦នេះ បានចូលរួម​វេទិកា​ប្រកួតប្រជែង​ផ្នែក​តស៊ូតមតិ និងវោហាស័ព្ទ​សាធារណៈ ដែលរៀបចំដោយ​សភាយុវពាណិជ្ជករ​អន្ដរជាតិ កម្ពុជា (JCI Cambodian) នៅវិទ្យាស្ថានបច្ចេកវិទ្យាកម្ពុជា។

ប្រធានសភាយុវពាណិជ្ជករ​អន្ដរជាតិ កម្ពុជាលោក ប៉ិច បូឡែន បានថ្លែងថា កម្មវិធីប្រកួតប្រជែងនេះ បានរៀបចំឡើង​ដើម្បីជ្រើសរើស​បេក្ខជន​តំណាងកម្ពុជា ទៅចូលរួមការប្រកួត​ថ្នាក់តំបន់​អាស៊ីប៉ាស៊ីហ្វិក​នៅតៃវ៉ាន់ នាខែមិថុនា ឆ្នាំ២០១៦ខាងមុខនេះ ។

លោកបន្ដថា ចំពោះការប្រកួត​ក្នុងថ្ងៃនេះ​ក៏មាននិស្សិត​ចូលរួមជាច្រើន ដែលមកពីបណ្ដា​សាកលវិទ្យាល័យ​ជាច្រើន ដូចជា សាកលវិទ្យាល័យភូមិន្ទ​វិទ្យាសាស្ដ្រច្បាប់​​ និងសេដ្ឋកិច្ច , សាកលវិទ្យាល័យអាស៊ីអឺរ៉ុប​, ហ្សាម៉ាន់ , សាកលវិទ្យាល័យបញ្ញាសាស្រ្ដ​, ប៊ែលធី, CamEd​, សាកលវិទ្យាល័យជាតិគ្រប់គ្រង, សាកលវិទ្យាល័យភ្នំពេញអន្ដរជាតិ និងវិទ្យាស្ថានអន្ដរទ្វីបអាមេរិកាំង។

លោក បន្ថែមថា «ថ្ងៃនេះខ្ញុំសប្បាយរីករាយ​ណាស់ដោយ​មានបេក្ខជន​ចូលរួមកាន់​តែច្រើនជាមុន​ទៅទៀត ហើយម្នាក់ៗសុទ្ធតែ​មានសមត្ថភាពខ្ពស់ មិនថាចំណេះដឹងទូទៅ ឬក៏សមត្ថភាពភាសាអង់​គ្លេសនោះទេ»

គួរបញ្ជាក់ថា មកទល់នឹងពេលនេះJCI បានរៀបចំវេទិកាប្រកួតប្រជែង​រង្វាន់វោហាស័ព្ទ​ជាសាធារណៈ និងអ្នកតស៊ូ​មតិ​ឆ្នើម​ជាលើកទី៦​ហើយ ដោយកាលពីឆ្នាំ២​០១៥កន្លងទៅ យុវតី តារា រត្ន ដែលជាបេក្ខជនវេទិកា​ប្រកួតប្រជែង វោហាស័ព្ទជាសាធារណៈ​តំណាងកម្ពុជា បានទទួលបជ័យលាភី​នៅក្នុង ការប្រកួតជាលក្ខណៈ​អន្ដរជាតិ នៅកាណា​ហ្សាវ៉ាក ប្រទេសជប៉ុន ដោយមានបេក្ខជន​ចូលរួម​ចំនួន៤​តំបន់ គឺអឺរ៉ុប អាហ្វ្រិច អាមេរិក និងអាស៊ីប៉ាស៊ីហ្វិក៕