(អេក្វាទ័រ)៖ រដ្ឋាភិបាលនៃប្រទេសអេក្វាទ័រ បានចេញសេចក្ដីប្រកាសអំពាវនាវស្វែងរកថវិកាជំនួយបន្ទាន់ ក្រោយពេលជួបគ្រោះរញ្ជួយដីផ្ទួនៗ ខណៈមនុស្ស ២៦,០៩១នាក់ កំពុងស្នាក់នៅក្នុងជម្រកបណ្តោះអាសន្ន បន្ទាប់ពីអគារ ៦,៩៩៨ រងការបំផ្លាញទាំងស្រុង និង ២,៧៤០ រងការខូចខាត នេះបើយោងតាមការចេញផ្សាយរបស់ទីភ្នាក់ងារ ព័ត៌មានចិនស៊ិនហួរ ចេញផ្សាយនៅថ្ងៃទី២៣ ខែមេសា។
នៅក្នុងយុទ្ធនាការស្វែងរកថវិកានេះ រដ្ឋសភាជាតិអេក្វាទ័រ ប្រមូលបានថវិកាចំនួនជិត ៤សែនដុល្លារសហរដ្ឋអាមេរិក ស្របពេលដែលចិន បានផ្ដល់ជំនួយ ១០០,០០ ដុល្លារអាមេរិក និងសិង្ហបុរី ៦៧,០០០ដុល្លារអាមេរិក ខណៈដែល
អង្គការសហប្រជាជាតិ (UN) បានសម្រេចផ្តល់ប្រាក់ជំនួយសង្គ្រោះ ៧២,៧លានដុល្លារអាមេរិក។
ប្រធានាធិបតីអេក្វាទ័រ លោក Rafael Correa បានបញ្ជាក់ឲ្យដឹងផងដែរថា ចាប់ពីពេលនេះតទៅ ការបង់ពន្ធសម្រាប់មហាសេដ្ឋី និងពួកអ្នកជំនួញនឹងត្រូវតំឡើងថ្លៃ ហើយសម្រាប់អ្នកដែលមានប្រាក់ចំណូលលើសពី
១,០០០ដុល្លារអាមេរិក នឹងត្រូវកាត់យកថ្លៃឈ្នួលប្រាក់ខែក្នុងមួយថ្ងៃ មកចូលរដ្ឋដើម្បីធ្វើការស្ថាបនា និងកសាងប្រទេសឡើងវិញ ព្រោះបើតាមការប៉ាន់ប្រមាណ អេក្វាទ័រត្រូវការលុយ ៣ពាន់លានដុល្លារអាមេរិក ដើម្បីសាង
សង់ហេដ្ឋារចនាសម្ព័ន្ធឡើងវិញ។
នៅព្រឹកថ្ងៃនេះផងដែរថា ប្រទេសអេក្វាទ័រ បានជួបគ្រោះរញ្ជួយដីកម្រិត ៥,៨រ៉ិចទ័រ ដែលបានវាយប្រហារនៅតំបន់ភាគខាងលិច ចម្ងាយ ២៦គីឡូម៉ែត្រពីទីក្រុង Muisne ជាកន្លែងដែលធ្លាប់ទទួលរងគ្រោះរញ្ជួយដីកម្រិតធ្ងន់ ៧,៨
កាលពីសប្តាហ៍មុន ហើយនេះក៏ជាគ្រោះរញ្ជួយដីទី៣ ដែលបានវាយប្រហារប្រទេសអេក្វាទ័រ នៅក្នុងរយៈពេលត្រឹមតែមួយសប្ដាហ៍។
គួរបញ្ជាក់ផងដែរថា គិតមកដល់ពេលនេះ មានមនុស្សស្លាប់រហូតដល់ ៦០២នាក់ផងដែរ ស្របពេលដែលមនុស្សជិត ៥,៤០០នាក់រងរបួស និង១៣០នាក់ផ្សេងទៀតបន្តបាត់ខ្លួននៅឡើយ៕
