(ព្រះវិហារ)៖ ក្រុមការងារគណបក្សប្រជាជនកម្ពុជា របស់មន្ទីរសុខាភិបាលខេត្តព្រះវិហារ ចុះជួយឃុំព្រះឃ្លាំង ស្រុកត្បែងមានជ័យ ដឹកនាំដោយលោក គួង ឡូ ដោយមានការចូលរួមពីលោក ស៊ូ សិរី ប្រធានក្រុមការងារគណបក្សខេត្ត ចុះជួយស្រុកត្បែងមានជ័យ នៅព្រឹកថ្ងៃទី១៨ ខែធ្នូ ឆ្នាំ២០២១នេះ បានរៀបចំពិធីផ្តល់ភួយ ដល់លោកតា លោកយាយចំនួន ១០៣នាក់។
នៅក្នុងឱកាសនេះ លោក ស៊ូ សិរី ប្រធានក្រុមការងារគណបក្សខេត្ត ចុះជួយស្រុកត្បែងមានជ័យ បានថ្លែងជម្រាបជូនលោកយាយ លោកតា ពីការផ្តាំផ្ញើរសាកសួរសុខទុក្ខពីលោក មាស សុភា ប្រធានក្រុមការងារថ្នាក់កណ្តាលចុះជួយខេត្តព្រះវិហារ និងលោក ប្រាក់ សុវណ្ណ ប្រធានគណៈកម្មាធិការគណបក្សប្រជាជនកម្ពុជាខេត្តព្រះវិហារ ដែលជានិច្ចជាកាលលោកតែងយកចិត្តទុក្ខដាក់គិតគូរ ពីសុខទុក្ខ និងការរស់នៅរបស់ប្រជាពលរដ្ឋនៅទូទាំងខេត្តព្រះវិហារ។
លោក ស៊ូ សិរី បានលើកឡើងពីការដឹកនាំរបស់គណបក្សប្រជាជនកម្ពុជា ដែលមានសម្តេចតេជោ ហ៊ុន សែន ជាប្រធានគណបក្ស ដែលបានដឹកនាំប្រទេសជាតិឲ្យទទួលបានសុខសន្តិភាព និងការអភិវឌ្ឍគ្រប់វិស័យ។ លោកបានអំពាវនាវដល់ប្រជាពលរដ្ឋ ត្រូវចូលរួមការពារ ថែរក្សា សុខសន្តិភាពដែលមានបច្ចុប្បន្ន ឲ្យនៅគង់វង្សយូរអង្វែង ដើម្បីឲ្យប្រទេសជាតិកាន់តែមានការអភិវឌ្ឍរីកចម្រើន ពិសេសត្រូវចូលរួមគាំទ្រគណបក្សប្រជាជនកម្ពុជា គាំទ្របេក្ខភាពសម្តេចតេជោ ហ៊ុន សែន ដើម្បីបន្តដឹកនាំប្រទេសជាតិនៅអាណត្តិក្រោយៗទៀត។
ដោយឡែកលោក គួង ឡូ ប្រធានក្រុមការងារគណបក្សខេត្តចុះជួយឃុំព្រះឃ្លាំង បានថ្លែងអំពាវនាវដល់លោកយាយ លោកតា ប្រជាពលរដ្ឋ ដែលមិនទាន់បានចាក់វ៉ាក់សាំងការពារជំងឺកូវីដ១៩ សូមទៅចាក់នៅតាមទីតាំងដែលបានរៀបចំតាមមន្ទីរពេទ្យ និងមណ្ឌលសុខភាព។ ចំពោះប្រជាពលរដ្ឋដែលបានចាក់វ៉ាក់សាំងដូសមូលដ្ឋានពេញលេញរួច សូមទៅចាក់ដូសទី៣ ឬដូសជំរុញនៅតាមទីតាំង និងពេលវេលាដែលបានកំណត់។
សូមបញ្ជាក់ថា ពិធីចែកភួយដល់លោកយាយ លោកតា ចំនួន១០៣នាក់ បានធ្វើឡើងចំនួន២ទីតាំង ដែលទីតាំងទី១ ធ្វើនៅទីស្នាក់ការគណបក្សឃុំព្រះឃ្លាំង ដែលមានលោក តា លោកយាយ មកពីភូមិក្រាំងដូង និងភូមិអន្លុងស្វាយ និងទីតាំងទី២នៅភូមិ បេងកោង ដែលមានលោកតា លោកយាយមកពីភូមិបេងកោង ក្នុងនោះលោកតា លោកយាយម្នាក់ៗទទួលបាន ភួយ១ និងថវិកាចំនួន១០,០០០រៀលផងដែរ៕
