(អេក្វាទ័រ)៖ យោងតាមការចេញផ្សាយរបស់ Reuters នៅមុននេះបន្ដិចបានឲ្យដឹងថា មានគ្រោះរញ្ជួយដីថ្មីមួយទៀតកម្រិត ៦,២រ៉ិចទ័រ បានវាយប្រហារ​ទៅលើប្រទេសអេក្វាទ័រ ដោយនៅថ្ងៃសៅរ៍សប្ដាហ៍មុន អេក្វាទ័របានជួយគ្រោះរញ្ជួយដីកម្រិត ៧,៨រ៉ិចទ័រ និងបានសម្លាប់មនុស្ស ៥០៧នាក់។

គ្រោះរញ្ជួយដីថ្មីនេះ ត្រូវបានទីភ្នាក់ងារអង្កេតការស្ទង់ភូគព្ភសាស្ត្រសហរដ្ឋអាមេរិក (USGS) បានកើតឡើងដោយ​មាន​ចម្ងាយ ៧០គីឡូម៉ែត្រ ពីទីក្រុងឆ្នេរសមុទ្រ Esmeraldas និងមាន​ជម្រៅ ១០គីឡូម៉ែត្រ។

កាលពីថ្ងៃទី១៧ កន្លងទៅនេះ ប្រទេសអេក្វាទ័របានជួយគ្រោះរញ្ជួយដីកម្រិត ៧,៨រ៉ិចទ័រ ដែលបានបណ្ដាលឲ្យមាន​មនុស្សស្លាប់រហូតដល់ ៥០៧នាក់ (គិតត្រឹមល្ងាចថ្ងៃទី២០ ខែមេសា) និងរងរបួសជាង ៤,០០០នាក់ ហើយជាមួយ​គ្នានោះផងដែរ មានមនុស្ស ៤៩៩នាក់ ត្រូវបានគេស្គាល់អត្តសញ្ញាណ ក្នុងនោះមាន ១១នាក់ជាជនបរទេស ខណៈដែល​មនុស្ស ២៣០នាក់​ កំពុងបាត់ខ្លួន និង​មនុស្សប្រមាណ ២០,០០០នាក់ បានបាត់បង់ទីជម្រក។

គួរបញ្ជាក់ផងដែរថា យោងតាមការសន្និដ្ឋានរបស់រដ្ឋាភិបាលអេក្វាទ័រ បានឲ្យដឹងថា ផលប៉ះពាល់ដែលបណ្ដាល​មកពី​គ្រោះរញ្ជួយដី​ គឺជាទឹកប្រាក់មានចំនួន ប្រមាណ៣ពាន់លានដុល្លារអាមេរិក ហើយនៅពេលនេះ ក៏មានប្រទេសមួយ​ចំនួន បានផ្ដល់ជំនួយដល់អេក្វាទ័រផងដែរ ក្នុងនោះចិនផ្ដល់ប្រាក់ ១០០,០០០ ដុល្លារអាមេរិក៕