(រុស្ស៊ី)៖ នៅក្នុងដំណើរទស្សនកិច្ច នៅសហព័ន្ធរុស្ស៊ី គណៈប្រតិភូជាន់ខ្ពស់រដ្ឋសភានៃកម្ពុជា ដឹកនាំដោយសម្តេចពញាចក្រី ហេង សំរិន ប្រធានរដ្ឋសភា បានជួបពិភាក្សាការងារទ្វេភាគី ជាមួយលោក សើហ្គេ ណារីសស្គីន ប្រធានរដ្ឋសភាឌូម៉ា សហព័ន្ធរុស្សី នាសៀលថ្ងៃទី១៨ ខែមេសា ឆ្នាំ២០១៦ ដើម្បីរឹតចំណងមិត្តភាព និងកិច្ចសហប្រតិបត្តិការ រវាងរដ្ឋសភាប្រទេសទំាងពីរបន្ថែមទៀត។
ក្នុងជំនួបដ៏មានតម្លៃនោះ សម្តេចពញាចក្រី ហេង សំរិន បានវាយតម្លៃខ្ពស់ចំពោះសភាឌូម៉ា នៃសហព័ន្ធរុស្សី ដែលបានផ្តួចផ្តើមរៀបចំកិច្ចប្រជុំកម្រិត ប្រធានសភានៃតំបន់អាស៊ី-អឺរ៉ុប លើប្រធានបទមានសារៈសំខាន់ៗ សុទ្ធសឹងជាបញ្ហារួម ដែលប្រទេសទាំងអស់ត្រូវរួមគ្នាគិតគូរ ដោះស្រាយតាមរយៈកិច្ចសហប្រតិបត្តិការ យ៉ាងជិតស្និទ្ធជាមួយគ្នា។ សម្តេចប្រធានរដ្ឋសភា បានលើកឡើងថា កម្ពុជា និងរុស្ស៊ី មានទំនាក់ទំនងជាមួយគ្នាយូរមកហើយ គឺមកដល់ឆ្នាំ២០១៦នេះ គឺជាខួបលើកទី៦០ នៃទំនាក់ទំនងការទូតរវាងប្រទេសទាំងពីរ។
សម្តេចពញាចក្រី ហេង សំរិន បានគូសបញ្ជាក់ថា «ខ្ញុំសូមវាយតម្លៃថា រុស្ស៊ី គឺជាមហាមិត្តចាស់ និងជាមិត្តដ៏ល្អរបស់កម្ពុជា នៅគ្រប់កាលៈទេសៈ។ ក្នុងនាមរដ្ឋសភាកម្ពុជា ប្រជាជនកម្ពុជា និងរាជរដ្ឋាភិបាល ខ្ញុំសូមអរគុណដល់សហព័ន្ធរុស្ស៊ី ដែលបានជួយឧបត្ថម្ភ គាំទ្រដល់ប្រជាជនកម្ពុជា តាំងពីដំណាក់កាល ដែលកម្ពុជាទើបរំដោះប្រទេសជាតិ ចេញពីរបបប្រល័យពូជសាសន៍ នៅឆ្នាំ១៩៧៩។ រុស្ស៊ីបានគំាទ្រ ជួយកម្ពុជាចាប់ពីពេលនោះមក ដល់ពេលបច្ចុប្បន្ននេះ»។
នៅក្នុងជំនួបនោះដែរ លោក សើហ្គេ ណារីសស្គីន បានសម្តែងការស្វាគមន៍ យ៉ាងកក់ក្តៅចំពោះវត្តមានគណៈប្រតិភូជាន់ខ្ពស់ រដ្ឋសភានៃកម្ពុជា ដែលបានមកបំពេញទស្សនកិច្ច នៅសហព័ន្ធរុស្ស៊ី។
ប្រធានរដ្ឋសភា បានលើកឡើងថា ប្រទេសរុស្ស៊ីចាត់ទុកសម្តេចពញាចក្រី គឺជាជាបុគ្គលដ៏សំខាន់មួយរូបនៅកម្ពុជា ដែលបានចូលរួមដឹកនាំកសាង និងអភិវឌ្ឍន៍កម្ពុជា ឲ្យមានការរីកចម្រើន។ លើសពីនេះ សម្តេចជាស្ថានិកដ៏សំខាន់មួយ ក្នុងការពង្រឹង និងពង្រីកទំនាក់ទំនងកម្ពុជា និងរុស្ស៊ី ឲ្យរឹងមាំឡើងជាលំដាប់ ចាប់តាំងពីទសវត្សរ៍ ឆ្នាំ១៩៨០មក។
លោក សើហ្គេ ក៏បានសម្តែងការអរគុណ ចំពោះសម្តេច ហេង សំរិន ដែលបានដឹកនាំគណៈប្រតិភូមកចូលរួមកិច្ចប្រជុំ ថ្នាក់ប្រធានសភាអឺរ៉ុប-អាស៊ី លើកដំបូង ដែលផ្តួចផ្តើមឡើងដោយ សភាឌូម៉ាសហព័ន្ធរុស្ស៊ី និងសាធារណរដ្ឋកូរ៉េ។ កិច្ចប្រជុំនេះ ផ្តោតលើការពង្រឹងពង្រីកកិច្ចសហប្រតិបត្តិការពហុភាគី និងទេ្វភាគី រវាងសភាតំបន់អាស៊ី និងអឺរ៉ុប ដើម្បីថែរក្សាស្ថិរភាព និងសុខសន្តិភាព នៃបណ្តាប្រទេសទាំងអស់ នៅក្នុងតំបន់ និងពិភពលោក។
ប្រធានរដ្ឋសភាឌូម៉ា សហព័ន្ធរុស្ស៊ី បានបញ្ជាក់ទៀតថា កិច្ចប្រជុំប្រធានរដ្ឋសភា អឺរ៉ុប-អាស៊ី លើកដំបូងនេះ មានការចូលរួមពីសំណាក់ប្រធានសភា មកពីបណ្តាប្រទេសចំនួន១៩ប្រទេស។
ឆ្លៀតឱកាសនោះ សម្តេចពញាចក្រី ហេង សំរិន ក៏បានថ្លែងអំណរគុណ ដល់សភាឌូម៉ាសហព័ន្ធរុស្ស៊ី ដែលបានបញ្ជូនគណៈប្រតិភូ ទៅចូលរួមមហាសន្និបាតសភាតំបន់អាស៊ីលើកទី៨ ដែលសភាកម្ពុជាទទួលធ្វើជាម្ចាស់ផ្ទះ កាលពីចុងឆ្នាំ២០១៥។ ជាមួយគ្នានេះ សម្តេចបានគោរពអញ្ជើញ លោក សើហ្គេ មកបំពេញទស្សនកិច្ចនៅកម្ពុជា និងចូលរួមមហាសន្និបាតសភា តំបន់អាស៊ីលើកទី៩ នាចុងឆ្នាំ២០១៦នេះ ដែលសភាកម្ពុជានឹងធ្វើជាម្ចាស់ផ្ទះ។
ជាការលោក សើហ្គេ បានរីករាយទទួលយកការគោរពអញ្ជើញ របស់សម្តេចប្រធានរដ្ឋសភានេះទៅពិចារណា។
សូមជម្រាបជូនថា សម្ដេចពញាចក្រី ហេង សំរិន បានដឹកនាំគណៈប្រតិភូជាន់ខ្ពស់រដ្ឋសភាកម្ពុជា ចេញពីប្រទេសកម្ពុជា កាលពីល្ងាច ថ្ងៃទី១៦ ខែមេសា ក្នុងដំណើរទស្សនកិច្ចនៅសហព័ន្ធរុស្ស៊ី ដែលមានរបៀបវារៈជាសំខាន់ចំនួនពីរ គឺជំនួបពិភាក្សាការងារជាមួយថ្នាក់ដឹកនាំជាន់ខ្ពស់សភាឌូម៉ា សហព័ន្ធរុស្ស៊ី ដើម្បី រឹតចំណងមិត្តភាព និងកិច្ចសហប្រតិបត្តិ រវាងរដ្ឋសភាប្រទេសទំាងពីរកម្ពុជា-រុស្ស៊ី និងចូលរួមកិច្ចប្រជុំកំពូលប្រធានសភាអាស៊ី-អឺរ៉ុបលើកដំបូង នៅទីក្រុងម៉ូស្គូ៕
