(ភ្នំពេញ)៖​ នារីវ័យក្មេង​ម្នាក់ត្រូវបានចោរពីរនាក់ ប្រដាប់ដោយកាំភ្លើងខ្លី​ធ្វើសកម្មភាពភ្ជង់ប្លន់យកម៉ូតូ​ មួយគ្រឿងម៉ាក​ Scoopy ពណ៌សស្លាកលេខភ្នំពេញ​1CA-3281 ទៅបាត់នៅចំនុចភូមិអន្លង់កាងាន សង្កាត់ឃ្មួញខណ្ឌសែនសុខ​ នាម៉ោង៩៖៤០នាទីយប់​ ថ្ងៃទី១៦ ខែមេសា ឆ្នាំ២០១៦​នេះ​។​

នារីរងគ្រោះ​ មានឈ្មោះ​​​ ញឹម​ អុីណា​ ភេទស្រីអាយុ១៩ឆ្នាំ​ មុខរបរ​លក់ដូរ​ ហើយនារីរងគ្រោះ បានប្រាប់ថាមុនកើតហេតុ គឺរូបនាងបានជិះម៉ូតូចេញពីផ្ទះ ទៅរកម្តាយនៅឯវត្តតែពេលទៅដល់គឺម្តាយរបស់នាង បានជិះមកជាមួយអ្នកជិតខាងមុនទៅហើយ​ ពេលនោះនារីរងគ្រោះ ក៏បានជិះម៉ូតូត្រលប់មកផ្ទះវិញ​ តែជិះមកមិនទាន់ដល់ផ្ទះផងក៏លេចមុខជនល្មើសមួយក្រុមមានគ្នាជិះម៉ូតូធំមួយគ្រឿង មិនចាំម៉ាកបានគៀរអោយនាងឈប់រួចដកកាំភ្លើងខ្លី ពីចង្កេះ ធ្វើសកម្មភាពភ​ភ្ជង់ប្លន់យក​ម៉ូតូរបស់នាង ម៉ាក​ Scoopy ទៅបាត់​ ហើយនាងបន្តទៀតថាមិនមែនត្រឹមយកតែម៉ូតូទេ​ គឺជនល្មើសបានយក​លុយ២៥០ដុល្លារ​ ខ្សែករផ្លាកទិនមួយខ្សែ​ ចិញ្ចៀនមួយវង់​ និងទូរសព្ទ័ម៉ាក​ សាំសុងមួយគ្រឿងទៀតផងដែរ​។​

ហើយនាងបានបន្តទៀតថាក្រោយពីជនល្មើស បានប្លន់យកម៉ូតូ និងសម្ភារទាំងអស់នេះ ហើយពួកវាក៏ជិះម៉ូតូរបស់នាងចេញទៅបាត់​ បន្ទាប់ពីចោរចេញទៅបាត់នាងបានត្រឹមតែមកដាក់ពាក្យបណ្តឹង នៅប៉ុស្តិ៍ឃ្មួញ​​ ទាំងក្តីអស់សង្ឃឹមតែប៉ុណ្ណោះ។

សូមបញ្ជាក់ផងដែរថា ​ករណីប្លន់ខាងលើនេះសមត្ថកិច្ចខណ្ឌសែនសុខ កំពុងតែស្រាវជ្រាវ​ ថាជាករណីប្លន់មែន ឬ​ក៏យ៉ាងណានោះទេ៕