(ត្បូងឃ្មុំ)៖ នៅថ្ងៃទី១៨ ខែវិច្ឆិកា ឆ្នាំ២០២១នេះ វេលាម៉ោង ១១៖០០នាទី នៅចំណុចភូមិជ្រួយ សង្កាត់វិហារលួង ក្រុងសួង ខេត្តត្បូងឃ្មុំ មានករណីលួចទូរស័ព្ទមួយ កេីតឡេីងប្រព្រឹត្តិដោយជនសង្ស័យ ឈ្មោះ ថន សុខា ភេទស្រី អាយុ២៨ឆ្នាំ ជាតិខ្មែរ មានទីលំនៅភូមិ កើតហេតុខាងលើ បានធ្វើសកម្មភាពដេីរចូលទៅលួចយក​ទូរស័ព្ទមួយគ្រឿងម៉ាក Redmi 10 ពណ៌ខៀវ ប្រេីលេខ 086 21 62 83 របស់ជនរងគ្រោះ ឈ្មោះ រ៉ុម ស្រីពៅ ភេទស្រី អាយុ៣៨ឆ្នាំ ជាតិខ្មែរ មានទីលំនៅភូមិជាមួយគ្នា ខណៈពេលដែលជនរងគ្រោះទុកទូរស័ព្ទនៅនឹងកូនហេីយចំហរទ្វារផ្ទះ។

បើតាមចំលើយសារភាពទៅកាន់សមត្ថកិច្ច ឈ្មោះ ថន សុខា ដែលគ្រប់គ្នានិយមប្រើប្រាស់បណ្តាញសង្គម TikTok បានស្គាល់គណនីឈ្មោះ សុខា បានសារភាពថាខ្លួនពិតជាបានលួចពិតមែន ហើយយកទៅបញ្ចាំក្នុងតម្លៃ ១០មុឺនរៀល ក្នុងហេតុផលថា ជារបស់បងប្អូនឲ្យយកមកបញ្ចាំទិញបាយហូប។

បើតាមលោកវរៈសេនីយ៍ឯក ឈន សុធន អធិការក្រុងសួងឲ្យដឹងថា ក្រោយពីទទួលបានពត៌មាន ជំនាញអធិការដ្ឋាននគរបាលក្រុងសហការជាមួយ ប៉ុស្តិ៍នគរបាលរដ្ឋបាលវិហារលួង ចុះដល់កន្លែងកើតហេតុ ធ្វើការពិនិត្យអង្កេតស្រាវជ្រាវ ឃាត់ខ្លួនជនសង្ស័យ កសាងសំណុំរឿងបញ្ជូនទៅតុលាការ និងអនុវត្តតាមនីតិវិធី៕