​(ប៉ៃលិន​)៖ ​មន្ត្រី​សាខាកាំកុងត្រូលខេត្តប៉ៃលិន សហការជាមួយមន្ទីរពាណិជ្ជកម្មខេត្ត នៅថ្ងៃទី១០​ ដល់១២ ខែមេសា​ ឆ្នាំ២០១៦​នេះ ចុះត្រួតពិនិត្យគុណភាព សុវត្ថិភាពម្ហូបអាហារតាំងលក់ នៅតាមគេហដ្ឋាន ស្ថិតក្នុងភូមិបឹងព្រលិត និងភូមិរថក្រោះឆេះ ឃុំស្ទឹងកាច់ ស្រុកសាលាក្រៅ ខេត្តប៉ៃលិន។

លោក សាន​ វិជ្ជាសារ៉ាវុធ​ ប្រធា​នសាខាកាំ​កុងត្រូល​ ខេត្តប៉ៃលិន ​បានឲ្យភ្នាក់ងារ Fresh News ថា​ មុខថ្ងៃបុណ្យចូលឆ្នាំថ្មី​ ឈានចូលមកដល់​ ហើយក៏ជាឱកាស​របស់ឈ្មួញ​ខិលខូច​លួចបន្លំ​ នាំចូលពីប្រទេសជិតខាង ​​យកមក​ដាក់តាំងលក់​នៅលើទីផ្សារ​ ដែរពលរដ្ឋខ្លះ​មិន​បានយល់ដឹង​ពីមុខម្ហូបអាហារ​ ឬទំនិញណាគ្មានគុណភាព​នោះឡើយ​ ដូច្នេះហើយក្នុងនាមជាមន្ត្រីជំនាញ តែងតែចុះត្រួតពិនិត្យជាញឹកញាប់​។

លោកបន្តថា បច្ចុប្បន្ននេះមន្ត្រីជំនាញតែងតែប្រឹងប្រែង ទប់ស្កាត់បទល្មើស​យ៉ាងណា ក៏មានការបង្ហូរចូលតាមច្រករបៀង​ ជាពិសេសនេះនាឱកាសបុណ្យចូលឆ្នាំថ្មី​ ឈ្មួញខិតខូចឆ្លាតឱកាស​បាន​តែយ៉ាងណាមន្ត្រីនៅតែបន្ត​ដដែល។

លោកបានបន្ថែមថា ​មន្ត្រីជំនាញបានរឹបអូសបានផលិតផល ម្ហូបអាហារខូចគុណភាពជាច្រើនមុខ យកមករក្សាទុកនៅស្នាក់ការកាំកុងត្រូលខេត្ត ដើម្បីចាត់ចែងតាមនីតិវិធីច្បាប់៕