(ភ្នំពេញ)៖ អ្នកនាំពាក្យក្រសួងយុត្តិធម៌ បានអះអាងប្រាប់ថា ការចាប់ខ្លួន លោក អ៊ុំ សំអាន តំណាងរាស្រ្តគណបក្សសង្រ្គោះជាតិ គឺយោងទៅតាម បទល្មើសជាក់ស្តែង ដែលមិនចាំបាច់មានការដកអភ័យឯកសិទ្ធិនោះ ហើយថា បើការលុបចោលការចាប់ខ្លួននេះ អាចធ្វើទៅបានលុះត្រាតែ មានសំឡេង៣/៤ នៅក្នុងរដ្ឋសភា។

ការអះអាងរបស់អ្នកនាំពាក្យក្រសួងយុត្តិធម៌នាពេលនេះ បានធ្វើឡើងបន្ទាប់ពីគណបក្សសង្រ្គោះជាតិ បានចេញសេចក្តីថ្លែងការណ៍មួយ ចោទថា ការចាប់ខ្លួនតំណាងរាស្រ្ត លោក អ៊ុំ សំអាន គឺជារឿងរំលោភច្បាប់។ គណបក្សនេះក៏បានទាមទារឱ្យមានការដោះលែង តំណាងរាស្រ្តរបស់ខ្លួន វិញផងដែរ។

សូមជំរាបថា លោក អ៊ុំ សំអាន តំណាងរាស្រ្តគណបក្សសង្រ្គោះជាតិ ត្រូវបានសមត្ថកិច្ចចាប់ខ្លួន នៅខេត្តសៀមរាប កាលពីម្សិលមិញ បន្ទាប់ពីលោកត្រឡប់ពីអាមេរិក មកដល់ប្រទេសកម្ពុជា។ លោកត្រូវបានចាប់ខ្លួននៅម្តុំផ្សារកណ្តាល សង្កាត់ស្វាយដង្គំ ក្រុងសៀមរាប នៅពេលលោកចុះដកលុយនៅទូរ ATM របស់ធនាគារ។ សមត្ថកិច្ច បានបញ្ជាក់ថា លោក អ៊ុំ សំអាន ត្រូវបានចាប់ខ្លួននៅលើទឹកដីខេត្តសៀមរាប ពីបទប្រើប្រាស់ផែនទីក្លែងក្លាយ ដូចករណីលោក ហុង សុខហួរ ដែរ៕