(ក្រចេះ)៖ កម្លាំងនគរបាលក្រុងក្រចេះ បានឃាត់ខ្លួនក្មេងទំនើង២ក្រុម មានបក្ខពួកចំនួន០៨នាក់ ក្នុងនោះមានស្រីម្នាក់ ពាក់ព័ន្ធករណីប្រើប្រាស់ អំពើហិង្សាដោយចេតនា (ស្ថានទម្ងន់ទោស) និងធ្វើឱ្យខូចខាតដោយចេតនា។ ហេតុការណីនេះបានកើតឡើង នៅយប់ថ្ងៃទី៤ ខែវិច្ឆិកា ឆ្នាំ២០២១ នៅចំណុចបឹងហ្គាឡូ ភូមិក្រចេះ សង្កាត់ក្រចេះ ក្រុងក្រចេះ។

យោងតាមរបាយការណ៍របស់នគរបាលបានឱ្យដឹងថា ជនសង្ស័យជាក្មេងទំនើងទាំង៨នាក់នេះរួមមាន៖

ទី១៖ ឈ្មោះ ញ៉ឹម ពុត្ថា ហៅម៉ៅ ភេទប្រុស អាយុ១៨ឆ្នាំ មានទីលំនៅភូមិអូរឬស្សី១ សង្កាត់អូរឬស្សី ក្រុងក្រចេះ ខេត្តក្រចេះ។
ទី២៖ ឈ្មោះ ចាន់ វាសនា ភេទប្រុស អាយុ១៩ឆ្នាំ មានទីលំនៅភូមិអូរឬស្សី២ សង្កាត់អូរឬស្សី ក្រុងក្រចេះ ខេត្តក្រចេះ
ទី៣៖ ឈ្មោះ ឈុន រុងរឿង ហៅ វី ភេទប្រុស អាយុ១៧ឆ្នាំ មានទីលំនៅភូមិស្រែស្តៅ សង្កាត់អូរឬស្សី ក្រុងក្រចេះ ខេត្តក្រចេះ
ទី៤៖ ឈ្មោះ លូត លុច ភេទប្រុស អាយុ១៦ឆ្នាំ មានទីលំនៅភូមិត្រូន ឃុំក្បាលដំរី ស្រុកសំបូរ ខេត្តក្រចេះ។
ទី៥៖ ឈ្មោះ តាំង វ៉ាន់ឌី ភេទប្រុស អាយុ២៦ឆ្នាំ មានទីលំនៅភូមិចង្ហប ឃុំក្បាលដំរី ស្រុកសំបូរ ខេត្តក្រចេះ។
ទី៦៖ ឈ្មោះ អេត សុខន ភេទប្រុស អាយុ២០ឆ្នាំ មានទីលំនៅភូមិជើងពាត ឃុំសំបូរ ស្រុកសំបូរ ខេត្តក្រចេះ។
ទី៧៖ ឈ្មោះ ម៉ៃ ម៉ាឡែត ភេទប្រុស អាយុ១៩ឆ្នាំ
និងទី៨៖ ឈ្មោះ ម៉ៃ ម៉ាឡេ ភេទប្រុស អាយុ២១ឆ្នាំ មានទីលំនៅភូមិថ្មគ្រែលើ ឃុំថ្មគ្រែ ស្រុកចិត្របុរី ខេត្តក្រចេះ។

បើតាមសមត្ថកិច្ចមូកដ្ឋាន បានឱ្យដឹងថា នៅថ្ងៃទី០៤ ខែវិច្ឆិកា ឆ្នាំ២០២១ ម៉ោងជាង២០ មានក្មេងស្ទាវចំនួន១ក្រុម (ក្រុមទី១) រួមមាន៖ ឈ្មោះ ចាន់ វាសនា, ឈ្មោះ ញ៉ឹម ពុត្ថា, ឈ្មោះ ឈុន រុងរឿង និងបក្ខពួកចំនួន០២នាត់ទៀត (កំពុងស្រាវជ្រាវអត្តសញ្ញាណ) បានធ្វើសកម្មភាពជិះម៉ូតូកាន់ជំពាមកៅស៊ូបាញ់អ្នកធ្វើដំណើរតាមផ្លូវ ពេលជិះមកដល់ត្រង់ចំណុចមុខសាលាខេត្ត ក៏បានជួបក្មេងស្ទាវមួយក្រុមទៀតរួមមាន៖ ឈ្មោះ លូត លុច, ឈ្មោះ តាំង វ៉ាន់ឌី, ឈ្មោះ អេត សុខន, ឈ្មោះ ម៉ៃ ម៉ាឡែត និងឈ្មោះ ម៉ៃ ម៉ាឡេ ពេលនោះក្មេងស្ទាវក្រុមទី១ បានជិះម៉ូតូដេញតាមក្មេងស្ទាវក្រុមទី២ មកដល់ចំណុចបឹងហ្គាឡូ ស្រាប់តែក្មេងស្ទាវក្រុមទី១ យកជំពាមកៅស៊ូបាញ់ទៅលើក្មេងស្ទាវក្រុមទី២ ភ្លាមៗនោះដែរក្មេងស្ទាវក្រុមទី២ បានកាន់ខ្សែក្រវ៉ាត់ និងគប់ដុំថ្មទៅលើក្មេងស្ទាវក្រុមទី១វិញ និងបានជិះម៉ូតូដេញតាមវាយក្មេងស្ទាវក្រុមទី១ រហូតមកដល់ត្រង់ចំណុចទំនប់ ពេលនោះក្មេងស្ទាវក្រុមទី១ រត់ចូលក្នុងតូបលក់ឥវ៉ាន់ឱ្យគេជួយ ស្រាប់តែក្មេងស្ទាវក្រុមទី២ ចូលទៅតាមវាយក្មេងស្ទាវក្រុមទី១ បណ្តាលឱ្យរងរបួស។

នគរបាលបញ្ជាក់ថា ក្រោយពេលទទួលបានព័ត៌មានភ្លាម កម្លាំងនគរបាលបានចុះអន្តរាគមន៍ និងចាប់ឃាត់ខ្លួនជនសង្ស័យភ្លាមៗតែម្តង និងដកហូតបាន៖ ម៉ូតូចំនួន០៣គ្រឿង, ទូរសព្ទចំនួន០៦គ្រឿង, ជំពាមកៅស៊ូចំនួន០១ និងឥដ្ឋចំនួន០២កំណាត់។

បច្ចុប្បន្នជនសង្ស័យ និងវត្ថុតាងខាងលើកំពុងឃាត់ខ្លួន និងរក្សាទុកជាបណ្តោះអាសន្ននៅអធិការដ្ឋាននគរបាលក្រុងក្រចេះ ដើម្បីបំពេញនីតិវិធីបញ្ជូនសំណុំរឿងទៅតុលាការចាត់ការតាមនីតិវិធីច្បាប់៕