(កណ្តាល)៖ មន្រ្តីកងរាជអាវុធហត្ថស្រុកលើកដែក ខេត្តកណ្តាល ដឹកនាំដោយលោកវរសេនីយ៍ត្រី ប្រាក់ សាមិត្ត មេបញ្ជាការកងរាជអាវុធហត្ថស្រុក បាននាំយកនូវ អំណោយមួយចំនួន ទៅប្រគល់ជូនលោកយាយម្នាក់ ដែលជាចាស់ជរា នៅក្នុងឱកាសបុណ្យចូលឆ្នាំថ្មីប្រពៃណីជាតិ នាពេលខាងមុខនេះ។
អំណោយដែល លោកមេបញ្ជាការ អាវុធហត្ថស្រុកនិងសហការី នាំយក ទៅជូនលោកយាយនោះ រួមមានថវិកាចំនួន១៥០ ០០០រៀល អង្ករចំនួន១បាវ មី១កេះ ទឹកសុទ្ធ១កេះ ត្រីខកំប៉ុង១យួរ យកទៅជូនលោក យាយណម អាយុ៩៨ឆ្នាំ ដែលជាចាស់ជរារស់នៅ ភូមិក្បាលជ្រោយ ឃុំកំពង់ភ្នំ ស្រុកលើកដែក ខេត្តកណ្ដាល នៅវេលាម៉ោង ៨និង៣០នាទីថ្ងៃទី ៩ ខែមេសា ឆ្នាំ២០១៦នេះ។
ថ្លែងនៅក្នុងឱកាសនោះ លោកប្រាក់ សាមិត្ត បានលើកឡើងថា ដោយមានការចង្អុលបង្ហាញ និងណែនាំពី លោកឧត្តមសេនីយ៍ត្រី សំ តុលា មេបញ្ជាការកងរាជអាវុធហត្ថខេត្តកណ្ដាល ឲ្យកងរាជអាវុធហត្ថនៅតាមបណ្ដាលស្រុក និងស្នាក់ការទាំងអស់ ត្រូវយកចិត្តទុកដាក់ការពារសន្តិសុខ សណ្ដាប់ធ្នាប់សាធារណៈជូនប្រជាពលរដ្ឋ ជាពិសេសក្នុងឱកាសបុណ្យចូលឆ្នាំថ្មី ប្រពៃណីជាតិខាងមុខនេះ។
លោក ប្រាក់ សាមិត្ត បានបន្តថា ការចែកអំណោយនេះ បានធ្វើឡើង បន្ទាប់ពីទទួលបានព័ត៌មាន ថាលោកយាយខាងលើជាជនចាស់ជរា ក្រីក្រនៅក្នុងភូមិនោះ ទើបលោកនិងសហការីចាត់ ចែងនាំយកអំណោយមកជូនគាត់នៅពេលនេះ សម្រាប់ដោះស្រាយការលំបាក បានមួយគ្រាផងដែរ៕
