(បន្ទាយមានជ័យ)៖ នាព្រឹកថ្ងៃទី៩ ខែមេសា ឆ្នាំ២០១៦នេះលោកឧបនាយរដ្ឋមន្រ្តី កែ គឹមយ៉ាន ប្រធានក្រុមការងារថ្នាក់ជាតិចុះខេត្តបន្ទាយមានជ័យ អមដំណើរជាមួយ លោក សួន បវរ អភិបាលខេត្តបន្ទាយមានជ័យ លោកស្នងការ មេបញ្ជាការអាវុធហត្ថ បានចុះមកសួរសុខទុក្ខនិងចែកអំណោយនៅទីបញ្ជាការកងរាជអាវុធខេត្ត ដល់យុវជនកំពុងអប់រំស្តារនិតិសម្បទាផ្តាច់គ្រឿងញៀន ចំនួន១៧៨នាក់ និងមណ្ឌលភ្នំបាក់ចំនួន២៤៧នាក់។
លោកឧត្តមសេនីយ៍ត្រីឱ បូរិន្ទ បានឲ្យដឹងថា អាវុធហត្ថខេត្តចាប់ពីឆ្នាំ២០០២ មកទល់សព្វថ្ងៃនេះសរុបមានចំនួន៣០៣៩នាក់ បន្សាបគ្រឿងញៀន ហើយឲ្យវិលត្រឡប់ទៅផ្ទះវិញ មានចំនួន២៨៦១នាក់នៅសល់ជាក់ស្តែង១៧៨នាក់ កំពុងតែធ្វើការបន្សាបបន្ត។
យុវជនផ្តាច់គ្រឿងញៀនទាំងអស់នោះជាមន្ត្រីរាជការ២នាក់ សិស្ស១៥នាក់អាជីវករ៤៤នាក់ កម្មករ១០នាក់ យុវជនគ្មានមុខរបរ ៣២នាក់ និងយុវជនធម្មតា៦៤នាក់យុវជនទាំងអស់នេះ មានកម្មវិធីអប់រំកាយសម្បទាមានដូចជា ការហាត់ប្រាណ និងធ្វើពលកម្មផ្សេង ដើម្បីឲ្យចេញសារធាតុពុល ក្នុងសារពាង្គកាយ អប់រំចិត្តសាស្ត្រ មានដូចជាអប់រំផ្លូវចិត្ត ការធ្វើប្រឹក្សា ការអប់រំច្បាប់ ការអប់រំអំពីផលប៉ះពាល់នៃការប្រើប្រាស់គ្រឿងញៀន អេដស៍ និងជម្ងឺផ្សេងៗទៀត ការអប់រំអំពីសីលធម៌ សុជីវធម៌ និងគុណធម៌ក្នុងការរស់នៅក្នុងសង្គម។
លោកឧបនាយករដ្ឋមន្រ្តី កែ គឹមយ៉ាន បានធ្វើការផ្តាំផ្ញើដល់យុវជនទាំងអស់ ក្រោយចេញពីកន្លែងមណ្ឌលផ្តាច់គ្រឿងញៀនហើយនោះ ត្រូវចេះកែខ្លួន ឲ្យបានល្អដើម្បីប្រែក្លាយខ្លួន ទៅជាកូនល្អ មនុស្សល្អ និងជាធនធានមនុស្ស ដែលប្រទេសជាតិចង់បានជាទីបំផុត។
ក្នុងឱកាសនោះដែរ លោកឧបនាយករដ្ឋមន្រ្តី កែ គឹមយ៉ាន បានផ្តាំផ្ញើដល់កងកំលាំងអាវុធហត្ថទាំងអស់ ត្រូវយកចិត្តទុកដាក់ការពារសន្តិសុខសណ្ដាប់ធ្នាប់ ជូនប្រជាពលរដ្ឋ ក្នុងឱកាសបុណ្យចូលឆ្នាំខ្មែរ នាពេលខាងមុខនេះផងដែរ។
ក្នុងនោះលោកឧបនាយកបានផ្តល់អំណោយ អំណោយរួម យុវជនមណ្ឌលភ្នំបាក់ចំនួន២៤៧នាក់ទទួលបាន៖ ស្ករស ២៤៧ គីឡូក្រាម, ត្រីខ ២៤៧កំប៉ុង, ទឹកក្រូច ៤៩៤កំប៉ុង, មី ៤៩៤កញ្ចប់, ទឹកដោះគោខាប់ ២៤៧កំប៉ុង, ទឹកសុទ្ធ ៤៩៤ដប, និងថវិកា៦លានរៀល។ ដោយឡែកអំណោយសំរាប់យុវជនផ្ដាច់គ្រឿងញៀន នៅអាវុធហត្ថ៖ ស្ករស ១៧៨គីឡូក្រាម, ត្រីខ ១៧៨កំប៉ុង, ទឹកក្រូច ៤៥៦កំប៉ុង, មី ៤៥៦កញ្ចប, ទឹកដោះគោខាប់ ១៧៨កំប៉ុង, ទឹកសុទ្ធ ៤៥៦ដប, និងថវិកា៦លានរៀល, ចំណែកគ្រួសារយុវជនចំនួន១០គ្រួសារក្នុង១គ្រួសារ ទទួលបានថវិកា២ម៉ឺនរៀល៕
