(បន្ទាយមានជ័យ)៖ លោកឧបនាយករដ្ឋមន្ត្រី កែ គឹមយ៉ាន បានថ្លែងទៅកាន់ប្រជាពលរដ្ឋរស់នៅ ក្នុងស្រុកមង្គលបូរីថា បច្ចុប្បន្ននេះក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានធ្វើឲ្យប្រទេសកាន់តែរីកចំរើន ជាបន្តបន្ទាប់គ្រប់វិស័យ ហើយសម្រាប់ខេត្តបន្ទាយមានជ័យ ប្រជាពលរដ្ឋទាំងអស់ នឹងលែងមានដំបូងស្បូវទៀតឡើយ ពោលប្រែក្លាយប្រកស័ង្កសីទាំងអស់តែម្តង(សម្រាប់ផ្ទះដែលប្រកស្បូវ)។ ជាមួយគ្នានេះ លោកឧបនាយករដ្ឋមន្ត្រី កែ គឹមយ៉ាន បានជម្រុញឲ្យមន្ត្រីក្រុមការងារថ្នាក់ជាតិ ថ្នាក់ខេត្ត ថ្នាក់ស្រុក ចុះជួយមូលដ្ឋានត្រូវប្រើកម្លាំងសរុបចុះជួយជួសជុល ឬសាងសង់ប្តូរផ្ទះប្រកស្លឹក ឬស្បូវជូនពលរដ្ឋក្រីក្រ ឲ្យបានរួចរាល់ទាំងស្រុងយ៉ាងយូរត្រឹមថ្ងៃទី១០ ខែមេសា ឆ្នាំ២០១៦ ឬឲ្យបានមុនពិធីបុណ្យចូលឆ្នាំខ្មែរខាងមុខនេះ។
លោកឧបនាយករដ្ឋមន្ត្រី ចុះជួយខេត្តបន្ទាយមានជ័យរូបនេះ បានលើកឡើងនៅក្នុងពិធីសំណេះសំណាល និងប្រគល់ផ្ទះជូនពលរដ្ឋក្រីក្រ ដែលបានប្តូរដំបូលស្បូវ ទៅសង្ក័សីចំនួន២៣៦ខ្នងផ្ទះ នៅស្រុកមង្គលបូរី ធ្វើនៅសាលាបឋមសិក្សាបន្ទាយនាង ឃុំបន្ទាយនាង នៅរសៀលថ្ងៃទី០៨ ខែមេសា ឆ្នាំ២០១៦។
លោកបានថ្លែងថា ក្រៅពីការងារមានភារកិច្ច ដែលទទួលខុសត្រូវចំពោះមុខតាមដែនសមត្ថកិច្ច ភូមិសាស្ត្ររបស់ខ្លួនថ្នាក់ដឹកនាំ និងមន្ត្រីក្រុមការងារទាំងអស់ ត្រូវតែប្រើកម្លាំងសរុប វិធានការសរុប ចុះសម្រុកជួសជុល សាងសង់ប្តូរផ្ទះប្រក ឬស្លឹកទៅជាស័ង្កសី ជូនពលរដ្ឋក្រីក្រ ឲ្យរួចរាល់ទាំងស្រុង ដើម្បីឲ្យពួកគាត់ មានជម្រកស្នាក់នៅ សមរម្យ និងបានរីករាយបំផុត ក្នុងឱកាសបុណ្យចូលឆ្នាំខ្មែរដ៏ខ្លីខាងមុខនេះ។
សម្រាប់ពលរដ្ឋបានចំនួន២៣៦គ្រួសារ ទទួលបានកន្ទេល១ ម៉ុង១ ឆ្នាំងបាយ១ ចានបាយ១ឈុត ទឹកស៊ីអ៊ិវ ទឹកត្រី អំបិល ប៊ីចេង នំធុង សារុង១ ក្រមា១ និងថវិកាមួយចំនួន។ សម្រាប់ពលរដ្ឋដែលនិវត្តន៍ជន និងអតីតយុទ្ធជនទទួលបានសារុង១ វែនតា១ និងថវិកាមួយចំនួន។ ដោយឡែកប្រជាពលរដ្ឋ ដែលបានចូលរួមចំនួន៦៥០នាក់ ម្នាក់ៗទទួលបានសរុង១ និងថវិកាមួយចំនួនផងដែរ។ នៅក្នុងពិធីនេះក៏មានការអញ្ជើញចូលរួមផងដែរ ពីថ្នាក់ដឹកនាំខេត្ត កងកម្លាំងប្រដាប់អាវុធហត្ថ និងមន្រ្តីរាជការជាច្រើននាក់ផ្សេងទៀត៕
