(កំពង់ស្ពឺ)៖ នៅរសៀលថ្ងៃទី៥ ខែមេ​សា ឆ្នាំ២០១៦នេះ​ លោកឧត្តមសេនីយ៍ឯក ប្រាក់ សិទ្ធ មេបញ្ជា​ការរងកងរាជអាវុធហត្ថលើផ្ទៃប្រទេស​ តំណាងរបស់​នាយឧត្តមសេនីយ៍ សៅ​ សុខា មេបញ្ជាការកងរាជអាវុធហត្ថលើផ្ទៃប្រទេស និងលោកចាន់ ដារា អភិបាលរង​ខេត្តកំពង់ស្ពឺ​ បានអញ្ជើញប្រកាសដំឡើងឋា​នន្តរស័ក្តិ និងប្រកាសតែងតាំងផ្លាល់ប្តូរមុខងារ ជូនមន្ដ្រីកងរាជអាវុធហត្ថខេត្ត ដែលមានស្នាដៃក្នុការបំពេញភារកិច្ច និងបំរើប្រជាពលរដ្ឋបានល្អនាពេលកន្លងមក។

លោកឧត្តមសរនីយ៍ឯក ប្រាក់ សិទ្ធ​ បានថ្លែងថា បញ្ជាការ​ដ្ឋានអាវុធហត្ថខេត្តកំពង់ស្ពឺ មានភាពរីកចំ​រើនច្រើនទាំងការដឹកនាំអង្គភាព​ ផ្នែកហេដ្ឋារចនាសម្ព័នក្នុងអង្គ​ភាព​ និងការបង្ក្រាបរាល់បទ​ល្មើសគ្រប់រូបភាព។ លោកបន្ត​ថា ការយឺតយ៉ាវក្នុងប្រកាសតួនាទីដល់កងកម្លាំងអាវុធហត្ថ យើង​ដោយសារតែបញ្ហាបច្ចេកទេស និងការកែសម្រួលរបស់ថ្នាក់លើ។ លោកបន្តថា ការស្នើសុំ​ដំឡើងឋានន្តរស័ក្ក និងតួនាទី​ដល់កងកំលាំងកងរាជអាវុធហត្ថបច្ចប្បន្នថ្នាក់លើមានការតឹងតែងខ្លាំង ពាក់ព័ន្ធលើឯកសារ ប្រវត្តិ​រូបដូចជាការប្រើអក្ខរាវិរុទ្ធជាដើម។

ឧត្តមសេនីយ៍ត្រី ជួ សារុន មេបញ្ជាការអាវុធហត្ថខេត្តកំពង់ស្ពឺ បានថ្លែងថា មន្ត្រីរាជអាវុធហត្ថត្រូវបានប្រកាសតែងតាំងមានចំនួន៣៥នាក់ ក្នុងនោះរួមមាន​៖ ត្រូវបំពាក់ឋានន្តរស័ក្កចំនួន៤នាក់​ ថ្នាក់វរ:សេនីយ៍ឯក២នាក់ វរ:សេនីយ៍ទោ១នាក់ និងវរ:សេនីយ៍១នាក់ ព្រមទាំងចំនួន ៣១នាក់ទៀត ត្រូវបានប្រកាស់តែងតាំងព្រមទាំងផ្លាស់ប្តូរមុខងារភារកិច្ច ថ្នាក់មេបញ្ជាការរង២នាក់ នាយលេខាធិការដ្ឋាន១នាក់ នាយរងសេនាធិការ៥នាក់ ប្រធានមន្ទីរ៣នាក់ អនុប្រ​ធាន​មន្ទីរ១នាក់ នាយ​ការិយា​ល័យ១០​​នាក់ មេបញ្ជាកររង​ក្រុង ស្រុក៤នាក់ ជំនួយការឃ្លាំង១​​នាក់ និងបុគ្គលិកឃ្លាំង២នាក់។

លោកបានបញ្ជាក់បន្ថែម​ថា កម្លាំងក្នុងបញ្ជាការដ្ឋាន ខេត្តកំពង់ស្ពឺមានចំនួនសរុប ១៩៧នាក់ នាយទាហាន១២២នាក់ នាយទាហានរង៧៥នាក់ ស្រី៤នាក់ និងកម្លាំងអនុសេនាធំចល័តចំនួន៤៧នាក់ បេសកម្មជាមួយអង្គ​ការវ៉ាយអេត៣នាក់ ឈឺសម្រាក់នៅផ្ទះ២នាក់។ ក្នុងនោះស្នើរសុំតែងតាំងផ្លាស់ប្តូរមុខងារ និងដំឡើងឋានន្តរស័ក្ក​ជូន​ នាយទាហានរង​ នៃ បញ្ជាការដ្ឋានខេត្តរួម​មាន៖​​ ស្នើរសុំតែងតាំងមុខងារ១៧នាក់ ស្នើរដំឡើងឋានន្តរស័ក្ក៤៣នាក់ និងស្នើរសុំតែងតាំងផ្លាស់ប្តូរ ព្រមទាំងដំឡើងឋានន្តរស័ក្ក៣៦នាក់។

លោកចាន់ ដារា បានឲ្យដឹងថា មន្ត្រីកងរាជអាវុធហត្ថដែលត្រូវបានកងយុទ្ធពលខេមរភូមិន្ទផ្តល់សេចក្តីទុកចិត្ត និង​សម្រេចបំពាក់ឋា​នន្ត​រស័ក្តិនា ពេលនេះ​ត្រូវតែយកចិត្តទុកដាក់បំរើប្រជាពលរដ្ឋគ្រប់មជ្ឈដាន មិនត្រូវប្រើតួនាទីរបស់ខ្លួនទៅគាបសង្កត់ប្រជាពលរដ្ឋ ស្លូតត្រង់ឡើយ។ លោកបន្តថា​ នាយទាហាន ​នាយទាហានរង កងរាជអាវុធហត្ថ​គ្រប់រូប ត្រូវគោរពភារកិច្ច និងវិជ្ជាជីវ:កងកម្លាំងប្រដាប់អាវុធ ត្រូវសហការល្អជាមួយអាជ្ញាធរ​គ្រប់គ្រប់លំដាប់ថ្នាក់ និងកងកម្លាំងពាក់ព័ន្ធផ្សេងៗទៀត ជាពិសេសរួមសហការគ្នា ដើម្បីទប់ស្កាត់ការប៉ុនប៉ងធ្វើបដិវត្តន៍ពណ៌ ផ្តួលរំលំរាជរដ្ឋាភិបាលស្របច្បាប់ពីសំណាក់ជនឱកាសនិយមមួយក្តាប់តូច៕