(ភ្នំពេញ)៖ អភិបាលខណ្ឌដូនពេញលោក គួច ចំរើន បានចេញមកការពារក្រុមសន្តិសុខរបស់ខ្លួនថា មិនបានបង្កអំពើហិង្សា ទៅក្រុមសហជីពមុននោះទេ ផ្ទុយទៅវិញគឺក្រុមសហជីពបានវាយសន្តិសុខ២នាក់ មួយដៃមុនរហូតមានការប៉ះទង្គិចគ្នា បណ្តាលឲ្យមានរងរបួសយ៉ាងដូច្នេះ។

សូមបញ្ជាក់ថា នៅព្រឹកមិញ ក្រុមសហជីពដឹកនាំដោយលោក អាត់ ធន់ លោក វ៉ន ពៅ និងលោក ហ្វា សាលី ជាដើមបានដឹកនាំក្រុមសហជីព ព្រមទាំងក្រុមកម្មករជាច្រើន នាក់ទៅតវ៉ានៅមុខរដ្ឋសភា ដើម្បីសុំឲ្យមានកែប្រែច្បាប់ការងារ និងសហជីពមួយចំនួន ប៉ុន្តែការតវ៉ានេះ បានធ្វើឲ្យមានការប៉ះទង្គិចគ្នាមួយប្រាវ បណ្តាលឲ្យរបួសមន្រ្តីសហជីពម្នាក់។ ក្រោយមានហេតុការណ៍នេះកើតឡើង ស្រាប់តែមានការលើកឡើងជាបន្តបន្ទាប់របស់ក្រុមសហជីពថា ក្រុមសន្តិសុខសាលាខណ្ឌដូនពេញ ជាអ្នកបង្ករឿងមុន និងបានប្រើអំពើហិង្សាទៅលើពួកគេ។

ក្រោយទទួលបានការចោទប្រកាន់បែបនេះ លោក គួច ចំរើន អភិបាលខណ្ឌដូនពេញ បានចេញមកបដិសេធ និងបកស្រាយភ្លាមៗ កុំឲ្យមានការភ័ស្តច្រឡំ ហើយថាក្រុមអាជ្ញាធរ និងក្រុមសន្តិសុខរបស់លោក មានតួនាទីរក្សាសន្តិសុខ និងសណ្តាប់ធ្នាប់ នៅខាងមុខរដ្ឋសភា ខណៈសភាកំពុងប្រជុំពេញអង្គ។ លោក គួច ចំរើន បានបញ្ជាក់ថា «នៅវេលាម៉ោង៩ព្រឹកមិញ កម្លាំងប្រជាការពារខណ្ឌដូនពេញ បានចុះរៀបចំសណ្តាប់ធ្នាប់ នៅជំវិញសម្តេចសង្ឃ ជួន ណាត ដើម្បីកុំឲ្យបងប្អូន សហជីព និងសហគមន៍ផ្សេងៗ មកធ្វើការតវ៉ានៅមុខរដ្ឋសភា»។

លោកអភិបាលខណ្ឌបានលើកឡើងទៀតថា ជាពិសេសក្រុមសហជីពកម្មករ ដែលដឹកនាំដោយ លោក អាត ធន់ លោក វន ពៅ មកឈររាំងបិតបារ៉ាស់ផ្លូវចូលរដ្ឋសភាជាតិ ដែលសភាកំពុងប្រជុំពេញអង្គ ដូច្នេះកម្លាំងប្រជាការពារខណ្ឌ ក៏បានចុះទៅរៀបចំសន្តិសុខ សណ្តាប់ធ្នាប់ កុំឲ្យពួកគាត់ឈរបិតបារ៉ាស់ សូមឲ្យពួកគាត់នាំគ្នាឡើងទៅលើចញ្ចើមផ្លូវឲ្យផុតទៅ។

លោកបញ្ជាក់ថា «ពេលនោះយើងបានព្យាយាមច្រើនលើកច្រើនសារ មកហើយនៅតែពួកគាត់មិនស្តាប់យើងសោះ ជាពិសេស លោក វន ពៅ ត្រូវពួកយើងលើកគាត់ ហើយបានបញ្ជាតាមរយះផ្លុំកញ្ចែ ធ្វើឲ្យពួកគាត់ខឹងប៉ះពាក្យសំដីគ្នា ស្រាប់តែពួកគាត់បានវាយមកលើកម្លាំង យើងមួយដៃមុន ទៅលើលោក សាន រ៉ាវុធ លោក អ៊ុក គង្គារ បណ្តាលឲ្យគាត់ខឹងក៏កើតការប៉ះគ្នា មួយប្រាវទៅទើបស្ងាត់ទៅវិញ ហើយយើងបានបញ្ចប់ទាំងសងខាងទៅ»។

លោក ហ្វា សាលី ប្រធានសម្ព័ន្ធសហជីពជាតិ បានឱ្យដឹងថា មានសហជីពរបួសនេះ មានការរុញច្រានគ្នា រវាងសហជីព និងប្រជាការពារ ដោយសារតែសមត្ថកិច្ចទាំងនោះ បានបណ្តេញក្រុមសហជីពដែលតវ៉ា ទៅឱ្យឆ្ងាយពីរដ្ឋសភា ប៉ុន្តែសហជីពមិនយល់ព្រម។ នៅព្រឹកថ្ងៃទី០៤ ខែមេសា ឆ្នាំ២០១៦នេះ សហជីព និងអង្គការជាង២០ស្ថាប័ន អង្គការសង្គមស៊ីវិល រួមជាមួយស្ថាប័ន ដែលពាក់ព័ន្ធជាង ២០០នាក់ បានលើកគ្នាទៅតវ៉ា នៅមុខរដ្ឋសភា ដើម្បីទាមទារឲ្យរដ្ឋសភា ដករបៀបវារៈស្តីពីសេចក្តីព្រាងច្បាប់សហជីព ចេញពីក្នុងកិច្ចប្រជុំ។ ការដាក់សំណើបែបនេះ ដោយសារតែសហជីព មិនទាន់ពេញចិត្តទាំងស្រុង ទៅនឹងសេចក្តីព្រាងច្បាប់សហជីព ដែលទើបនឹងកែប្រែជាថ្មី ដោយគណៈកម្មការចំពោះកិច្ច របស់រដ្ឋសភា នោះទេ៕