(ភ្នំពេញ)៖ ក្រោយពីមានការប៉ះទង្គិចគ្នា រវាងក្រុមសហជីពដែលទៅតវ៉ា នៅក្បែររដ្ឋសភា និងកម្លាំងប្រជាការពារនៅបរិវេណរដ្ឋសភា ដែលបណ្តាលឱ្យសហជីពម្នាក់រងរបួសបែកក្បាលរួចមក នៅពេលនេះ ក្រុមសហជីព និងកម្មករជាង២០០នាក់ បានរំសាយការតវ៉ាវិញហើយ នៅម៉ោងជិត១១៖០០ព្រឹក ថ្ងៃទី៤ ខែមេសា ឆ្នាំ២០១៦ ។

លោក ហ្វា សាលី ប្រធានសម្ព័ន្ធសហជីពជាតិ បានប្រាប់ Fresh News នៅមុននេះបន្តិចថា ការប្រកាសរំសាយនេះ ដោយសារតែសហជីពមិនចង់ឲ្យមានការប៉ះទង្គិចគ្នាបន្តទៀត។

សូមបញ្ជាក់ថា នៅព្រឹកថ្ងៃទី០៤ ខែមេសា ឆ្នាំ២០១៦នេះ សហជីព និងអង្គការជាង២០ស្ថាប័ន អង្គការសង្គមស៊ីវិល រួមជាមួយស្ថាប័ន ដែលពាក់ព័ន្ធជាង២០០នាក់ បានលើកគ្នាទៅតវ៉ា នៅមុខរដ្ឋសភា ដើម្បីទាមទារឲ្យរដ្ឋសភា ដករបៀបវារៈស្តីពីសេចក្តីព្រាងច្បាប់សហជីព ចេញពីក្នុងកិច្ចប្រជុំ៕