(ភ្នំពេញ)៖ ឧបនាយករដ្ឋមន្ត្រី ម៉ែន សំអន រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច នៅថ្ងៃចុងសប្តាហ៍កន្លងទៅនេះ បានអនុញ្ញាតឲ្យមន្រ្តីការិយាល័យកិច្ចការអន្តរជាតិ នៃតំបន់ស្វយ័តគ័ងស៊ី ដឹកនាំដោយលោក យូ ជុនសេង (Yu Chun sheng) ជាសមាជិកគណៈកម្មាធិការអចិន្ត្រៃយ៍ នៃគណៈកម្មការបក្សកុម្មុយនីស្តចិន ផ្នែកអធិការកិច្ច និង ត្រួតពិនិត្យវិស័យខេត្តគ័ង ស៊ី ចូលជួបសម្តែងការគួរសម និងពិភាក្សាការងារ។

ក្នុងជំនួបនេះ លោក យូ ជុនសេង បានថ្លែងថា នេះជាដំណើរទស្សនកិច្ចលើកទី១ របស់លោក មកកាន់កម្ពុជា ហើយដំណើរទស្សនកិច្ចនេះ ដើម្បីស្វែងយល់ពីវិស័យអធិការកិច្ច នៅក្នុងប្រទេសកម្ពុជា។

លោកបានបន្តថា ខេត្តគ័ងស៊ី ជាខេត្តមួយ កំពុងមានការអភិវឌ្ឍន៍ ដែលទទួលបានការអនុគ្រោះច្រើន ពីសំណាក់រដ្ឋាភិបាលលើវិស័យសេដ្ឋកិច្ច ហើយខេត្តគ័ងស៊ីមានទាំងផ្លូវគោក និងផ្លូវសមុទ្រ ជាប់ជាមួយតំបន់អាស៊ាន ជាអំណោយផលល្អមួយ ក្នុងការធ្វើទំនាក់ទំនងពាណិជ្ជកម្ម រវាងភាគីទាំងពីរ។

លោក យូ ជុនសេង ក៏បានជម្រាបជូនលោកស្រីឧបនាយករដ្ឋមន្ត្រី អំពីដំណើរការប្រយុទ្ធប្រឆាំងអំពើពុករលួ របស់បក្សកុម្មុយនីស្តចិន នៅខេត្តគ័ងស៊ីផងដែរ ដោយដំណើរការនេះ បានធ្វើឡើងយ៉ាងល្អប្រសើរ ហើយមានការគាំទ្រយ៉ាងច្រើន ពីសំណាក់ប្រជាពលរដ្ឋ។ លោក ក៏បានគោរពអញ្ជើញលោកស្រី ម៉ែន សំអន ដើម្បីធ្វើដំណើរទស្សនកិច្ច ទៅកាន់ខេត្តគ័ងស៊ីផងដែរ។

ជាការឆ្លើយតប លោកស្រីឧបនាយករដ្ឋមន្ត្រី បានវាយតម្លៃខ្ពស់ និងកោតសរសើរចំពោះកិច្ចការប្រឆាំងអំពើពុករលួយរបស់បក្សកុម្មុ យនីស្តចិននៅខេត្តគ័ងស៊ី ហើយលោកស្រី បានបញ្ជាក់ថា សម្រាប់ព្រះរាជាណាចក្រកម្ពុជា អង្គភាពប្រឆាំងអំពើពុករលួយ បានដើរតួនាទីយ៉ាងសំខាន់ ក្នុងការប្រឆាំងអំពើពុករលួយ ស្របតាមច្បាប់របស់រាជរដ្ឋាភិបាល។

លោកស្រីបានថ្លែងអំណរគុណរដ្ឋាភិបាលចិន ដែលបានគាំទ្រនិងជួយដល់កម្ពុជា លើវិស័យហេដ្ឋារចនាសម្ព័ន្ធ និង កសិកម្ម ធ្វើឲ្យប្រជាជនកម្ពុជាមានជីវភាពល្អប្រសើរ។ ពាក់ព័ន្ធនឹងការអញ្ជើញរបស់លោក យូ ជុនសេង ក្នុងការធ្វើដំណើរទស្សនកិច្ច ទៅកាន់ខេត្តគ័ងស៊ី លោកស្រីបានទទួលយកនូវការអញ្ជើញ ហើយនឹងបំពេញដំណើរទស្សនកិច្ច តាមពេលវេលាសមស្របណាមួយ៕