(ស្វាយរៀង)៖ លោក សៅ សុវណ្ណី អនុប្រធានក្រុមការងារ របស់គណបក្សប្រជាជនកម្ពុជា ចុះជួយស្រុករំដួល ខេត្តស្វាយរៀង បានដឹកនាំក្រុមការងារ ចុះពិនិត្យមើលសមិទ្ធផលនានា នៅវត្តបុសផ្លាំង ដែលកំពុងសាងសង់ឧប្បដ្ឋានសាលាជាអំណោយ របស់សម្តេចតេជោ ហ៊ុន សែន និងសម្តេចកិត្តិព្រឹទ្ធិបណ្ឌិត ដែលកសាងសំរេចបាន៩០ភាគរយ នៅថ្ងៃទី២ ខែមេសា ឆ្នាំ២០១៦។
លោក សៅ សុវណ្ណី បានឲ្យដឹងថា ឧប្បដ្ឋានសាលាដែលកំពុងសាងសង់នេះ មានទទឹង១៨ម៉ែត្រ និងបណ្តោយ២១ម៉ែត្រ ជាអំណោយរបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ចំណាយថវិកាអស់ប្រមាណជាង២០ម៉ឺនដុល្លារ។
លោក សៅ សុវណ្ណី បានធ្វើការផ្តាំផ្ញើដល់ក្រុមជាងសាងសង់ ត្រូវធ្វើយ៉ាងណាកសាងទៅតាមបទដ្ឋានបច្ចេកទេស ឲ្យបានត្រឹមត្រូវធានាសំណង់បានយូអង្វែង ដើម្បីទុកជាកន្លែងធ្វើបុណ្យធ្វើទានរបស់ពុទ្ធបរិសទ័។
លោក សៅ សុវណ្ណី បានបញ្ជាក់ថា មានរាជរដ្ឋាភិបាលដែលដឹក ដោយសម្តេចតេជោ ហ៊ុន សែន គឺមានការអភិវឌ្ឍន៍លើគ្រប់វិស័យទាំងវិសយ័ពុទ្ធចក្រ និងអាណាចក្រ ហើយបានផ្តោតសំខាន់ទៅលើវិស័យបួន ជាអាទិភាពគឺទឹក ភ្លើង ផ្លូវ និងមនុស្ស៕
