(ភ្នំពេញ)៖ អគ្គិសនីកម្ពុជា (EDC) និងធនគារឯកទេសវីង ខេមបូឌា លីមីធីត នៅរសៀលថ្ងៃទី៣១ ខែមីនា ឆ្នាំ២០១៦នេះ បានចុះហត្ថលេខាលើអនុស្សារណៈយោគយល់គ្នា ក្នុងការបង្កើនកិច្ចសហប្រតិបត្តិការ ពង្រីកសេវាកម្មបង់ប្រាក់ថ្លៃ ប្រើប្រាស់អគ្គិសនី នៅបណ្តាលខេត្ត ក្រុងថ្មីៗផ្សេងទៀត ក្នុងប្រទេសកម្ពុជា ។
ការចុះហត្ថលេខាលើកិច្ចព្រមព្រៀងថ្មីនេះ ធ្វើឡើងរវាងលោក កែវ រតនៈ ប្រតិភូរាជរដ្ឋាភិបាល ទទួលបន្ទុកអគ្គនាយកអគ្គិសនីកម្ពុជា និងលោកចូចូ ម៉ាឡូឡូស អគ្គនាយកធនាគារឯកទេសវីង ដោយមានការចូលរួមជាសក្ខីភាព ពីអ្នកឧកញ៉ា គិត ម៉េង និងភ្ញៀវកិត្តិយសជាច្រើននាក់ទៀតផងដែរ។
ការសហការគ្នានេះ គឺអនុញ្ញាតឲ្យមានការបង់ថ្លៃសេវាប្រើប្រាស់អគ្គិសនី តាមរយៈសេវាកម្មវីង សម្រាប់ប្រជាជនកម្ពុជារស់នៅ បណ្តាខេត្តក្រុងថ្មីមួយចំនួនទៀតដូចជា កំពង់ស្ពឺ តាកែវ កំពង់ចាម បន្ទាយមានជ័យ កំពត និងស្វាយរៀង ដែលអាចបង់វិក្ក័យបត្រភ្លើង នៅតាមភ្នាក់ងារវីង ជាង៣៦០០កន្លែង ទូទាំងប្រទេសកម្ពុជា។
លោក ចូចូ ម៉ាឡូឡូស បានថ្លែងថា នេះជាកិច្ចសហការរយៈពេលវែងរបស់វីង ក្នុងការផ្តល់ការដាក់បញ្ចូលសេវាហិរញ្ញវត្ថុ ជូនដល់ប្រជាពលរដ្ឋកម្ពុជាទាំងមូល។ ទាំងនេះមិនត្រឹមតែបង្ហាញពីការបង្កើតថ្មី លើសវាបង់វិក្ក័យបត្រនោះទេ តែវាក៏បានបង្ហាញគុណតម្លៃ របស់ Wing លើការតាំងចិត្តក្នុងការផ្តល់សេវាទូទាត់សាច់ប្រាក់ ដែលមានភាពងាយស្រួល រហ័ស និងសុវត្ថិភាព ជូនប្រជាជនទូទាំងប្រទេសផងដែរ។
ដើម្បីអាចប្រើប្រាស់សេវាកម្មនេះ អតិថិជនគ្រាន់តែមានកាត វីង ឬអាចទៅបើកគណនីវីង នៅតាមភ្នាក់ងារវីងដែលនៅជិតផ្ទះលោកអ្នក។ លោកអ្នកក៍អាចប្រើប្រាស់គណនីវីង សម្រាប់សេវាកម្មផ្សេងៗ ដូចជាសេវាបញ្ចូលលុយទូរស័ព្ទ សេវាបង់វិក្កយបត្រ និងសេវាផ្សេងងៗ។ ជាមួយគ្នានេះដែរ សម្រាប់អថិជនដែលគ្មានគណនីវីង ក៏អាចបង់វិក្ក័យបត្រអគ្គិសនីនេះបានផងដែរ ដោយគ្រាន់តែយកវិក្កយបត្ររបស់អគ្គិសនីកម្ពុជា ទៅបង់តាមភ្នាក់ងារវីងដែលមានជាង ៣៦០០ ទូទាំងប្រទេស។
ការសហការនេះ គឺជាផ្នែកមួយនៃការប្តេជ្ញារបស់ធនាគារឯកទេសវីង ក្នុងការនាំមកនូវផលិតផល និងសេវាកម្មថ្មីៗ ប្រកបដោយការច្នៃប្រឌិត ដើម្បីបំពេញតម្រូវការរបស់អតិថិជន ។
ធនាគារឯកទេសវីង នាំមុខគេលើសេវាទូទាត់សាច់ប្រាក់ចល័តតាមទូរស័ព្ទដៃ ដែលមានដូចជាសេវាផ្ទេរប្រាក់ សេវាបញ្ចូលទឹកប្រាក់ទូរស័ព្ទ សេវាបង់វិក្កយបត្រ និងសេវាកម្មផ្សេងទៀត៕
