(​រ៉ង់​ហ្គូ​ន​)៖ សភា​មី​យ៉ាន់​ម៉ា (​ភូមា​) បាន​ធ្វើ​ការផ្លាស់ប្តូរ​តំណែង​របស់​ប្រធាន​គណកម្មាធិការ​ទំនាក់ទំនង​អន្តរជាតិ ពី​លោកស្រី Daw Su Su Lwin ទៅ​ឲ្យ​លោក U Zaw Thein វិញ បន្ទាប់​ពី​ស្វាមី​របស់​លោក ស្រី Daw Su Su Lwin បាន​ឡើងកាន់​តំណែង​ជា​ប្រធានាធិបតី​ភូមា​ជា​ផ្លូវការ​មក​នោះ​។ នេះ​បើ​តាម​ការផ្សាយ​នៅ មុន​នេះ​បន្តិច ដោយ​ទីភ្នាក់ងារ​ព័ត៌មាន​ចិន​ស៊ិនហួ នា​រសៀល​ថ្ងៃ​ព្រហស្បតិ៍ ទី​៣១ ខែ​មីនា ឆ្នាំ​២០១៦​។​

​លោកស្រី Daw Su Su Lwin ក៏​ជា​សមាជិក​កំពូល​មួយ​រូប​របស់​គណបក្ស​សម្ព័ន្ធភាព​ជាតិ​ដើម្បី​លទ្ធិប្រជាធិបតេយ្យ (NLD) ផងដែរ ហើយ​ការលាលែង​ចេញពី​តំណែង​នេះ គឺ​ធ្វើឡើង​ស្រប​តាម​ច្បាប់​ដើម្បី​អនុញ្ញាត​ឲ្យ​លោកស្រី ទទួលបាន​តួនាទី​ថ្មី ជា​ស្ត្រី​ទី​មួយ​នៃ​សហភាព​មី​យ៉ាន់​ម៉ា​។​

​គួរបញ្ជាក់​ថា ប្រធានាធិបតី​លោក U Htin Kyaw បាន​ស្បថ​ចូលកាន់​តំណែង​ជា​ផ្លូវការ នៅថ្ងៃ​ម្សិលមិញ ជាមួយនឹង​សមាជិក​គណរដ្ឋមន្ត្រីរ​បស់​លោក​ចំនួន​១៨​រូប​ផ្សេងទៀត ដែល​មាន​លោកស្រី អោង​សាន ស៊ូ​ជី កាន់​តំណែង​រដ្ឋមន្ត្រី​ក្រសួង​ចំនួន​បួន​តែម្នាក់ឯង​។ សហភាព​នេះ​មាន​រដ្ឋមន្ត្រី​ចំនួន ២១​រូប ប៉ុន្តែ ៣​រូប​ក្នុង​ចំណោម​នោះ​ត្រូវបាន​តែងតាំង​ស្វ័យប្រវត្តិ​ដោយ​យោធា​៕