(ភ្នំពេញ)៖ កម្មករកាត់ដេរ ដែលជាកូនតុងទីន ជិត៣០០នាក់ បាននាំគ្នាមកដាក់ពាក្យបណ្តឹងក្នុងរោងចក្រ SWKK ស្ថិតភូមិត្រពាំងថ្លឹងសង្កាត់ចោមចៅ ខណ្ឌពោធិ៍សែនជ័យ នា​ល្ងាចថ្ងៃទី៣០ ខែមីនា ឆ្នាំ២០១៦។ បណ្តឹងរបស់ កូនតុងទីន ជិត៣០០នាក់ បានធ្វើឡើង ក្រោយពី​មេតុងទីនម្នាក់ បានយកលុយកូនតុងទីន អស់ជាង៥ម៉ឺន​ដុល្លាររត់​បាត់ស្រមោល។

ប្រភពពីកម្មករទាំងនោះ បានឲ្យដឹងថា រយៈពេលលេងតុងទីនគឺ​បានជាង១ឆ្នាំ ហើយលេងចាប់ពីក្បាល១ម៉ឺន ដល់ក្បាល៥០ដុល្លារ។ ពួកគាត់បានបន្តទៀតថា មេតុងទីនមានឈ្មោះ
ផុន សូត្យ ហៅខេង អាយុជាង៣០ឆ្នាំ ជាកម្មករ​ធ្វើការរោងចក្រជាមួយគ្នា ស្នាក់នៅផ្ទះជួល ភូមិកើតហេតុខាងលើ ដែល​មានស្រុកកំណើត នៅភូមិជើងដឹក ឃុំប្រាំយ៉ាម ស្រុកស្រីសន្ធរ ខេត្តកំពងចាម។

ប្រភពដដែលបានបន្តទៀតថា មេតុងទីន ពីដំបូងបានបាត់ពីផ្ទះរយៈពីរថ្ងៃ ក៏នាំគ្នាទៅរកនៅស្រុក​កំណើតរបស់​មេតុងទីន តែរកមិនឃើញនោះទេ ក្រោយមក ពួកគាត់បានដាក់ ពាក្យបណ្តឹងទៅអាជ្ញាធរ​នៅទីនោះ ហើយ​នាំគ្នាត្រឡប់មកធ្វើការជាធម្មតាវិញ ក្រោយមកបានទៅសួរនាំបងប្អូនមេតុងទីន ​ដែលនៅធ្វើការជាមួយ​គ្នាស្រាប់តែប្អូន​មេតុងទីននោះ បានឆ្លើយគំរាម​ទៅពួកគាត់វិញថា « បើសិន​ជាបង​របស់គេមានបញ្ហាអ្វីនោះ ប្រយ័ត្នខ្ញុំប្តឹង​ដោយពួតគាត់ គេគំរាមប្តឹង​ក៏លេងហ៊ាន សួរនាំបន្តទៀតទើប​សម្រេចចិត្ត នាំគ្នាមកដាក់ ពាក្យបណ្តឹងនៅសាលា​សង្កាត់ចោមចៅ​ដើម្បីសុំការ​ជួយអន្តរាគមន៍បញ្ហាមួយនេះ»៕