(ភ្នំពេញ)៖ បន្ទាប់ពីបញ្ចប់ នៅថ្ងៃទី៣១ ខែសីហា ឆ្នាំ២០២១នេះ សាលាដំបូងរាជធានីភ្នំពេញ បានសម្រេចលើកយកសំណុំរឿង ញុះញង់បង្កឱ្យមានភាពវឹកវរដល់សន្ដិសុខសង្គម ដែលក្នុងនោះមានជនជាប់ចោទ លោក ហូរ វ៉ាន់ និងសមាជិកក្រុមប្រឆាំងសរុប១៥នាក់ ទៅប្រកាសសាលក្រមនៅថ្ងៃទី២៨ ខែកញ្ញា ឆ្នាំ២០២១ ខាងមុខនេះ។

ជនជាប់ចោទសម្រាប់ការជំនុំជម្រះនេះមួយចំនួន ជាបណ្តាញយុវជនខ្មែរថាវរៈ មានដូចជាឈ្មោះ ជុំ វុទ្ធី ហៅ ជុំ ពុទ្ធី , ឈួ ផេង , ថា ឡាវី , មាន ព្រហ្មមុនី, មួង សុភ័ក្រ្ត , កើត សារ៉ាយ (អតីត លោកសង្ឃ) , អេង ម៉ាឡៃ (ស្រី), ហ៊ុន វណ្ណះ , ឈឿន ដារ៉ាវី (ស្រី), គង់ សំអាន និង សេង ម៉េងប៊ុនរ៉ុង (គេចខ្លួន) ដែលពួកគេត្រូវបានចោទប្រកាន់ពីបទ ញុះញង់បង្កឱ្យមានភាពវឹកវរដល់សន្ដិសុខសង្គម។ ដោយឡែក ឈ្មោះ ហូរ វ៉ាន់ (គេចខ្លួន), គង់ សភា (គេចខ្លួន), អ៊ូរ ចាន់រិទ្ធ (គេចខ្លួន), ហុង លឹម (គេចខ្លួន) ត្រូវបានចោទប្រកាន់ពីបទ ផ្ដើមគំនិតក្នុងអំពើញុះញង់បង្កឱ្យមានភាពវឹកវរដល់សន្ដិសុខសង្គម។

ក្នុងអង្គសវនាការនេះមាន លោក សំម រិទ្ធីវាសនា ជាតំណាងអយ្យការ និងមានលោក ទិត្យ សុធី បូរ៉ាឆាត ជាចៅក្រមជំនុំជម្រះ ។

បន្ទាប់ពីសវនាការលើសំណុំរឿងអ្នកពាក់ពន្ធ័រឿងញុះញង់ និងផ្តើមគំនិតញុះញង់បង្កឱ្យមានភាពវឹកវរដល់សន្ដិសុខសង្គមដែលបានប្រព្រឹត្តកាលពីអំឡុងដើមខែសីហា ឆ្នាំ២០២០ បានបញ្ចប់ ប្រធានក្រុមប្រឹក្សារជំនុំជម្រះ លោក ទិត្យ សុធី បូរ៉ាឆាត បានសម្រេចលើកយកទៅប្រកាសសាលក្រម នៅថ្ងៃទី២៨ ខែកញ្ញា ឆ្នាំ២០២១។

ការចាប់ខ្លួនជនជាប់ចោទ បណ្តាញយុវជនខ្មែរថាវរៈ បានធ្វើឡើងបន្ទាប់ពីពួកគេ នាំគ្នាតវ៉ាទាមទារឱ្យដោះលែងជនជាប់ចោទ រ៉ុង ឈុន ដែលញុះញង់អំពីបញ្ហាព្រំដែនកម្ពុជា-វៀតណាម។

លោក រ៉ុង ឈុន កាលពីថ្ងៃទី១៨ ខែសីហា ឆ្នាំ២០២១ ត្រូវបានសាលាដំបូងរាជធានីភ្នំពេញ ប្រកាសសាលក្រមកាត់ទោស ឱ្យជាប់ពន្ធនាគារ២ឆ្នាំ ចំពោះករណីញុះញង់បង្កបញ្ហានៅព្រំដែនកម្ពុជា-វៀតណាម ក្នុងខេត្តត្បូងឃ្មុំ កាលពីឆ្នាំមុន ក្រោមការចោទប្រកាន់ពីបទ «ញុះញង់បង្កឱ្យមានភាពវឹកវរ ដល់សន្តិសុខសង្គម»។

ទន្ទឹមគ្នានេះ សាលាដំបូងរាជធានីភ្នំពេញ ក៏បានកាត់ទោសមនុស្ស២នាក់ទៀតដែលចូលរួមទាមទារឱ្យដោះលែង លោក រ៉ុង ឈុន នោះគឺលោក តុល និមល និង កញ្ញា ស កណិកា ឱ្យជាប់ពន្ធនាគារ២០ខែផងដែរ។ ជនទាំង៣ ត្រូវបានតុលាការពិន័យប្រាក់ម្នាក់២លានរៀល និងបង្គាប់ឱ្យសងជំងឺចិត្តទៅដើមបណ្តឹង គឺគណៈកម្មការព្រំដែន សរុបចំនួន៤០០លានរៀល៕