(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា នៅព្រឹកថ្ងៃទី៣០ ខែមីនា ឆ្នាំ២០១៦ ស្អែកនេះ នឹងអញ្ជើញសម្ពោធ ដាក់ឲ្យប្រើប្រាស់វិទ្យាល័យ «ប៊ុន រ៉ានី ហ៊ុន សែន អម្ពវ័នជំនីក» និងស្ពានមួយខ្សែប្រវែង ១៨០ម៉ែត្រ នៅក្នុងឃុំជំនីក ស្រុកក្រូចឆ្មារ  ខេត្តត្បូងឃ្មុំ ដែលជាទឹកដីកំណើតសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន។

លោក អ៊ិន ពៅសម្បត្តិ ប្រធានមន្ទីរអប់រំ យុវជន និងកីឡាខេត្តត្បូងឃ្មុំ បានប្រាប់ Fresh News នៅថ្ងៃទី២៩ ខែមីនា ឆ្នាំ២០១៦នេះ  ថា អគារសិក្សា ដែលសម្ពោធនៅថ្ងៃស្អែកនេះមានចំនួនមួយខ្នង កម្ពស់ ៣ជាន់ ស្មើ ២៤បន្ទប់។ បើតាមលោក អ៊ិន ពៅសម្បត្តិ ក្រៅពី  សម្ពោធអគារសិក្សា សម្តេចតេជោ ក៏នឹងកាត់ខ្សែបូរសម្ពោធស្ពានមួយខ្សែប្រវែង ១៨០ម៉ែត្រផងដែរ។

សមិទ្ធផលអគារសិក្សា និងស្ពាននៅលើទឹកដីជាប់ព្រំប្រទល់ដែន នៃប្រទេសវៀតណាម ដែលសម្តេចតេជោ ហ៊ុន សែន សម្ពោធនៅ ថ្ងៃស្អែកនេះ ត្រូវបានរំពឹងថា នឹងចូលរួមបម្រើជាប្រយោជន៍យ៉ាងសំខាន់បន្ថែមទៀតដល់ការបណ្តុះធនធានចំណេះដឹងដល់កុលបុត្រ  កុលធីតាខ្មែរ ក៏ដូចជាបម្រើដល់ការធ្វើដំណើរ និងដឹកជញ្ជូនកសិផលរបស់ប្រជាពលរដ្ឋខ្មែរផងដែរ៕