(ព្រះវិហារ)៖ រដ្ឋបាលខេត្តព្រះវិហារ បានចេញសេចក្តីសម្រេចបន្តបិទខ្ទប់ជាបណ្តោះអាសន្នផ្សារកំពង់ប្រណាក ស្ថិតក្នុងភូមិកណ្តាល សង្កាត់កំពង់ប្រណាក ក្រុងព្រះវិហារ ខេត្តព្រះវិហារ រយៈពេល ១សប្តាហ៍បន្ថែមទៀត គិតចាប់ពីថ្ងៃទី២៧ ខែសីហា ឆ្នាំ២០២១ រហូតដល់ថ្ងៃទី០២ ខែកញ្ញា ឆ្នាំ២០២១ ដើម្បីទប់ស្កាត់ការរីករាលដាលនៃជំងឺកូវីដ១៩។

យោងសេចក្តីសម្រេចរបស់រដ្ឋបាលខេត្តព្រះវិហារ ដែលអង្គភាពព័ត៌មាន Fresh News ទទួលបាននៅព្រលប់ថ្ងៃទី២៦ ខែសីហា ឆ្នាំ២០២១នេះ បានឱ្យដឹងទៀតថា «ការបន្តបិទខ្ទប់ផ្សារកំពង់ប្រណាកជាបណ្តោះអាសន្ន រយៈពេល១សប្តាហ៍ទៀត គិតចាប់ពីថ្ងៃទី២៧ ខែសីហា ឆ្នាំ២០២១ តទៅ ក្នុងគោលបំណងធានាប្រសិទ្ធភាពដល់ការគ្រប់គ្រងការឆ្លងរាលដាលជំងឺកូវីដ១៩ នៅក្នុងទីតាំងភូមិសាស្ត្រដែលត្រូវបានបិទ និងទប់ស្កាត់មិនឱ្យឆ្លង រាលដាលទៅតំបន់ផ្សេងទៀត រហូតដល់មានការជូនដំណឹងសាជាថ្មី»។

សូមបញ្ជាក់ថា ផ្សារកំពង់ប្រណាក ខេត្តព្រះវិហារ ត្រូវបានអាជ្ញាធរខេត្តចេញសេចក្តីសម្រេចបិទខ្ទប់ជាបណ្តោះអាសន្ន ៣លើកមកហើយ លើកទី១ កាលពីថ្ងៃទី១៦ ខែកក្កដា ឆ្នាំ២០២១ លើកទី២ កាលពីថ្ងៃទី៣០ ខែកក្កដា ឆ្នាំ២០២១ និងលើកទី៣ កាលពីថ្ងៃទី១២ ខែសីហា ឆ្នាំ២០២១៕

ខាងក្រោមនេះ ជាសេចក្តីសម្រេចរបស់រដ្ឋបាលខេត្តព្រះវិហារ៖