(ពោធិ៍សាត់)៖ បុរសម្នាក់ខណៈកំពុងដើរ ចូលព្រៃបេះផ្កា មកលក់ស្រាប់តែ ជាន់មីនដាច់ប្រអប់ជើងខាងឆ្វេង នៅចំណុចចំណោត៨៥​ ក្នុងភូមិឯកភាព ឃុំថ្មដា​ ស្រុកវាលវែង ខេត្តពោធិ៍សាត់ នៅរសៀល ថ្ងៃទី២៨ ខែមីនា ឆ្នាំ២០១៦ ។

លោកវរសេនីយ៍ទោ ម៉ោញ​ កត្តាផល​ នាយស្នាក់ការក២​ កងទ័ព​ជើង​គោក​ ​ប្រចាំខេត្តពោធិ៍សាត់​  បានប្រាប់ភ្នាក់ងារ Fresh News ឲ្យដឹងថា ជនរងគ្រោះមានឈ្មោះ ហៀង​ ណាន អាយុ៥៥ឆ្នាំ មានមុខរបរជាកសិករ មានស្រុកកំណើតនៅ ភូមិគីឡូម៉ែត្រដប់ពីរ​ ឃុំកោះតូច​ ស្រុកកំពត​ ខេត្ត​កំពត បច្ចុប្បន្ន​រស់នៅក្នុងឃុំថ្មដា​ ស្រុកវាលវែង។

​ជនរងគ្រោះបានដើរជាន់មីនបណ្តាលឲ្យដាច់ប្រអប់ជើងខាងឆ្វេង នៅនឹងកន្លែងកើតហេតុ ខណៈកំពុងដើរ ក្នុងព្រៃមួយកន្លែង ដើម្បីរុករកផ្កាមកលក់ចញ្ចឹមជីវិត ។

លោកវរសេនីយ៍ទោ បានឲ្យដឹងដែរថា ប្រភេទមីនដែលបង្កគ្រោះថ្នាក់ ដល់ប្រជាពលរដ្ឋខាងលើនេះ ជាប្រភេទមីន ដែលបន្សល់ទុកកប់ក្នុងដី តាំងពីសម័យសង្គ្រាមមកម្ល៉េះ ។

បច្ចុប្បន្នជនរងគ្រោះ ត្រូវបានក្រុមគ្រួសារបញ្ជូនទៅព្យាបាល នៅមន្ទីរពេទ្យខេត្តត្រាត​ ប្រទេសថៃ៕