(​ឡា​ហាវ៉ាន់​)៖ មេដឹកនាំ​បដិវត្តន៍​គុយបា លោក ហ្វី​ឌែ​ល ខា​ស្ត្រូ (Fidel Castro) ហាក់​បង្ហាញ​ភាពស្ងប់ស្ងាត់​ក្រោយ​ជំនួប​ជាមួយ​ប្រធានាធិបតី​អាមេរិក លោក បា​រ៉ាក់ អូ​បា​ម៉ា ដោយ​ក្នុង​នោះ​លោក ខា​ស្ត្រូ បានលើកឡើង​ខ្លីៗ​ថា «​លោក អូ​បា​ម៉ា បាន​និយាយ​ពាក្យ​ផ្អែមល្ហែម​ណាស់ ប៉ុន្តែ​វា​បាន​បង្កប់​នូវ​ខ្លឹមសារ​សំខាន់ៗ​មួយចំនួន​តូច​ប៉ុណ្ណោះ​»​។ នេះ​បើ​តាម​ការផ្សាយ​នៅ​មុន​នេះ​បន្តិច ដោយ​ទីភ្នាក់ងារ​ព័ត៌មាន​ចិន​ស៊ិន​ហួរ នា​ព្រឹក​ថ្ងៃ​អង្គារ ទី​២៩ ខែ​មីនា ឆ្នាំ​២០១៦​។​

​ក្រោយ​ទស្សនកិច្ច​របស់​លោក អូ​បា​ម៉ា មកកាន់​ប្រទេស​គុយបា​ជា​លើកដំបូង កាលពី​ថ្ងៃ​ទី ២០ ដល់​២២ ខែ​មីនា កន្លងទៅនេះ លោក ខា​ស្ត្រូ ទើបតែ​ថ្លែង​សារ​មួយ​ឆ្លើយតប​ទៅនឹង​លទ្ធផល​ក្រោយ ទស្សនកិច្ច​ដ៏​កម្រ​បំផុត​នេះ​។ មេដឹកនាំ​បដិវត្តន៍​គុយបា បានឲ្យ​ដឹង​ដូច្នេះ​ថា «​ការ​ថ្លែង​របស់លោក បា​រ៉ាក់ អូ​បា​ម៉ា ពិតជា​បាន​សម្តែង​ចេញ​នូវ​ពាក្យសម្តី​ដ៏​ផ្អែម​ពីរោះ​ជាច្រើន ដូចជា​៖ វា​ដល់​ពេល​ហើយ សម្រាប់​ពេល​នេះ ក្នុងការ​បំភ្លេច​អតីតកាល​ហើយ​ចាប់ផ្តើម​កសាង​ក្តីសង្ឃឹម​នៃ​អនាគត​ថ្មី​ជាមួយគ្នា​»​។​

​លោក ខា​ស្ត្រូ ហាក់​សម្តែង​ក្តីខកចិត្ត​បន្តិ​ច​ចំពោះ​ការលើក​ឡើង​ជា​រួម​របស់លោក អូ​បា​ម៉ា ដោយ​ក្នុង​នោះ​ក្នុងនាម​បុរស​ខ្លាំង​គុយបា លោក​ហ៊ាន​អះអាងថា អាមេរិក​នៅ​តែ​មិន​បាន​បញ្ជាក់​ពី ការឆ្លើយតប​សំណូមពរ​សំខាន់ៗ​របស់​គុយបា​នៅឡើយ​។ មេដឹកនាំ​គុយបា​ពិតជា​ដឹងថា គ្រប់​គ្នា​ស្ទើរតែ​គាំងបេះដូង​ទៅហើយ ក្រោយពី​បាន​ឮ​ពាក្យ​ទាំងនោះ​ពី​មេដឹកនាំ​អាមេរិក ប៉ុន្តែ​គុយបា ត្រូវការ​ការដោះស្រាយ​បញ្ហា​ជាក់ស្តែង និង​ការទទួលខុសត្រូវ​ចំពោះ​ភាព​ពិត​នៃ​អតីតកាល​៕​