(ភ្នំពេញ)៖ កម្លាំងនគរបាលផ្នែកប្រឆាំងគ្រឿងញៀន នៃអធិការដ្ឋានខណ្ឌពោធិ៍សែនជ័យ បានឃាត់ខ្លួនជនសង្ស័យករណីចែកចាយគ្រឿងញៀនម្នាក់ ដែលទើបចេញពីពន្ធនាគារបាន៥ថ្ងៃ បន្ទាប់ពីទទួលព័ត៌មានថា មានជនសង្ស័យកំពុងអង្គុយលក់គ្រឿងញៀន ក៏បានចុះទៅចាប់ខ្លួនបានភ្លាមៗ ព្រមទាំងដកហូតបានថ្នាំញៀន១កញ្ចប់ធំផងដែរ។
ប្រតិបត្តិការនេះបានធ្វើឡើង កាលពីវេលាម៉ោង៥ល្ងាចថ្ងៃទី១៧ ខែសីហា ឆ្នាំ២០២១ នៅតាមផ្លូវលំក្រោយសាលាបឋមសិក្សាជម្ពូវ័ន សង្កាត់ចោមចៅទី៣ ខណ្ឌពោធិ៍សែនជ័យ។
នគរបាលបានប្រាប់ថា ជនសង្ស័យខាងលើនោះឈ្មោះ និត រ៉ាន់ អាយុ២៨ឆ្នាំ ស្នាក់នៅផ្ទះជួលភូមិព្រៃទា សង្កាត់ចោមចៅទី៣ ខណ្ឌពោធិ៍សែនជ័យ ។ជននេះគឺជាមុខសញ្ញាចាស់ជួញដួរគ្រឿងញៀន ហើយកន្លងមកត្រូវបានសមត្ថកិច្ចចាប់ខ្លួនដាក់ពន្ធនាគារ១ឆ្នាំ និងទើបតែចេញមកវិញបាន៥ថ្ងៃប៉ុណ្ណោះក៏ត្រូវចាប់ខ្លួនម្ដងទៀត។
ប្រភពដដែលបានបន្តថា នៅវេលាម៉ោងខាងលើ ខណៈពេលដែលកម្លាំងនគរបាលផ្នែកប្រឆាំងគ្រឿងញៀននៃអធិការដ្ឋានខណ្ឌពោធិ៍សែនជ័យ កំពុងល្បាតប្រជាពលរដ្ឋបានរាយការណ៍ប្រាប់ថា មានជនសង្ស័យម្នាក់កំពុងធ្វើសកម្មភាពជួញដូរគ្រឿងញៀន។
បន្ទាប់ពីទទួលបានដំណឹងនេះកម្លាំងល្បាតខាងលើក៏បានចុះទៅធ្វើការត្រួតពិនិត្យហើយបានរកឃើញថ្នាំញៀន២កញ្ចប់នៅជាប់ខ្លួនជនសង្ស័យ ទើបឃាត់ខ្លួននាំទៅកាន់ផ្នែកប្រឆាំងគ្រឿងញៀនខណ្ឌ ដើម្បីសាកសួរនិងកសាងសំណុំរឿងចាត់ការតាមច្បាប់តែម្ដង៕
