(​ភ្នំពេញ​)៖ បើ​និយាយ​ដល់​ព្រះអង្គ​ដង​កើ នរណា​ក៏​កោតខ្លាច​នូវ​ឫទ្ធី​បារមី​របស់​ព្រះអង្គ​ដែរ​។ ព្រះអង្គ​ស្ថិតនៅ​ចំ​ពីមុខ​ព្រះបរមរាជវាំង ជិត​វេទិកា​អុំទូក សព្វថ្ងៃ​ជា​ទី​សក្ការៈបូជា​ដ៏​ស័ក្តិសិទ្ធិ​មួយ​របស់​ប្រជាជន​កម្ពុជា​។​

​ជា​រៀងរាល់ថ្ងៃ​ពិសេស​គឺ​ថ្ងៃសីល​តែម្តង តាំងពី​ព្រលឹម​ស្រា​ងៗ រហូតទល់​ព្រលប់​មាន​មនុស្ស​គ្រប់​ស្រទាប់​មកពី​គ្រប់ទិសទី បាន​មក​ប្រជ្រៀត​គ្នា​នៅ​ចំ​ពីមុខ​ព្រះអង្គ​ដង​កើ ដើម្បី​ចូល​ទៅ​បែរបន់​ផ្សេងៗ តាម​បំណង​រៀងៗ​ខ្លួន​របស់​ពួកគេ​។​

​ជំនឿ​សាសនា​បែបនេះ ហើយ​ដែល​នាំឲ្យ នៅ​ចំណុច​នោះ មានកា​រកក ស្ទះ​ចរាច​រណ៍ ជាពិសេស​នៅ​ថ្ងៃសីល​តែម្តង ហើយ​កម្លាំង​ប្រជា​ការពារ​ខណ្ឌ និង សមត្ថកិច្ច​តែងតែ​ដាក់​វេណ​ប្រចាំ​ការជួយ​សម្រួល​នៅ​ទីនោះ រាល់​សព្វមួយដង​។ ការកកស្ទះ​ចរាច​រណ៍ ជា​រឿង​មួយ​ត្រូវ​ដោះស្រាយ ប៉ុន្តែ​កត្តា​មួយទៀត​នោះ​គឺ​មាន​អ្នក រកស៊ី​លក់​គ្រឿង​សក្ការៈបូជា ដូចជា ធូប ទៀន ផ្កាឈូក​ជាដើម ថ្វាយ​ព្រះអង្គ​ដង​កើ ជាច្រើន​នាក់ និង​ពេលខ្លះ​នាំគ្នា​រត់​ដេញ​ដណ្តើម​ម៉ូយ យ៉ាង​អនាធិបតេយ្យ​ទៀតផង​។​

​ហេតុដូច្នេះ​ហើយ នៅ​រសៀល​ថ្ងៃ​ទី​២៧ ខែ​មីនា ឆ្នាំ​២០១៦​នេះ អភិបាលខណ្ឌ ដូនពេញ​ដូនពេញ លោក គួច ចំរើន បាន​ឆ្លៀតពេល​ចុះ ទៅ​ជួប​សំណេះសំណាល ជាមួយ​ក្រុម​អាជីវករ​ទាំងនេះ មួយសន្ទុះ​ធំ​ដើម្បី​ពន្យល់​ណែនាំ និង​ប្រាប់​ពី​ការ រកស៊ី​ទទួលទាន ប្រចាំ​ថ្ងៃ​នៅ​តំបន់​នោះ​។ នៅ​ចំពោះមុខ​ក្រុមអាជីវករ ជាច្រើន​នាក់ បាន​ប្រាប់​ឲ្យមាន​ការលក់ដូរ​ត្រូវ​រក្សា​អនាម័យ រក្សា​សណ្តាប់ធ្នាប់ និង​របៀបរៀបរយ ដោយ​អនុញ្ញាត​ឲ្យ​លក់​តែ​នៅក្នុង​រោង​ដែល​អភិបាល​រាជធានី​ភ្នំពេញ​ធ្វើ​ជូន មិន​ឲ្យ​យក​មក​លក់​ក្រៅ​រោង នៃ​បរិវេណ​ព្រះអង្គ​ដង​កើ​ឡើយ​។​

​ការណែនាំ​បែបនេះ ត្រូវបាន​លោក គួច ចំរើន ពន្យល់ថា ដើម្បី​រក្សា​ភាព​ថ្លៃថ្នូរ កុំឲ្យ​មាន​ការកកស្ទះ​រត់​ប្រសេចប្រសាច និង ដើម្បី​លើក​មុខមាត់ សោភ័ណភាព នៅ​មុខ​ព្រះបរមរាជវាំង ដែល​ជា​ទីកន្លែង​ទស្សនា របស់​ភ្ញៀវ​ជាតិ និង​អន្តរជាតិ​។ លោក​អភិបាលខណ្ឌ​ក៏​បាន​ប្រាប់ថា បើសិន​នរណា នៅ​តែ​ធ្វើ​របៀប​នេះ មិន​ព្រមស្តាប់​តាម​ការណែនាំ​នោះ​នឹង​មិន​អនុញ្ញាតិ​ឲ្យ​លក់​នោះទេ​៕​