(កំពត)៖ បុរសម្នាក់មានប្រពន្ធទៅហើយតែបែរភ្លើតភ្លើន​ត្រេកត្រអាល​ក្នុងកាមតណ្ហាលោកីយ៍ ទៅលួចពង្រត់កូនក្រមុំអ្នកដទៃ​ទៅណែបនិត្យ​បានពីរយប់ ត្រូវបានកម្លាំងនគរបាល តាមស្រាវជ្រាវ​ឃាត់ខ្លួន​នៅរសៀលថ្ងៃ​ទី២៥ ខែមីនា ឆ្នាំ២០១៦នេះ។

មន្ត្រីនគរបាលស្រុកទឹកឈូ បានប្រាប់ Fresh News ថា ជនរងគ្រោះ ដែលត្រូវជនសង្ស័យចាប់​ពង្រត់នាំយក​ទៅបាត់រយៈ​ពេលពីរយប់​នោះ មានឈ្មោះ ជ.ស អាយុ ១៧ឆ្នាំ រស់នៅ ស្រុកទឹកឈូ ខេត្តកំពត។ ចំណែកជនសង្ស័យ​ឈ្មោះ ជា សុជាតិ អាយុ២១ឆ្នាំ រស់នៅស្រុកទឹកឈូ ខេត្តកំពត។

មន្ត្រីនគរបាលដដែលបន្តថា ជនសង្ស័យ​បានល្បួងនារីរងគ្រោះ យកទៅណែបនិត្យនៅក្រុងតាខ្មៅ ខេត្តកណ្តាល តាំងពីរសៀលថ្ងៃទី២៣ ខែមីនា ឆ្នាំ២០១៦។ លុះដល់រសៀលថ្ងៃទី២៤ ខែមីនា ម្តាយជនរងគ្រោះបានទៅដាក់ពាក្យប្តឹង​នៅអធិការដ្ឋាននគរបាលស្រុក​ទឹកឈូ ក្រោយមកកម្លាំងនគរបាល ក៏បើកការស្រាវជ្រាវរក​ឃើញជនសង្ស័យ​នាំនារីរងគ្រោះស្នាក់​នៅក្រុងតាខ្មៅ ក៏សហការ​ជាមួយកម្លាំងនគរបាល​ខេត្តកណ្តាល ចាប់ខ្លួនតែម្តង។

បច្ចុប្បន្នកម្លាំងនគរបាលជំនាញស្រុកទឹកឈូ កំពុងកសាងសំណុំរឿង​បញ្ជូនបន្តឲ្យស្នងការ​ដ្ឋាននគរបាលខេត្ត ជាអ្នកចាត់ការតាមនី តិវិធីច្បាប់៕