(ក្រចេះ)៖ កម្លាំងរដ្ឋបាលព្រៃឈើខេត្តក្រចេះ បានបង្ក្រាបរថយន្ដយីឌុបដឹកឈើពេញប្រៀបបង្កប់ដំឡូងពីលើ ស្ថិតនៅផ្លូវជាតិលេខ៧ ត្រង់ចំណុចហាងបាយលីលី ឃុំគោលាប់ ស្រុកចិត្តបុរី ខេត្តក្រចេះ នៅល្ងាចថ្ងៃទី២៤ ខែមីនា ឆ្នាំ២០១៦ ខណៈដែលរថយន្ត មួយគ្រឿងនេះ ប្រុងលោតឆ័ត្រទៅវៀតណាម។

លោក បួយ រតនា នាយផ្នែករដ្ឋបាលព្រៃឈើក្រចេះ បានប្រាប់អង្គភាព Fresh News នៅថ្ងៃទី២៥ ខែមីនា ឆ្នាំ២០១៦នេះថា សម្រាប់ប្រតិបត្តិការ បង្ក្រាបរថយន្ដយីឌុបដឹក​ឈើបង្កប់ដំឡូងមួយ​គ្រឿងនេះ មានការចូលរួមពី មន្រ្តីខណ្ឌរដ្ឋបាលព្រៃឈើក្រចេះ ផ្នែករដ្ឋបាលព្រៃឈើក្រចេះ សង្កាត់រដ្ឋបាលព្រៃឈើថ្មក្រែ និងកម្លាំងនគរបាល ខេត្តក្រចេះផងដែរ។ លោក បួយ រតនា បានបញ្ជាក់ថា ក្រោយទទួលព័ត៌មានស្តីអំពី រថយន្តមួយគ្រឿងនេះរួចមក លោកបានសុំយោបល់ពីព្រះរាជអាជ្ញាខេត្តក្រចេះ រួចឈានទៅដល់ការចុះបង្ក្រាប ហើយយកទៅរក្សាទុក នៅស្ថានីយបណ្ដុះកូនឈើខ្សា។

លោកបានបន្តទៀតថា ចំណែកអ្នកបើករថយន្ដ បានរត់ចោលរថយន្ដ ហើយមិនបានស្គាល់អត្តសញ្ញាណទេ៕